Селычкаын песянайлэсь нуналзэ пусйизы

ПЕСЯНАЙЛЭН НУНАЛЫЗ

Шуныт кусыпъёс  - улонмылэн инъетэз

Туэ элькунамы нырысьсэ песянайлэсь нуналзэ пусйимы. 26-тӥ куартолэзь табере соослэн нуналэнызы ялэмын. Нош ми, селычкаос, песянайёслы сӥзем праздникмес 17–тӥ куартолэзе школаямы ортчытӥмы. Та ужрадмы пумысен серем пыр верасез но вал, асьмеос вань дуннелэн азьпалаз мынӥськом шуыса. Брангурт песянайёс гинэ но ми бере сое пусйизы уго.

Шулдыръяськон ӝытэз ортчытонлэн мугез но туж пусйымон вал. «Старушки-веселушки» ансамбльмы кылдэм дырысен туэ 15 ар тырмиз. Дас ар ӵоже соос юртто ини школае ветлӥсь пиналъёсты удмурт йылолъёсын но сямъёсын тодматыны.  Соин ик арлыдоосмес ми одно люканы малпамы. Концерт дасяз гурт калык, вань быгатӥсьёсыз: пичиез но, мӧйыэз но. Школаямы со нуналэ 40 пала арлыдоосмы люкаськизы, пӧлазы дасо пала пиосмуртъёс вал. Эшъёссэс ӟечкыланы вуылӥз Якшур-Бӧдьяысь «Россияне» ансамбль но. Арлыдоосмылы тау карыны ветл?з муниципал кылдытэтмылэн йырыз Дмитрий Лебедев.

Трос шуныт кылъёс кылӥзы та ӝытэ песянайёсмы. Шумпотыса, синкылиоссы ик потылӥзы. Ваньмы ӵош люкаськыса, яратоно эшъёсмылы пичияк кузьым но дасямы: котькудӥзлы Таукарон но чай юон кружкаос сётӥмы. Таукаронэ таӵе кылъёс гожтӥмы: бадӟым тау школалэн но гуртлэн улоназ пыриськемдылы, ӟуч но удмурт сямъёсты, кырӟанъёсты яратэмдылы, - бордазы туспуктэмзэс но пуктӥмы.

Бер ӝытозь шулдыръяськимы ми огинэ кариськыса, кырӟаса но эктыса. Трос шулдыр крезьгуръёсын шумпоттӥз арганчимы Татьяна Демышева.

Школаын та песянайёсмес пиналъёс но туж шумпотыса котьку пумитало, соосын ӵош мылысь-кыдысь котькыӵе ужрадэ пырисько. Нылпиосты утялтыны шуыса котькуд празднике пересьёсмы лачак пӧрам сиёнъёс ӝӧк выл тыр дасяло. Тарад но вань лыктэм гурт калыкез соос ик сюдӥзы.  

Малпасько, таӵе пумиськонъёс одно ик ортчытъяно. Соос туж юртто быдэ вуымтэослы но арлыдоослы огкыл шедьтыны, шуныт кусыпъёслы, ог-огдэ яратонлы дышето.

Эшшо огзэ йылтэм потэ на.  Интернет вотэсын милям коллективмы «Пукон корка» нимын пусъемын. Туэ ми пыриськылӥм  Эстониялы ӵыжы-выжы луись калыкъёс куспын ялэм «Дунне писпу» конкурсэ. Вормисьёс пӧлы ӧм ке но шеде, туж шумпотӥськом ёросысьтымы этнофутуризмъя «Тӧдьы юсь» огазеяськон  понна. Соосын данъяськеммес вераммы потэ. Ӟечкыласьком вормонэнызы, азьланяз быгатонлык но паськыт сюресъёс сӥзиськом!  Ми но асьме гуртамы мытэм ужъёсмес одно ик азинтом.

Любовь НИКОЛАЕВА