Шӧдымтэ шорысь юрттэт
Кунянгуртысь нылпи сад вуж но пичи юртын интыяськемын. Но со милям
куректонмы ӧвӧл,
со данъяськонмы но шумпотонмы, угось котькуд пичи семьяын кусыпъёс матынгес
но шунытэсьгес луо. Озьы ик садикамы: котькуд вуись пиналэз асьмелэсь кадь
пумитаськом, котькуд мумы-бубыен огкылысь улӥськом.
Алигес милемлы шӧдтэк шорысь юрттэт вуиз, пиналъёсмы солэсь лобаса гинэ
ӧз, тэтчаса но ветлӥзы. Кун Кенешысь депутатмы Софья Широбокова алигес 4 ӝӧк но 15
пукон кузьмаз. Нылпиосмы та дыре 21 кузя ини, ваньзылы уг ке но тырмы, выль
арбериос ваньзэс ик шумпотто. Нош кыӵе паймон кузьмазы милемлы Якшур-Бӧдьяысь мумы-бубыос
Ольга но Алексей Вахрушевъёс! Одӥг нуналэ мар ке быдӟа коробкаен лачак шудонъёс вайизы. Маиз
гинэ отын ӧй вал! Шудон машинаос, конструкторъёс, кубикъёс,
мунёос, луоен шудон посудаос... Пичиосмылэн азбаре но потэмзы уг поты ни вал,
выль шудонъёсынызы кӧтсы тырыса улӥз. Со вакыт ик гуртысьтымы “Мария”
магазинлэн кузёез (пиналзэ тожо дорамы нуллэ) Раиса Руденко тросгес ӝӧквыл
шудонъёс кузьмаз: пазлъёс, домино, магнитной доскаос, книгаос но мукетсэ.
Огезлэсь но мумы-бубылэсь нимысьтыз курыса ӧм улэ, пал кыл но ӧм поттылэ, кулэ шуыса
- вот маиз сюлэмез бугыртэ. Пиналъёс сярысь 1-тӥ инвожое гинэ тодазы уг ваё, огшоры
нуналъёсы но тодазы возё. Туж бадӟым тау вераськом сыӵе мумы-бубыослы,
капчи мылкыд но кужым соослы сӥзиськом.
Нош Софья Эльфатовнаез ми 31-тӥ куартолэзе дорамы витиськом, выпускной ӝытамы. Сюлмысь
юрттэмез понна мумы-бубыослы но шумпотон, депутатлы нош - гажан.
Любовь РУДИНА,
Кунянгуртысь нылпи садэн кивалтӥсь
Комментариев нет:
Отправить комментарий