Кекоран черкогуртысь Любовь Широбокова Калыккуспо фестивальын горд дэременыз вормисе потӥз

Горд дэрем вайиз вормон

20-тӥ оштолэзе Пермь карын “Горд дэрем” нимо Калыккуспо модая фестиваль ортчиз. Пыриськизы отчы Россиысь, Украинаысь но Испаниысь дӥсь вуронъя дизайнеръёс. Палэнэ ӧз кыльы Удмурт шаер.

Сыӵе вылӥ статусэн ӵошатсконэ пыриськиз УдГУ-ысь дизайнъя но искусствоя институтын дышетскись Любовь Широбокова. Отын со “Художественное проектирование костюма” ӧнерлы визьнод басьтэ. Нош тунсыко но матын со милемлы Кекоран гуртын вордскеменыз. Любалэн сыӵе бадӟым ӵошатсконэ пыриськемез туж шумпоттэ, угось та удмурт нылашлэн быгатонлыкез сяна, дӥсьтонэз но вань. “Вконтакте” мерлыко вотэсбамын соин герӟаськыса, ваньзэ пыр-поч юалляськыны луиз. Тани мар гожтӥз Люба:

“Одӥгаз занятиын дышетӥсе кудаз ке конкурсэ пыриськыны дэмлаз, но пыриськон понна одно ик дэрем вуроно шуиз. Трос гинэ ӟуч костюм сярысь книгаос сётӥз. Одӥгысьтыз мудор (икона) адӟи, озьы ик йырам образ кылдӥз.

Туэ ортчем “Горд дэрем” (“Красное платье”) фестиваль сӥземын вал Романовъёслэн эксэй луэмзы дырысен 400 ар тырмонзылы. “Царица” шуиськиз темаез. Книгаысь мудор ик ним но «сётӥз», горд дэремме “Святая” нимай.

Фестивале ваемын вал 80 дэрем, ваньмыз огезлэсь огез чебер. Но лауреатэ 20 адями потӥз. Мон пӧлазы шеди шуыса, али но уг оскиськы на, но мылкыды туж лопыръяське. Мон “Креатив” номинациын (соос куинь пӧртэм вал) куинетӥ инты басьтӥ. Дэремме уен-нуналэн вури, мамае но туж сюлмаськиз мон понна, мае-сое вурыны но юрттӥз. Ӝикыт вурем сяна, сое веть йыре кыльымон лэсьтоно, чебер текст дасяно. Романовъёслэсь семьязэс ӟуч православной черк канонизировать кариз, оскон понна улэм но сое утьыса бырем святойёс борды султытӥз. Соин ик образме но “Святая” нимай. Малпанме возьматон понна горд басма борды зарниям сӥньыс но сыӵе ик бусинаос кутӥ. Горд - со кивалтон, зарни - байлык. Йырберын нимб, пельпумъёсты пытсась пужыятэм воротник, сарафанлэн азьыз эксэй семьялэн туспуктэмъёсыныз чеберъямын - ваньмыз та образэз вылӥ каре, инмозь ӝутэ.

Таӵе конкурсэ пыриськон мыным кужым сётӥз, шонер удысъя дышетскисько шуыса осконме будэтӥз”.

Шумпотэ нылыз понна Надежда Васильевна но:

- Факультетысьтызы со конкурсэ дышетӥсьсы но ньыль нылъёс мынӥзы, котькудӥз аслаз дэременыз. Любамы гинэ финалэ шедиз, золгес тыршиз, дыр. Институтын со 3-тӥ арзэ дышетске ини, нош инъет солы сётӥз Культурая колледж. Отын со трос суредаськиз, быгатонлыкъёссэ но валанзэ ӝутӥз. Али вань йырвизьзэ ужаз кутэ ини.

27-тӥ оштолэзе Любалэн вордскем нуналыз вал. Вормонэныз со аслыз сыӵе бадӟым кузьым лэсьтӥз, кудзэ номырин уд мерта. Сӥзиськом нылашлы азьланяз но вормонъёс басьтыны, кудъёсыз одно ик луозы на. Удмурт сямыз - нуналысь нуналэ тыршонэз - солы юрттӥз ни.

Ника ЮМИНА

Туспуктэм

Люба ШИРОБОКОВАЛЭН

архивысьтыз кутэмын