Якшур-Бӧдьяын йӧскалыкъёслэн культураоссылы сӥзем “Гора самоцветов” нимо фестиваль дышетскисьёс пӧлын ортчиз

Мурт сямъёс матынгес луизы

Мукшиысь усточиос но дышетӥсьёссы
Надежда Гильманшина но Зинаида Перевощикова

Оштолэзьлэн пумаз Искусствоосъя школалэн сцена вылаз пӧртэм йӧскалыкъёслэн культураоссылы сӥзем “Гора самоцветов” фестиваль ортчиз. Куинетӥ арзэ ини радъя сое Якшур-Бӧдья шор ёзо школаысь крезьгуръя дышетӥсь  Зульфия Кудрявцева. Туэ солы туж юрттӥзы со школаысь ик дышетӥсь Татьяна Пчельникова но Селычкаысь Татьяна Демышева.

Арысь аре та фестивале пыриськыны мылкыд карисьёс тросгес луо, пиналъёс пӧртэм калыкъёслэсь историзэс, йылолъёссэс возьматыны тыршо. Сизьым представление пӧлысь куинез удмурт кылын чузъяськизы. Усьтӥзы фестивалез мукшиос. Удмурт кылъя дышетӥсь Надежда Гильманшина, Марпа апай кариськыса, пиналъёсын ӟазег ишкон сямез возьматӥз. Рома Закурдаев (7 кл.) арганэн шудӥз, нош “Эсьмаса” ансамбльысь нылъёс эктӥзы. Дасяз соосты дышетӥсь Алевтина Тарасова.

Кыкваысь “Уӵыпиос” ансамбльысь пичиос (кивалтӥсьсы Ангелина Глебова) мусо гинэ кырӟазы. Кырӟанзэс кылзон куспын залын пукисьёс Кыкваысь нылпи сад но Удмурт шаер сярысь презентация учкизы.

Удмуртъёс бере сцена вылын пӧртэм калыкъёс шулдыръяськизы. Селычкаысь пияшъёс, пӧлазы одӥг ныл но вал, грузин калыклэсь  улонзэс   возьматӥзы, ӟырдыт эктӥзы но. Дасяськыны нош юрттӥз соослы Татьяна Демышева.

Чиганъёслэн кылдэмзы сярысь тунсыко легенда веразы Якшур-Бӧдья шор ёзо школаысь пиналъёс, яркыт дэремъёсынызы сценаез тырмытӥзы, капчи мылкыд ваньзылы пыӵатӥзы.

Лынгаысь нылаш Эвелина Зарипова пыр-поч вераз бигер калык сярысь, нош Рафаэла Максимова бигер сямен кырӟаз (кивалтӥсьсы Зульфия Шакирова).

Гурт гимназиысь нылашъёс (кивалтӥсьсы Анна Хохрякова) украин калыклэсь сямъёссэ возьматӥзы, эктӥзы но украин кылын кырӟазы.

Йылпумъязы фестивалез Кекоранысь дышетскисьёс. Чипыос кадь ӵуж удмурт дӥсьёсын потӥзы сцена вылэ Нина Вахрушевалэн дышетскисьёсыз.

- Кин шаермылэн Азьмуртэз?

- Александр Волков!

- Кин суредаз элькунмылэсь гербзэ?

- Юрий Лобанов!

- Кин ветлӥз “Евровидение” конкурсэ?

- Брангуртысь песяйёс!

Таӵе юан-веранэн кутскизы пиналъёс возьматонзэс. Собере кырӟаса-мараса ик веник керттӥзы.

Та нуналэ Искусствоосъя школаын пӧртэм кылъёс чузъяськизы: ӟуч, удмурт, бигер, чиган, украин, грузин. Пиналъёс мыло-кыдо возьматӥзы быръем калыкъёслэсь сямъёссэс, йылолъёссэс, кырӟанъёссэс но эктонъёссэс. Озьы соос ӧжытлы ке но тодмотэм дуннее шедьылӥзы, мурт культураез сюлмазы пыӵатӥзы.

Вань коллективъёс фестивале пыриськемзы понна дипломъёс но фестивальлэн пусэныз пичи календарьёс басьтӥзы. Ёросысьтымы дышетскисьёслэн методикая огазеяськонъёсынызы кивалтӥсь Ольга Юскина бадӟым тау кариз пиналъёсты дасясь дышетӥсьёслы, соосты но дипломъёсын пусйиз, азьланяз но фестивале пыриськыны мылкыд сӥзиз. Нимысьтыз тау верам потэ на Зульфия Кудрявцевалы, кудӥз та ужрадэз ортчытъяны кутскиз но арысь аре выль но выль коллективъёсты бордаз кыске.

Вера ВАХРУШЕВА