вторник, 26 ноября 2013 г.

"Лаборатория "Шунды" проект вуылӥз Мукшие

Туала егитъёс шунды кадь яркытэсь
16 шуркынмонэ Мукши школаын урокъёс бере ӝытазе люкаськизы удмурт кылэз дышетӥсь егитъёс. Кекоранъёс, сюровайёс,
якшуръёс, кунянгуртъёс,
ӵошкытъёс, мукшиос но мукет гуртъёсысь егитъёс люкаськизы одӥг мугъя - соос понна
нош ик ужзэ радъяз
"Лаборатория "Шунды" проект.

Ӧтем куноос пӧлын вал удмурт егитъёслэн мерлыко огазеяськонзылэн тӧроез Ольга Тронина, азветлӥсь юрттӥсьёсыз но тунсыко, ӝужась удмурт кизили Богдан Анфиногенов.
Ӝыт куспын егитъёс быгатӥзы тодматскыны "Шунды" огазеяськонлэн ужась ӧръёсыныз, кудъёсаз пыриськыны быгатэ котькуд нылпи. Мед гинэ со шараялоз мылкыдзэ но тунсыкъяськонзэ. Уката но етӥзъёсыз но йӧноосыз со ӝытэ ик быгатӥзы огазеяськонэ пырыны. Соос понна нимысьтыз дасямын вал гадязы бырттылон "Шунды" пусъёс (значокъёс).
Собере ини кутскизы ужаны ньыль мастер-классъёс. Пиналъёс мылкыдзыя бырйизы я тазэ, я созэ.
Удмурт шудонъёсын но куд-ог эктонъёсын тодматӥз "Чебеляй" нимо эктон студие ветлӥсь пияш Дима Пикулев. Туэ гужем гинэ гуртъёсысь егитъёсмы «Ворекъян» фестивальын тодматскизы вал фин-угор калыкъёслэн эктонъёсынызы. Тросэзлы яраз бадӟым котретэ (хороводэ) султыса эктыны. Тарад но дышетон шулдыр ортчиз.
"Кин со азьветлӥсь?" но "Кыӵе со кулэ луыны?" юанъёслы валэктонъёс утчаны юрттӥз Оля Тронина. Дышетскисьёслэн туж тунсыко тусъем азьветлӥсьёссы пӧрмиллям: узыр, одно ик машинаен, котькытчы вуттӥськись, визьмо но, одно ик, удмурт кылзэ гажась.
Куинети мастер-классын люкаськизы тросгес нылъёс: Алина Чернова дышетӥз соосты удмурт шӧмо поскесъёс (браслетъёс) лэсьтыны. Озьы нылъёс тодматскизы эшшо одӥг амалэн, кудӥз возьматоз соослэсь удмурт луэмзэс. Со дыре ик та киуж сак но чупрес луыны  дышетэ.
Ньылетӥяз люкаськизы витё пала гинэ егитъёс. Влада Митрофанова валэктӥз соослы, кызьы куараез пуктоно, мед со вӧл-вӧл, кыдёке чузъяськоз но вольыт кисьтӥськоз шуыса. Озьыен, дырзы егитъёслэн тэк ӧз ортчы, пайдаен.
Нош ужамзы бере ваньзы чаен пыжиськемъёс веръязы. Кӧтсэс тырыса, эктон-позыръяськонэ вамыштӥзы. Кызьы бен удмуртъёс эктонъёстэк но кырӟанъёстэк? Чузъяськизы туала удмурт егитъёслэн кырӟанъёссы но ди-джейёслэн гуръёссы. Ӧтем кизилиез Богданэз (со ик Ullapalla Воy) шумпотыса пумитазы нылъёс но, пиос но. Тросэзлэсь кырӟанъёсызлэсь кылъёссэс соос дышетыса вуиллям. Пияшен ӵош кырӟазы но эктизы но.
"Шунды"-ен тодматскон шулдыр ортчиз. Удмурт кылэз валасьтэм но тодӥсьтэмъёсыз гинэ, оло, ӧзгес валалэ пумиськонлэсь пуштроссэ. Жаляса верано, сыӵеосыз егитъёс пӧлын али трос гинэ пумисько, озьы ке но, шумпотымон, соос уг палэнско шулдыръяськонъёслэсь. Валало лэся, котькуд пумиськонлэсь мазэ ке выльзэ но тунсыкозэ поттыны луэ. Оскем потэ, кытчы ке палэнэ кошкемзы яке дышетсконние пыремзы бере, егитъёсмы гажаса тодазы вайылозы таӵе пумиськонъёсты.
Бадӟым тау верам потэ Мукшиысь дышетӥсьёслы, доразы ӧтемзы но пумитамзы понна. Медам ноку но кысы гуртазы нош ӝужам "Шундызы"!
Любовь ШИРОБОКОВА




Якшур-Бӧдья ёросын ужа удмурт батюшка отец Иоанн

"Тодонэз бадзым, осконэз юн"
Якшур-Бӧдья шор ёзо школаысь физкультураен азьло дышетӥсь 
Иван Перевощиков егит дыръяз ноку но ӧз малпалля, черкын куке но ачиз
службаос ортчытъялоз шуыса. 
Но Ижкарысь Наталия нимо удмурт монахинялэн1990-тӥ аръёслэн кутсконазыверамез зэмаз.
 Троссэ «адӟись»  пересь Иван Ивановичлы ачиз шуиз:«Тонэ священнике быръёзы, 
кык арня дьяконын ветлод…».
Соку пиосмурт Якшур-Бӧдьяысь 
Свято-Никольской
черкысь батюшкалы Владимир Кунаевлы юрттӥське вал ини.

Отец Иоанн (паллянысез) но Алексий Спасский
Нош кутскиз ваньмыз кузпалыныз Елена Аркадьевнаен черкын венчаться кариськемзы бере. Семья кусыпъёссэс Инмар азьын герӟаны дэмлаз Елена Аркадьевналэн бабаез Елена Фёдоровна Бушмакина. 1993-тӥ арын Перевощиковъёс пересьсылэсь мылкыдзэ быдэстӥзы. Нуналыз но туж чебер тупаз, Тройча бере, Дун-чылкыт Луллэн (Святой Дух) нуналаз. Со дырысен 20 ар ортчиз ини, вань со вакыт ӵоже Иван Иванович валаны турттӥз осконлэсь чылкытатӥсь, буйгатскон сётӥсь кужымзэ. Но вератэк ӧвӧл кельтоно пиосмуртлэсь быдэ вуон аръёссэ.
Вордскиз со Малой Бӧдья гуртын, удмурт крестьян семьяын. Якшур-Бӧдья школаез йылпумъятозь ик бызьылонъя элькунмылэн сборной командаяз пыре вал ини. Гурт удысъя академиын агрономлы дышетскиз, но со удысын одӥг нунал но ӧз ужа. 1981-тӥ арын сюресэз сое Якшур-Бӧдьяысь спортъя школае вуттӥз. 1984-88-тӥ аръёсы УдГУ-ын спортъя факультетын дышетскыса, нош тренере берытскиз. 1991-тӥ арын Иван Иванович Якшур-Бӧдьяысь шор ёзо школае кошкиз, та дырозь отын ужаз. Дышетэм пиналъёсыз сое туж гажало но ярато.
Кузпалыныз Инмар азьын кусыпъёссэс герӟамзы бере, пиосмуртлэн йырсазяз маиз ке воштӥськиз кадь. Но соку ик черке ӧз мыны. Огыр-бугыр улон трос воштӥськонъёс, мылкыд тӥяськонъёс азе пуктӥз калыкез. Соку пиосмуртлы тунсыко потӥз: кыӵе черк пушласянь, малы отчы калык кыстӥське? Мылкыд каремезъя Ижкарысь черкъёсы ветлӥз, Наталия монахиняен пумиськиз, соку ик улоназ зэмам вераськонзы пӧрмиз. Можга ёросысь Поршур гуртысь отец Виктор трос валэктонъёс сётӥз оскон пумысен. Озьы тӥни, 1996-тӥ арын лулпуш малпанъёссэ валан понна, Иван Иванович пумен черке ветлыны кутскиз. Службаослэсь мылкыд басьтыны кутскемез бере пиосмурт валаз, со татын туж интыяз шуыса. Приходэ ветлӥсьёс пӧлысь огназ пиосмуртэз отец Владимир Кунаев но синйылтӥз, службаосын юрттӥськыны ӧтиз, алтарь котыре пономаре пуктӥз. Эшъяськемзы эшшо но мылкыдзэ ӝутӥз. Дыр ортчыса, Иван Иванович "Апостол" лыдӟыны кутскиз. Со вакытэ бордаз гимназиысь бадӟым классъёсын дышетскись Григорий Нелюбин но батюшкалы Алексий Спасскийлы юрттылэ вал ини. 2009-тӥ арын Ижкарысь но Удмуртиысь Митрополит Николай соосты кыкназэс ик подрясникен (кузь сьӧд дэремен) ветлыны  бакель (благословить) кариз. Со дырысен Иван Ивановичлэн   черкын зэмос ужан вакытэз кутскиз. 2012-тӥ арын декабре Михаил Архангеллэн  нуналаз Иван Ивановичез дьяконэ пыртӥзы, нош 2013-тӥ арын январе со иерей луиз ини. Ачиз пиосмурт вера:
- Наталия монахиня улонме шонер адӟиз, ӧжыт гинэ янгышаз ке но. Дьяконын куинь арня ветлӥ. Мон али ке но асме утчасько. Кин ке но монэ валтэ кадь. Тани Иж-Забегалэ, кытын али Михайло-Архангельской храм пуктӥське, мон тунсыкъяськонме буйгатыны мынӥ. Нош люкаськем калык юа: ку-о дорамы ялан ужась батюшка лыктоз ини? Кызьы ке ӵем вошъяськись ужасьёслэн ужзы уг азинскы, озьы ик татын но луэ. Соин кулэ, пе, асьмелэнэз, ёросамы улӥсез. Тӥни соку аслым паймымон ивор кылӥ: монэ дэмлало, пе. Таӵе дыръя "я" но шуыны секыт, шумпотымон но кадь, калык мыным оске шуыса…
Таиз валамон но. Отец Иоанн туж лякыт сямо, востэм но шуыны луоз, ассэ возьматыны воксё уг яраты. Но Иж-Забегалэ батюшкае пуктэмзы бере отысь но матысь гуртъёсысь оскисьёс капчиен лулскизы: черк но чальгес ӝутӥськоз, удмурт адямиен огкыл но шедьтыны капчигес луоз.  Иж-Забегалын ӟучъёсгес уло ке но, Чекерысь, Мукшиысь, Ӵошкытысь пересьёс но шоро-куспо арлыдъемъёс ваньзы кадь ик удмуртъёс. Сак, кылзыны быгатӥсь, визьмо батюшкалы луыса осконзы будэ, мылкыдзы капчия. Та дыре Иван Иванович удмуртарняосы (пятницаосы) но кӧснуналъёсы (субботаосы) Иж-Забегалын, нош арняосы - Вуж Ӟатчаысь Казаньысь Инмар Мумылэн приходаз службаос ортчытъя. Гужемзэ, отец Алексий Афонэ кошкылон вакытэ, Якшур-Бӧдьяысь Свято-Никольской храмын но тыршиз, та дыре но куд-ог службаосты нуэ. Ваньмыз пӧрме солэн, но одӥг быдэсмымтэ малпанэз вань: Михаил Атамановен тодматскемез ӧз на луы. Та мур визьем удмурт протодиаконэн тодматскон котькинлы трос выльзэ, бурдъяськымонзэ сётэ. Выль но Вуж Сӥзёнъёсты (Новый и Ветхий Заветы), Библиез удмурт кылэ берыктэм адями зэмзэ но дунъянтэм ӵектонъёс верасал, дыр, Иван Ивановичлы. Осконо, пумиськонзы одно ик пӧрмоз.  
Эшшо огзэ пусъем потэ на. Райцентрысьтымы черке ветлӥсьёс, Иван Ивановичлэсь ӟеч сямзэ тодыса, Иж-Забегалэ но шумпотыса ветло. Тани огез соос пӧлысь газетмылэн кемалась эшез Валентина Широбокова туж гажа отец Иоаннэз:
- Отец Иоанн кема аръёс ӵоже  юрттэ ини черкын. Туж тыршись, тодонэз бадӟым, осконэз юн, калык со доры капчиен вазиське. Мон понна со тужгес кулэ луись сямъёс.
Туж гажаса вера эшез сярысь Свято-Никольской храмлэн настоятелез Алексий Спасский но:
- Мон туж тау карисько Инмарлы, мыным сыӵе сюлмо юрттӥсь келяз шуыса. Отец Иоанн тыршись, валась  но калыкен огкыл шедьтӥсь адями. Со вань сюлмыныз кыстӥське прихожанъёс доры, нош кыӵе гажало сое пиналъёс! Со дыре ик сак эскере хозяйственной ужпумъёсты. Юн осконэз сое азьлань нуэ.
Улонлэсь кылдон мугзэ валаны тыршон, ма понна тон вордскид та дунне вылэ юанэз сэрттон-пертчон котькинэ сюлмаськытэ. Кин ке со сярысь малпа но пумен вунэтэ, кин ке вань улонзэ валэктон утча. Отец Иоанн но сыӵе мылкыдын улӥз, кема утчаськыса, Инмарлэн мудорез азьын валан шедьтӥз.  Со зэмзэ но ас интыяз вуиз: калыкысь потэм удмурт батюшкаез Якшур-Бӧдьяын гинэ уг, быдэс ёросын тодо но гажало ини.
Вера ВАХРУШЕВА

Туспуктэмез  Николай ЯКОВЛЕВЛЭН

среда, 4 сентября 2013 г.

Якшур-Бӧдья ёросысь Якшур гуртын улэ Алексей Загребин, Екатеринбургысь духовной семинариысь студент


Аспӧртэм… огшоры удмурт пияш
Али нокин но зол уг паймы ни, кин ке тодмо адями черке ветлэ ке. Котькуд православной
праздникъёсты отын пумита, котькуд дун-чылкыт адямиосты тодэ, интыяз кулэ луись 
молитваосты шугъяськытэк вера. Озьы ке но, трос уг шедё сыӵе адямиос, кудъёсыз вань улонзэс Инмарлы сӥзьыны дасесь. Эн малпалэ, со монастыре кошкон ӧвӧл, со Инмарлэсь
но солэн  юрттӥсьёсызлэсь улон-вылонзэс дышетон, черк котырын астэ шедьтон.


Якшурысь Алексей Загребин   аспӧртэм пияш. Сое уг тунсыкъяськыто дуно машинаос, бадӟым уждун но мукет арбериос. Со улонлэсь  лулпушъетсэ (духовное начало) утча. Вера Михайловна но  Александр Петрович Загребинъёс ноку но ӧз висъяськылэ Инмарлы мур осконэнызы, пиналъёссэс но нимысьтыз черке ӧз нуллэ. Но озьы-а, тазьы-а бадӟымез Алексей пизы та дыре Екатеринбургысь  православной духовной семинариын дышетске, туэ 4-тӥ курсэ потӥз ини. Кызьы бен вуиз огшоры  удмурт пияш пырак отчы, кин вайиз сое черке, кин Инмарез валаны дышетӥз? Буш интыын номыр но уг кылды, солы пушъет одно кулэ. Лёшалэн но семьяяз вал ик адями, кудӥлэсь со адӟем кариз, кинлэн улэменыз со али но данъяське. Со бабаез Глафира Александровна Тронина, Вера  Михайловналэн мумиз. Со сярысь Лёша туж лад-лад но гажаса вера:
- Бабае али ӧвӧл ни, но кӧня мон сое тодӥ, со весь вӧсяське вал. Ӵукна но ӝытазе, черке ветлэмзэ уг тодӥськы. Но Инмарлы со  зол оске вал. Котькыӵе ужез кутскыкуз, со одно ик кык кыл вера вал, удмурт но, ӟуч сямен но. Мыным со сыӵе тунсыко потылӥз! Шумпотӥсько  вал, куке бабае  доры кыӵе ке куронэн лыкто. Со веть  туно-пеллё вал. Малпасько, эмъян кужымез Инкуазьлэсь но, молитвалэсьт но  потылӥз. Черке нырысьсэ мон мынӥ  бадӟым классъёсын дышетскыкум. Только-только усьтӥcькиз  вал ай со. Тодматски о.Владимирен, улонме черкен  герӟаны малпасько, пӧй, кытын  дышетскыны  луоз, юай. Одно ик Владыкалэсь  благословение куроно шуиз но, мылкыды сӥяз. Но черке ветлэмысь ӧй дугды, маке но кыске вал отчы. Мугоры ик юзыр-кезьыр луылӥз мудоръёс дортӥ ветлыкум. Учкыса улӥ, кин ма каре, кызьы кирос  пуктэ, яра вал, куке ваньзы огкылысь ужало...
Гимназиез йылпумъяса,  Алёша Сарапулысь аграрно-экономической колледже пыриз, отын агрономлэсь профессизэ басьтӥз. Гуртаз бертыса, Фрунзе нимо возёсын гырон-кизён но  аран вакытъёсы ужалляз, но  агроном уж сое бордаз ӧз кыскы. Алёша, бадӟым вис каремез бере нош ик Якшур-Бӧдьяысь черке мынӥз. Отец Алексиен тодматскыса, Воскресной школае ветлыны кутскиз.
- Туж яраз мыным церковной крезьёсты кылзыны, нотаосты дышетыны, куараез тупатыны. Апостолъёслэсь ужъёссэс лыдӟыса, отец  Алексий котькуд главазэ сэрттэ-пертче вал. Ваньмыз  туж яра вал. Пумен черк котырын юрттӥськыны кутски. Утялскон, лымы  сузян... Собере стороже пуктӥзы, пичияк уждун басьтыны кутски. Воскресной школаын мон умой-умой валай: дышетскеме потэ. О. Алексий  духовной  училищеослэсь телефонъёссэс сётӥз. Бырйи  Верхотурьеысь училищеез, отын капчигес дышетскыны луоз шуыса. Екатеринбург пыр отчы  мыноно. Отчы вуи но йырам  малпан чилектӥз: а мар-о луоз, мон Екатеринбургысь семинарие пырыны эскери ке? Сьӧрам  Свердловск улосын улӥсь двоюродной сузэре вал, со монэн соглаш луиз. Мынӥ епархие, отын ваньзэ валэктӥзы. Документъёсме семинарие сётӥ. Толэзь  пала  подготовительной курсъёсы ветлӥ, отын милемды зол дасязы. Конкурс бадӟым ӧй вал ке но, туж сюлмаськи, пыро-а меда? Экзаменъёс бере милемды  кык курслы люкизы: нулевой но первой. Мон нокызьы но ӧй малпалля, нырысетӥ  курсэ экзамензэс тужгес умой сётэмъёс  пӧлы пыро шуыса, - али но оскытэк кадь вера пияш.
Нош туэ со 4-тӥ курсэ потӥз ини. Табере Алексеез  уд  ӵошаты ни со пияшен, кудӥз дас ар талэсь азьло черке куалекъяса пыриз. Алексей табере семинарист. Пияш тодэ мар со  черк улон. Солэн вань аслаз эшъёсыз, аслаз улон шоры учконэз, аслаз интересъёсыз. Кызьы бен со азьпал улонзэ адӟе?
- Семинариямы  5 курсын дышетске Ижкарысь пияш Роман Гольц. Со нырысь Верхотурьеын визьнод басьтӥз. Вань богослужениосты тодэ, туж чебер кырӟа. Паймисько солэн  тыршемезлы, пуктэм малпанэз доры мыныны быгатэмезлы. Роман тодэ - со священник луоз. Нош мон малпаськисько на. Дышетскон сяна, мыным тунсыко медицина, тужгес но Шундыӝужан  паласез, психология, дуннелэн но адямилэн кылдэмез. Со сярысь книгаос лыдӟыны, телепередачаос учкыны тыршисько. Бабае адямиосты эмъя ке вал, соин, лэся, мынам со быгатонлыкъёссэ валаме, тодэме потэ. Нош дышетсконме мон азьланьтысал воксё мукет удысын:  мудоръёсты суредась луысал. Тодӥ ини, сыӵе  школа вань Ижкарын Свято-Михайловской  соборын Отец Алексий Палех городын (Иваново улосвыл) иконописья художественной училище но вань шуиз. Адӟом.
Нош али, азьло аръёсы кадь ик, Алексей туж эшъяське Якшурысь суредасен  Виталий Широбоковен. Виталий Семёновичен соос   тросгес пейзажъёсты суредало, сое, ма матын кыкназылы ик. Азьло дышетӥсь вера, Алексей малпанзэ пумозяз вуттыны тыршиз ке, солэсь одно ик зол суредась пӧрмоз. Нош Алёшалэн тыршись сямыз вераськемезъя ик шӧдӥське. Кыӵе бен огшоры пияш  чидалоз котькуд ӵукназэ молитваысен кутскыны но озьы ик сое йылпумъяны. Ма кинлы со кулэ, сялскозы тросэз. Нош кулэ со ваньмызлы, кин уг дӥсьты черке мыныны  яке лулпуш  чылкытэз кулэ уг кары. Асьмеос ке ум тыршиське, оло, Инмарлы матын луись адаямиослэн чидаса, вӧсяськыса  улэмзы милемлы но юрттоз?
Эшшо огзэ пусъем потэ на: Алёша  чылкак удмурт семьяын вордскемын. Мамаез Вера Михайловна гурт клубын ужа, папаез Александр Петрович Якшур-Бӧдьяысь сюрес лэсьтонъя управлениын тырше. Куинь пизы пӧлысь огез аспӧртэмгес, огшоры калыклы валантэм. Но Алёшалэн сыӵе луэмезлы ик паймо но шумпото бускель бабушъёс, черке ветлӥсь нылкышноос. Инмарен верам  заповедьёсты  тодэм сяна, Аплексей Загребин возьматэ соосты ас вылаз. Кылзӥськись, гажась, чалмыт но тыршись. Быръем сюресэз пияшлы буйган но каньыллык мед сётоз. Оскем потэ, удмурт кылзэ тодэмез но солы азьланяз бадӟым луонлыкъёс усьтоз.
Вера ВАХРУШЕВА
Туспуктэмез авторлэн
 

понедельник, 15 июля 2013 г.

“Адӟы но гожты” конкурсэ



“Адӟы но гожты” конкурсэ
Нимъёс лыкто но кошко, инты кыле

Гужем шор вадьсаз вуиз ини, нош конкурсамы пыриськыны мылкыд карисьёс али но бабо на. Куд-огез бен тулыс ик дась вал ини фотоаппарат утыны. Котькуд ӵошатсконын сыӵе кузьым уг сёто уго. Нош милям со чалмытак шкапын кылле, вормисьсэ вите.
Но вуиз, вуиз со нунал, куке конкурсамы пыриськыны мылкыд карись редакцие вуиз. Со Порвуысь клубын ужась Валентина Загребина. Гуртсы котырын лачак тунсыко нимо ошмесъёс, возьёс, нюкъёс. Соос сярысь ик гожтэ Валентина Николаевна.

Выль ошмес

Гуртамы Елесина ульча пумын нимтэм ошмес вал. Со али но вань, но кылем арысен ми сое Выль ошмес шуыса нимаськом. Елесина ульчаын улӥсьёс со ошмесэз туж утялтыса возё, нош кылем арын котырзэ воксё выльдӥзы. Поликарбонатлэсь липет шуккизы, пужыосын чеберъязы, кенеразы. Ваньзэ сое Николай Аркадьевич Широбоков но Николай Николаевич Загребин лэсьтӥзы. Нош собере, калыкен озьы кенешыса, Кекоранысь Свято-Троицкой черкысь Георгий батюшкаез ӧтизы. Отец Георгий ошмесэз вӧсяз, иконка кельтӥз. Туэ толалтэ порвуос отысь вузэ йӧвылэсултон (Крещение) уе гуртазы вайылӥзы. Веть  отын вуэз табере вӧсямын. Пусъёно на, Выль ошмесын вуэз туж ческыт но, ю но ю гинэ.
Пичияк верам потэ мукетъёсыз сярысь но. Бадӟым ошмесын азьло вуэз туж зол вия, пе, вал. Трос калык отчы лыдъяськыны ветлылэм.
Акман ошмесын, Выленыз ӵошатыса, вуэз мукет шӧмо. Азьло аръёсы Акман куинь синмысь вия вылэм, соин 3 тусь пуктэмын. Али огез гинэ синмыз ву сётэ. Таосыз ошмесъёс утялтэмын, калык отысь вузэ нуллэ.
Иванай ошм ес ас понназ вия, нош азьло отысь но трос вузэ кутылӥзы.
Чачабей нюкысь ошмес куасьмемын.
Апач ошмес но азьло бадӟым вылэм. Гуртоос отын лушкемен кумышка, пе, пӧзьтылӥзы. Нош сюанъёс дыръя егитъёс отчы выль кенэз пылатыны, пазяськыны ветлылӥллям. Али сюанчиос Акманэ ветло.

Кирпич сарай яке Сисьмем сэрег?
Бӧдьялась лыктыку Порвуэ пыронтӥын палляназ вырйыл вань. Отын али туж трос ваёбыжъёс уло, вырйыллэн луоё урдсаз соос асьсэлы гопъёс копаса, каръёс лэсьто, пи потто. Азьло дыръёсы со интыез Кирпич сарай шуо вал. Отысь поттэм горд сюйлэсь кирпич лэсьтылӥзы. Сыӵе кирпичлэсь Кекоран черк но пуктэмын, шуо. Али со интылэн нимыз воксё мукет. Порвуос трос аръёс ӵоже синйылтылӥллям: со вырйыл вадьсытӥ пилемъёс вуо ке, одно ик жаль-жаль зоре, пе. Зор-кот ваемез понна та интыез Сисьмем сэрег ниманы кутскиллям. Озьыен, котькуд интылэн нимыз кыӵе ке ужен, инкуазь явлениен, учырен яке адями нимен герӟаськемын луэ. Кин тодэ, оло, кӧня ке аръёс ортчыса, гурт котырамы выль нимъёс кылдозы, нош мукетъёсыз вунозы?
Валентина ЗАГРЕБИНА.

Порву гурт

Ас вылам мертамын: Лӧптэм мылкыд – нылпилэн кужымез

Ас вылам мертамын
Лӧптэм мылкыд – нылпилэн кужымез

Анай-атайёс котькуд ар тыршо нылпиоссэс гужем лагерьёсы интыяны. Угось, пиналъёс понна со шулдыр шутэтскон но выль тодматсконъёс. Нош малпаськоно ке, ма пыр гинэ уг ортчы нылпи, отчы вуэ ке. Ваньмыныз соин «тодматсконо» луиз нырысетӥ нуналысен ик аслым но, вожатоен ужаны интыяськи бере.
Секыт югдуре шедем нылпиосты «Шунды» огазеяськон таяз аре нырысетӥзэ люказ. Лагерной сменаез «Тулкым» нимазы. Ортчиз со Дэри ёросысь «Ёлочка» легерьын. Огшоры гинэ сыче ним удмурт сменалы ӧвӧл сётэмын вылэм. Дас нунал куспын, зэм но, зол гинэ тулкымъяськизы ваньзы: 38 кузя нылпиос но, соосын ужась ньыль вожатойёс но. Быдэс элькунысьтымы  люкам нылпиослэсь лӧптэм мылкыдзэс кобыен омыръяны луэ вал, сокем трос эмоциос басьтӥллям соос лагерьын шутэтскон куспын.
Ужазы куинь оръёс (направлениос). Театральной искусствоез нуиз Ижкарысь музыкальной колледжын дышетскись студентка Анна Пислегина, Киужъёсын вырыны Ижкарысь нылпи садлэн воспитателез Эмма Андреева дышетӥз, со ик вал сменалэн начальникез. «Журналистика» удыслэн аспӧртэмлыкъёсыныз нылпиосты тодматӥ мон - "Рассвет" газетлэн корреспондентэз. Эшшо одӥгез юрттӥсьмы вал Ирина Агеева, удмурт факультетын дышетскись студентка. Со нылпиос понна трос пӧртэм шудонъёс но ужрадъёс малпалляз, озьы ик ӟеч сиськемзы понна кыл кутӥз.
Кельшись удысэз бырйыкузы, куд-ог нылпиос шугъяськизы. Нырысетиӥ кыкеныз соос школаын кызьы но озьы выремын вал ини, нош журналистикаен тодматсконо луиз нырысетӥзэ. Пумозяз отрядъёс люкиськизы куинетӥ нуналаз гинэ. Соку ик валамон луиз, мон доры шедизы самой укылтэмъёсыз, одӥг интыязы пукыны ӵыдисьтэмъёсыз. Ӧжыт кышкай но вал, кызьы мон соосын ужало! Соос кылзӥськыны но уг быгато кадь потӥз, палэнысен учкыса. Нырысетӥ занятиын ик малпай: «Ваньдэсты одно ик киям куто». Серекъясьтэм тусо кариськыса валэктыны кутски, ма со сыӵе журналистика но газет поттон, кыӵе аспӧртэмлыкъёсыз но луонлыкъёсыз вань та удысын. Сак кылзӥськизы. Куд-огез мае ке гожтыса но кельтэм ас блокнотаз. Со азьын ваньзэсты сочинение гожтытӥ, котькудӥзлэсь гожъяськыны быгатонлыксэ мертан-ӵошатон понна. Мынам малпамея, нылпилэн ляб сочинениысьтыз но аспӧртэмлыксэ шедьтыны луэ. Озьы котькудӥзлэсь кулэ луэмзэ пусйыны тырши. Уката но шумпотыса нылпиосы кутскизы асьсэлы псевдонимъёс малпаны. Кыӵе гинэ нимъёс ӧз кылдэ соку: Ӟоз Ваня, Оки, Инвожо, СтепанНюк, NevosВан, МаксимЧи но мукетъёсыз. Кушем нимъёссы смена ӵоже зол гинэ куд-огъёсызлы лякиськиллям.
Газет поттон бордын ужакумы, котькуд ныллэн но пилэн аслаз нимысьтыз ужез вал. Редактор корреспондентъёсын ӵош малпалляз темаосты, рубрикаосты но котькуд полосаысь статьяослы инты мерталляз. Малпамзы бере корреспондентъёс утчаса ветлӥзы иворъёс, интервью басьтыны дышетскизы, нылпиослэн юанъёссылы валэктонъёс утчаны тыршизы. Уката тунсыко потӥз ваньзылы Индиысь лыктэм вожатойёсын тодматскон. Ӵапак пресс-конференция кадь ортчиз со пумиськонмы. Нылпиос соку гинэ валазы кадь, малы кулэ школаын англи кылэз дышетон. Фотографъёсмы но соку зол гинэ ужазы: котькуд нылпилэн сыӵе тунсыко но котьку пальпотӥсь адямиосын туспуксемез потӥз.
Куноос сярысь вераськоно ке, соос котькуд нунал вуылизы кадь «Тулкыме». То «Мынам Удмуртие» телеканалысь ужасьёс, то егит калыкен ужанъя министр Владимир Соловьёв, то Ижкарысь кизилиос Николай Анисимов но Алина Антонова но трос мукет ӧнерчиос. Соос понна милям нимысьтыз баммы но висъямын вал: «Куно пумитан дунне» шуыса нимазы сое нылпиос. Нимысьтыз бам люкамын вал «Тазалык дуннелы». Отчы пыризы нылпиослэн спортивной ужрадъёсы пыриськемзы но вормонъёссы сярысь статьяос. Корреспондентъёслэсь гожтэм статьяоссэс лад-лад эскерылӥз но компьютерен набирать карылӥз корректор-наборщик, собере ини, текстъёсты но фотоосты бумага вылэ поттэм бере, вёрсткая дизайнеръёс редакторен ӵош малпаськылӥзы, кытчы мае интыяны. Статьяослэсь но рубрикаослэсь нимъёссэс гожъяллязы нимысьтыз адямиос, угось котькуд пиналлэн аслаз нокытын пумиськисьтэм почеркез. Газетлы логотип но асьсэос суредазы, котькуд бамлэсь дуръёссэ чеберман понна узоръёс но малпазы. Палэнысен шумпотыса гинэ учкылӥ мон соослэн тыршыса ужамзы шоры. Ма соослэн пӧрмиз, учкыны быгатӥськоды туспуктэмъёсысь та ссылкая http://vk.com/club55392207.
Зэмзэ вераса, мон малпай вал, ужмы шоро-куспо ортчоз шуыса, вуэ куштэм кӧльылэсь кылдэм тулкым быдӟа гинэ вӧлмытскоз. Нош берпуметӥ нуналаз валамон луиз, ужмылэн емышез быдэс гуртэз яке воксё быдэс карез ик гылтыса кошкысал оло – собыдӟа энергетика потэ вал нылпиослэсь. Сокем зол эшъяськиллям вылэм соос дас нунал куспын. Нырысетӥ нуналаз ик гуртэ куриськисьёс эшшо кӧня ке нуналлы кылемзы потӥз. Ма карод, гуртлэсь мӧзмон вормиз ик. Доразы нош маке быдӟа котомка тыр лӧптэм мылкыдын но тодэ ваёнъёсын бертӥзы. Вуоно арын та смена нош ик радъямын луоз. Вуоно пумиськытозь, «тулкымъёс»!

Любовь ШИРОБОКОВА