Котырес ӝӧк: 2013 ар котырысь инкуазез утёнлы сӥземын

Ӝубис кельтэм... юанъёс

Толшорлэн пумаз редакциын инкуазез утёнлы сӥзем котырес ӝӧк ортчиз. Радъяз сое “Рассвет” газетлэн валтӥсь редакторез Наталья Калинина. Сюлэмшугъяськытӥсь юанъёсты сэрттыны-пертчыны люкаськылӥзы пӧртэм удысъёсысь ӧнерчиос но пенсионеръёс. Виктор Вахрушев, пӧйшуръёсты утёнъя управлениысь валтӥсь ӧнерчи, Олег Поздеев, “Энергия” ООО-лэн кивалтӥсез, Александр Шатунов, полиция ёзэтлэн кивалтӥсезлэн воштӥсез, Геннадий Иванов, архитектурая но инкуазез утёнъя отделысь ӧнерчи, Любовь Кривоногова, Нылпиослэн творчествозыя юртысь методист, Денис Герасимов, прокурорлэн воштӥсез, Валерий Вахрушев, “Рассветын” “Зелёная тетрадь” рубрикаез нуись, Пётр Байбородов но Маргарита Широбокова, Микрорайонысь 7-тӥ коркаысь шеге-леке вуэм арлыдоос.

Наталья Геннадьевна нырысь ик юртъер котыръёсты, ульчаосты чылкытын возён сям сярысь юанэз ӝутӥз. Ӵем гинэ адӟыны луэ, кызьы ульчаетӥ нылпиеныз мынӥсь анай я кампет бумагазэ, я чипсыослэсь чебер, чилясь пуйызэ сюрес урдсы куштыса кельтэ. Мукетъят озьы ик пинал лэсьтэ. Ваньзы тодо, пичиос мӧйыослэсь адӟем каро, урод сямъёс тужгес капчиен лякисько. Нош куштӥськыны соослэсь ой! кыӵе капчи ӧвӧл. Неужто нокин уг дышеты милемды пуш чеберлыклы?! Кызьы уг дышеты. Котырысь инкуазез утёнъя программа нылпи садъёсысен ик нуиське. Азьланьтӥське со школаосын, ваньмон дырез пайдаё ортчытон понна учреждениосын. Но малы ке, паськыт улонэ потыса, адями вунэтэ аръёсын дышетэм правилоосты, вунэтэ аслэсьтыз ик, “ӧвӧл жагтӥськоно” шуыса верам кылъёссэ. Малы со озьы луэ? Нокинлэн но огъя ваньбур понна кыл кутэмез уг поты. Аслаз азбараз чылкыт ке, умой ини шуо, кудӥзлэн корка котыраз но куяськон инты кылдытэмын луэ. Та юанлы малпанзэ Виктор Вахрушев тазьы шараяз:

- Мон 15 ар ужай дышетон удысын. Ӝот-ӝот вераны быгатӥсько: нылпи садысен но школаын 11-тӥ классозь пиналъёсын нуналысь нуналэ инкуазез утён, сое чылкытын возён сярысь вераськон мынэ. Тросэз пырисько та темаен герӟаськем ужрадъёсы. Озьы ке но, куд-огез (ваньзы ӧвӧл) со правилоосты быдэсъяны уг ик тыршы. Мынам малпамея, ульча пумъёсы яке тэле куяськон инты кылдытъясьёсты штрафен гинэ ӧвӧл кышкатъяно, со штрафъёсты тырыны косоно. Адями коньдонэн ыштонэз шӧдӥз ке, соку гинэ малпаськыны кутскоз, азьзэ-берзэ эскероз.

Полицыын ужась Александр Шатунов нош пусйиз:

- Номыр уродзэ уг адӟиськы, адӟись адями жагтӥськись куясь бускелез я тодмоез сярысь ми доры вазиськонэн вуиз ке. Сыӵе учыре гинэ ми быгатом йыртэмасез кутыны но кыӵе ке предписание лэсьтыны.

Прокурорлэн воштӥсез Денис Никифоров но соин соглаш:

- Нокинэ но уг луы кыл кутон улэ фактъёстэк кыскыны. Со понна сюлмаськыны кулэ ачиз адями. Тросэз уг дӥсьто органъёсы вазиськыны, чагиськись статус улэ шедёзы шуыса. Но солэсь кышкано ӧвӧл, котырысь инкуазь арысь аре уродме, ваньзы шокало курмем омырен, юо урод вуэз - со огъя сюлмаськон. Тани кылем ар понна прокуратураямы инкуазез утёнъя катъёсты вить тӥян учыр пусъемын. Кылсярысь, прудын чорыганы уг лэзё яке тэлез нокинлы вератэк корало. Нюлэсэн герӟаськем юанъёс котьку но золгес шугъяськыто: жаг куям сяна, писпуосты корало, бервылзэс уг утялто, озьы пӧртэм висёнъёс аляло.

Та кылъёс бере ваньзы ик соглаш луизы, йыртэмасьёсты золгес тыриськонъёсын кышкатоно.

- Тэлез ворасьёслы али воля. Нюлэсэз эскерись, чаклась лесникъёс ӧвӧл ни, мар ке но одно эскерытэк кыле. Мон малпамъя, выль тэль мерттэм интые - нош со ужлы государство лачак коньдон висъя - со коньдонэз тэлез утялтонлы мед сётысалзы. Нош выль нюлэс ачиз будэ. Азьло колхоз бусыосын, покосъёсын... Со писпуос одно ик нюлэс фондэ пырозы,- итӥськиз  вераськонэ Валерий Вахрушев, пӧйшурась, пенсионер.

Нюлэсэн герӟаськем юанъёс вань лыктэмъёслы тэк пукыны ӧз сётэ. Со бордысь ик потӥз мукет юан: кызьы уло отын пӧйшуръёс, вань-а соос но кӧня? Та юанъёсты пыр-поч усьтӥз Виктор Михайлович:

- Та вакытэ тэльёсамы бадӟым пудоос вӧлмемын: кырпарсьёс, ӟичыос, косуляос, рысьёс, луд кечъёс. Койыкъёслэн лыдзы, кылем аръёсын ӵошатыса, туэ самой трос. Но ӧвӧл векчи пӧйшур - коньыос, урдоос (бурундук), тылобурдоос ичи. Вуын улӥсьёсыз быро. Тани Якшур-Бӧдьяысь прудэз котькуд ар лэзё. Плотинаез медам нуы шуо. Нош йӧ улын пачкало чорыгъёс, вукомакъёс, бобръёс. Прудъёсты лэзьям понна азьло пукто вал, нош али йылзэ-пумзэ шедьтыны уг луы.

Та югдурлы ёрос администрациысь архитектурая ёзэтысь ӧнерчи Геннадий Иванов бӧдьяослы шумпотымон ивор вераз:

- Якшур-Бӧдьяысь пруд инкуазь ваньбуръя но сое утёнъя министерстволэн бурд улаз вазиське вал. Али со прудэз Якшур-Бӧдья муниципал кылдытэтлэн ки улаз выжтыны малпало. Соку та тыметэн кылдылӥсь юанъёсты чальгес сэрттыны-пертчыны луоз, татын но али.

Зэмзэ но, капчигес луоз. Куронъёсын, дэмланъёсын, оскем потэ, юрттэт сётон пумысен вазиськонъёсын но, шонерак Сергей Поторочин доры мыныны луоз, Якшур-Бӧдья муниципал кылдытэтлэн йырыз доры.

Котырес ӝӧкын трос мукет юанъёс ӝутэмын на вал. Калгись, куштэм  пуныосты жаляно-а, быдтоно-а? Чылкыт-а ёросамы ошмесъёсын ву? Кыӵе прудъёсын чорыганы яра, кытын - уг? Нош Микрорайонысь трос квартираем коркан улӥсь пенсионеръёс подвалазы канализациысь зын вуос пырем сярысь ӝожтӥськизы. Та югдурез “Энегия” ООО-лэн кивалтӥсез Олег Поздеев син азяз возе. Югдур кылдэм бере службазылэн ужасьёссы зын вуосты машинаосын поттӥзы. Но ву люкаське но люкаське. Мар бордын мугез - йылзэ-пумзэ шедьтыны озьы гинэ уг луы, но пенсионеръёс та юанзэс пумозяз вуттыны дасесь, прокуратурае но вазиськиллям ни.

- Ваньмыз та син азе султӥсь юанъёс,- йылпумъяса кадь вераз Валерий Вахрушев.- Ми соосты адӟиськом, выламы шӧдӥськом. Нош кӧня адскисьтэм тодметъёс? Кылсярысь, малы мушъёс быдэс уллёен чиптэм-чаптэм ышо? Чибиньёс нерад каро шуиськом ке но, соос но ичи луэмын. Нош кыӵе гинэ кӧшкемыт висёнъёс уг ваё лемтэйёс? Малы соос аляло? Мон малпамъя, ваньмыз со уродмем инкуазьлэн тодметъёсыз.

Валерий Андреевичлэн юанъёсыз пумиськонлы ӝубис кельтэм ӧс нерге луизы. Югдур котыр ласянь сэрттэмын-пертчемын, сое тупатон пумысен ӵектонъёс но сётэмын, но юан ӧвӧл пытсамын. Котырысь инкуазез утён сярысь вераськонъёс азьланьтӥськозы на. Кин ке выль сюлмаськонзэ вералоз, кинлэн ке азьло кылдэм юанъёсыз акылес люгы сямен калъяськыса улозы. Ар гинэ со понна уз окмы, оло, даур но...

Вера ВАХРУШЕВА

Туспуктэмез Николай ЯКОВЛЕВЛЭН

Кучыран Юри бӧдьяослы перформанс возьматӥз!

Тулыспаллэн кутсконаз ёрос клубамы “Ижкар” нимо творческой огазеяськон ветлbз. Кивалтbсез - Юрий Лобанов, тодмо суредась, шаермылэн кункышетэзлэн но герблэн авторез. Сьjраз лыктэмын вал Александр Пушин, аспjртэмлыко ужрадъёсы пыриськыны яратbсь адями.

Кучыран Юри (Ю.Лобанов) но Жон-Жон Сандыр (А.Пушин) возьматbзы клублэн сцена вылаз номырлы тупасьтэм перформанс амалэн мастер-класс. Этнофутуризмен герpаськем представлениез “Тjдьы юсь” группае ветлbсь артистъёсмы учкизы (кивалтbсез Татьяна Селивёрстова). Юрий Лобанов туно кариськыса, куэн золтэм бубенэн шудыса, сцена вылын xемысь валантэм суредъёс кылдытэ, пуш малпанъёссэ йjспjртэм куараен, выросъёсын возьматэ. Этнофутуризмез сцена вылэ поттbсь “Тjдьы юсь” огазеяськонэ ветлbсьёс та мастер-класслэсь асьсэлы выльзэ, тодмотэмзэ басьтbзы. Табере йыразы бергась малпанъёссэс соос эшшо но тунсыко лэсьтозы, бjдья калыкез паймытозы.

Вера ВАХРУШЕВА

40 ар ортчыса пумиськизы

Тулыспаллэн нырысетӥ кӧснуналаз вань школаосын юр-яр луылӥз, отчы лачак калык люкаськылӥз. Ваньзы соос дышетскон аръёссэс тодазы вайыны но яратоно дышетӥсьёссэс адӟыны вуылӥзы.

Кекоран школаын но со ӝытэ туж шулдыр вал. Пӧртэм аръёсы школаез йылпумъям выпускникъёс 80-лэсь ятыр вуизы. Мынам классэ та школаез 40 ар талэсь азьло йылпумъяз. Вить ар талэсь азьло 6 кузя гинэ люкаськылӥм. Туэ ваньмы ӵош 18 кузя луим. Трос кадь, но лыдъяно ке, кӧня кузя ми дышетскимы 40 ар талэсь азьло, со лыдпус ичи ай. Мон ачим “а” классын дышетски, 33 адями пала люкаське вал классамы. “Б” классын 20 котыр адями вал. Со дыре школаямы 300 пала пиналъёс ветлӥзы, али нош 130 котыр гинэ, шуо.

Кин лыктӥз та ӝытэ, нокин но ӧз жаля. Мукет классъёсысь эшъёсынымы пумиським, нош асьме параллельмы столовойын пукиз, бадӟым ӝӧк сьӧрын. Кин-мае тодаз вайылӥз. Ми, Прыч гуртысь потэмъёс, Богородскын 1-4 классъёсын дышетскеммес но поттылӥм, дышетӥсьмес Галина Дмитриевна Вахрушеваез буре вайим. Нош кекоранъёс асьсэлэсь нырысетӥ дышетӥсьсэс Лидия Макаровна Вахрушеваез сӥлы каризы. Лудорвайын улӥсь одноклассницамы Лидия Широбокова ас киыныз керттэм кышет кузьмаз, бордаз сяська керттэт но ческыт чай сётӥз. Сыӵе ик кузьым математикаен дышетӥсьмылы Людмила Ивановна Шмаковалы лэсьтӥмы. Сюлмысь ӟечкыланъёс, тау каронъёс верамы. Ӝӧк сьӧрын кырӟанъёс жильыртӥсь ошмес кадь кисьтӥськизы. Ярам, Якшур-Бӧдьяысь эшмы Лина Карпова арганэн шудӥсез Надежда Зариповаез вайиз. Солэн крезьгуръёсызъя ми эктӥм но, комсомол дырысьтымы кырӟанъёсты но тодамы вайим. Вераськонъёс пӧлын вуж Кекоран школа но син азе султӥз. Соку сюлэмъёсмы ик шымырскизы кадь. Огез эшмы озьы ик шуиз: “Выль Кекоран школа туж чебер, но борддоръёс мукетэсь”. Мӧзмонлы бен сокем ӧм сётске, шумпотон м ылкыдмы ваньзэ вормиз. Туала пиналъёс понна но шумпотӥмы, веть соослэн ваньмыз азьпалан: школазы ёросамы самой чеберез, олимпиадаосы пырисько, азьветлӥсьёс пӧлысь уг потало.

Пумиськон ӝыт одӥг шокчем вылын кадь ортчиз. Ваньмы учкем потыса ик дышетӥсьёсын но пиналъёсын дасям концерт учкимы, пионерилы - 90 но ВЛКСМ-лы 95 ар тырмонъёссылы сӥзем адӟытонэз дунъям. Люкиськыны секыт ке но, доре бертоно. Туж бадӟым тау верам потэ ӝытэз радъясьёслы. Но эшшо бадӟымгес тау - Кекоранын улӥсь эшмылы, фельдшерлы Надежда Загребиналы. Чупрес сямыныз со ваньзэс люканы тыршиз, школаын ӝӧк вылмы буш медам луы шуыса сюлмаськиз. “45 армес” пусъйыны лю.каськом шуыса кыл сётӥмы. Оскиськом, Кекоран школа ӧсъёссэ милемлы нош ик вӧл-вӧл усьтоз.

Раиса ВАХРУШЕВА.

Сюровай гурт

"Крокодил" вуылӥз Сюровае!

Сюровайысь гурт клубын 26 толшоре Якшурысь кык нылъёс “Крокодил” нимо тунсыко шудон ортчытӥзы. Якшур-Бӧдья гимназиын дышетскись Надя Аникина но Оля Вахрушева - туж мыло-кыдо нылашъёс. Сыӵе ужрадэз соос азьло ортчытъязы ни ас гуртазы.

Шудонэ пыриськизы 15 пала Якшурысь, Сюровайысь но Кунянгуртысь егитъёс. Кык команда кылдытыса ог-огенызы ӵошатскизы тросгес балл басьтон понна. “Крокодиллэн” пуштросэз вал таӵе: шудон ортче вить раундэн, котькуд командаысь огзы бере огзы ваньзы азе потазы шудӥсьёс, мугор люкетъёсынызы, выросъёсынызы, кылъёсты уже кутытэк, валэктыны выризы эшъёссылы, кыӵе кыл солы возьматӥз шудонэз нуись. Сокем ик капчи ӧвӧл вылэм ас вылад возьматыны пӧртэм пудо животъёсты, ӧнерчиосты, телесериалъёсты, тодмо адямиосты но пӧртэм мукет арбериосты. Уката секыт потӥз егитъёс понна пословицаослэсь пуштроссэс возьматон но валэктон конкурс. Туала вераськонамы, угось, туж шер кутӥськомы визьнодан кылъёсты.

Якшур команда 

Жюриын пукизы Людмила Широбокова, Якшур клубын ужась, Тамара Михайлова, Кунянгурт клублэн кивалтӥсез но Любовь Широбокова, “Шунды” огазеяськонлэн ёрос ёзэтэзлэн кивалтӥсез. Шудон йылпумъяськем бере соос котькуд командалэсь люкам баллъёссэс ялӥзы. Зол гинэ шудӥзы якшуръёс но, сюровайёс но. Виссы бадӟым ӧй вал. Даслы тросгес баллъёс люкаса, якшуръёс вормисе потӥзы. Озьы ке но, клуб ужасьёс обидэ нокинэ но ӧз кельтэ - люкаськем егитъёс понна тортэн чаен ӝӧк дасязы. Собере нош позыръяськон ортчытӥзы.

Таӵе тунсыко шудонлэн пумыз уз луы шуыса, егитъёслэн чай юон куспазы вераськонысьтызы валамон луиз. Азьланяз таӵе пумиськон Кунянгуртын ортчытоно шуыса кенешизы. Нош мылкыд ке вань - емышез одно ик луоз.

- Осто-о-о... Кызьы ай-ко сое возьматоно?.. http://vk.com/oshmes1991

Любовь ШИРОБОКОВА