“Адӟы но гожты” конкурсэ

“Адӟы но гожты” конкурсэ

Нимъёс лыкто но кошко, инты кыле

Гужем шор вадьсаз вуиз ини, нош конкурсамы пыриськыны мылкыд карисьёс али но бабо на. Куд-огез бен тулыс ик дась вал ини фотоаппарат утыны. Котькуд ӵошатсконын сыӵе кузьым уг сёто уго. Нош милям со чалмытак шкапын кылле, вормисьсэ вите.

Но вуиз, вуиз со нунал, куке конкурсамы пыриськыны мылкыд карись редакцие вуиз. Со Порвуысь клубын ужась Валентина Загребина. Гуртсы котырын лачак тунсыко нимо ошмесъёс, возьёс, нюкъёс. Соос сярысь ик гожтэ Валентина Николаевна.

Выль ошмес

Гуртамы Елесина ульча пумын нимтэм ошмес вал. Со али но вань, но кылем арысен ми сое Выль ошмес шуыса нимаськом. Елесина ульчаын улӥсьёс со ошмесэз туж утялтыса возё, нош кылем арын котырзэ воксё выльдӥзы. Поликарбонатлэсь липет шуккизы, пужыосын чеберъязы, кенеразы. Ваньзэ сое Николай Аркадьевич Широбоков но Николай Николаевич Загребин лэсьтӥзы. Нош собере, калыкен озьы кенешыса, Кекоранысь Свято-Троицкой черкысь Георгий батюшкаез ӧтизы. Отец Георгий ошмесэз вӧсяз, иконка кельтӥз. Туэ толалтэ порвуос отысь вузэ йӧвылэсултон (Крещение) уе гуртазы вайылӥзы. Веть  отын вуэз табере вӧсямын. Пусъёно на, Выль ошмесын вуэз туж ческыт но, ю но ю гинэ.

Пичияк верам потэ мукетъёсыз сярысь но. Бадӟым ошмесын азьло вуэз туж зол вия, пе, вал. Трос калык отчы лыдъяськыны ветлылэм.

Акман ошмесын, Выленыз ӵошатыса, вуэз мукет шӧмо. Азьло аръёсы Акман куинь синмысь вия вылэм, соин 3 тусь пуктэмын. Али огез гинэ синмыз ву сётэ. Таосыз ошмесъёс утялтэмын, калык отысь вузэ нуллэ.

Иванай ошм ес ас понназ вия, нош азьло отысь но трос вузэ кутылӥзы.

Чачабей нюкысь ошмес куасьмемын.

Апач ошмес но азьло бадӟым вылэм. Гуртоос отын лушкемен кумышка, пе, пӧзьтылӥзы. Нош сюанъёс дыръя егитъёс отчы выль кенэз пылатыны, пазяськыны ветлылӥллям. Али сюанчиос Акманэ ветло.

Кирпич сарай яке Сисьмем сэрег?

Бӧдьялась лыктыку Порвуэ пыронтӥын палляназ вырйыл вань. Отын али туж трос ваёбыжъёс уло, вырйыллэн луоё урдсаз соос асьсэлы гопъёс копаса, каръёс лэсьто, пи потто. Азьло дыръёсы со интыез Кирпич сарай шуо вал. Отысь поттэм горд сюйлэсь кирпич лэсьтылӥзы. Сыӵе кирпичлэсь Кекоран черк но пуктэмын, шуо. Али со интылэн нимыз воксё мукет. Порвуос трос аръёс ӵоже синйылтылӥллям: со вырйыл вадьсытӥ пилемъёс вуо ке, одно ик жаль-жаль зоре, пе. Зор-кот ваемез понна та интыез Сисьмем сэрег ниманы кутскиллям. Озьыен, котькуд интылэн нимыз кыӵе ке ужен, инкуазь явлениен, учырен яке адями нимен герӟаськемын луэ. Кин тодэ, оло, кӧня ке аръёс ортчыса, гурт котырамы выль нимъёс кылдозы, нош мукетъёсыз вунозы?

Валентина ЗАГРЕБИНА.

Порву гурт

Ас вылам мертамын: Лӧптэм мылкыд – нылпилэн кужымез

Ас вылам мертамын

Лӧптэм мылкыд – нылпилэн кужымез

Анай-атайёс котькуд ар тыршо нылпиоссэс гужем лагерьёсы интыяны. Угось, пиналъёс понна со шулдыр шутэтскон но выль тодматсконъёс. Нош малпаськоно ке, ма пыр гинэ уг ортчы нылпи, отчы вуэ ке. Ваньмыныз соин «тодматсконо» луиз нырысетӥ нуналысен ик аслым но, вожатоен ужаны интыяськи бере.

Секыт югдуре шедем нылпиосты «Шунды» огазеяськон таяз аре нырысетӥзэ люказ. Лагерной сменаез «Тулкым» нимазы. Ортчиз со Дэри ёросысь «Ёлочка» легерьын. Огшоры гинэ сыче ним удмурт сменалы ӧвӧл сётэмын вылэм. Дас нунал куспын, зэм но, зол гинэ тулкымъяськизы ваньзы: 38 кузя нылпиос но, соосын ужась ньыль вожатойёс но. Быдэс элькунысьтымы  люкам нылпиослэсь лӧптэм мылкыдзэс кобыен омыръяны луэ вал, сокем трос эмоциос басьтӥллям соос лагерьын шутэтскон куспын.

Ужазы куинь оръёс (направлениос). Театральной искусствоез нуиз Ижкарысь музыкальной колледжын дышетскись студентка Анна Пислегина, Киужъёсын вырыны Ижкарысь нылпи садлэн воспитателез Эмма Андреева дышетӥз, со ик вал сменалэн начальникез. «Журналистика» удыслэн аспӧртэмлыкъёсыныз нылпиосты тодматӥ мон - "Рассвет" газетлэн корреспондентэз. Эшшо одӥгез юрттӥсьмы вал Ирина Агеева, удмурт факультетын дышетскись студентка. Со нылпиос понна трос пӧртэм шудонъёс но ужрадъёс малпалляз, озьы ик ӟеч сиськемзы понна кыл кутӥз.

Кельшись удысэз бырйыкузы, куд-ог нылпиос шугъяськизы. Нырысетиӥ кыкеныз соос школаын кызьы но озьы выремын вал ини, нош журналистикаен тодматсконо луиз нырысетӥзэ. Пумозяз отрядъёс люкиськизы куинетӥ нуналаз гинэ. Соку ик валамон луиз, мон доры шедизы самой укылтэмъёсыз, одӥг интыязы пукыны ӵыдисьтэмъёсыз. Ӧжыт кышкай но вал, кызьы мон соосын ужало! Соос кылзӥськыны но уг быгато кадь потӥз, палэнысен учкыса. Нырысетӥ занятиын ик малпай: «Ваньдэсты одно ик киям куто». Серекъясьтэм тусо кариськыса валэктыны кутски, ма со сыӵе журналистика но газет поттон, кыӵе аспӧртэмлыкъёсыз но луонлыкъёсыз вань та удысын. Сак кылзӥськизы. Куд-огез мае ке гожтыса но кельтэм ас блокнотаз. Со азьын ваньзэсты сочинение гожтытӥ, котькудӥзлэсь гожъяськыны быгатонлыксэ мертан-ӵошатон понна. Мынам малпамея, нылпилэн ляб сочинениысьтыз но аспӧртэмлыксэ шедьтыны луэ. Озьы котькудӥзлэсь кулэ луэмзэ пусйыны тырши. Уката но шумпотыса нылпиосы кутскизы асьсэлы псевдонимъёс малпаны. Кыӵе гинэ нимъёс ӧз кылдэ соку: Ӟоз Ваня, Оки, Инвожо, СтепанНюк, NevosВан, МаксимЧи но мукетъёсыз. Кушем нимъёссы смена ӵоже зол гинэ куд-огъёсызлы лякиськиллям.

Газет поттон бордын ужакумы, котькуд ныллэн но пилэн аслаз нимысьтыз ужез вал. Редактор корреспондентъёсын ӵош малпалляз темаосты, рубрикаосты но котькуд полосаысь статьяослы инты мерталляз. Малпамзы бере корреспондентъёс утчаса ветлӥзы иворъёс, интервью басьтыны дышетскизы, нылпиослэн юанъёссылы валэктонъёс утчаны тыршизы. Уката тунсыко потӥз ваньзылы Индиысь лыктэм вожатойёсын тодматскон. Ӵапак пресс-конференция кадь ортчиз со пумиськонмы. Нылпиос соку гинэ валазы кадь, малы кулэ школаын англи кылэз дышетон. Фотографъёсмы но соку зол гинэ ужазы: котькуд нылпилэн сыӵе тунсыко но котьку пальпотӥсь адямиосын туспуксемез потӥз.

Куноос сярысь вераськоно ке, соос котькуд нунал вуылизы кадь «Тулкыме». То «Мынам Удмуртие» телеканалысь ужасьёс, то егит калыкен ужанъя министр Владимир Соловьёв, то Ижкарысь кизилиос Николай Анисимов но Алина Антонова но трос мукет ӧнерчиос. Соос понна милям нимысьтыз баммы но висъямын вал: «Куно пумитан дунне» шуыса нимазы сое нылпиос. Нимысьтыз бам люкамын вал «Тазалык дуннелы». Отчы пыризы нылпиослэн спортивной ужрадъёсы пыриськемзы но вормонъёссы сярысь статьяос. Корреспондентъёслэсь гожтэм статьяоссэс лад-лад эскерылӥз но компьютерен набирать карылӥз корректор-наборщик, собере ини, текстъёсты но фотоосты бумага вылэ поттэм бере, вёрсткая дизайнеръёс редакторен ӵош малпаськылӥзы, кытчы мае интыяны. Статьяослэсь но рубрикаослэсь нимъёссэс гожъяллязы нимысьтыз адямиос, угось котькуд пиналлэн аслаз нокытын пумиськисьтэм почеркез. Газетлы логотип но асьсэос суредазы, котькуд бамлэсь дуръёссэ чеберман понна узоръёс но малпазы. Палэнысен шумпотыса гинэ учкылӥ мон соослэн тыршыса ужамзы шоры. Ма соослэн пӧрмиз, учкыны быгатӥськоды туспуктэмъёсысь та ссылкая http://vk.com/club55392207.

Зэмзэ вераса, мон малпай вал, ужмы шоро-куспо ортчоз шуыса, вуэ куштэм кӧльылэсь кылдэм тулкым быдӟа гинэ вӧлмытскоз. Нош берпуметӥ нуналаз валамон луиз, ужмылэн емышез быдэс гуртэз яке воксё быдэс карез ик гылтыса кошкысал оло – собыдӟа энергетика потэ вал нылпиослэсь. Сокем зол эшъяськиллям вылэм соос дас нунал куспын. Нырысетӥ нуналаз ик гуртэ куриськисьёс эшшо кӧня ке нуналлы кылемзы потӥз. Ма карод, гуртлэсь мӧзмон вормиз ик. Доразы нош маке быдӟа котомка тыр лӧптэм мылкыдын но тодэ ваёнъёсын бертӥзы. Вуоно арын та смена нош ик радъямын луоз. Вуоно пумиськытозь, «тулкымъёс»!

Любовь ШИРОБОКОВА

"Арама" бамын - интыысь авторъёс: Эмма Загребина, Надежда Пономарева, Евгения Огнева

Мон - Куазьлэн нылпиез

     Тӥ инмар сяськаос, инбамысь бичаса,

Бусые тӥледдыз пазьгиллям.

Тӥ пӧлын мон будӥ,

Чебердэс тӥлесьтыд адӟыса,

Шепъёслэсь кужымзэс чакласа,

Ю тысьлэсь будэмзэ витьыса.

Мон ӧй бича сяська,

Мон ӧй быдты егит даурзэс,-

Мон ачим но чача.

Тӧл монэ вешалляз,

Жаляса, йырсиме маялляз.

Ю шепъёс будӥзы дыртыса,

Пиналлэсь малпанзэ шӧдыса,

Небыт тӧл шепъёсты ветталляз,

Пиналлэн йыр вылаз някыръяз:

“Басьты тон, нуныке, та шепез,

Тысь сётоз ни тыныд кӧт тырон”.

Тӧдьы нянь, сьӧд туриж...

Мон нянез шорисько гажаса,

Син шорам нош пуксе

Бакча сьӧр бусымы,

Сяськаос но шепъёс -

Пичилэн коркаез вал отын,

Мон отын шудылӥ

Дышетски дуннеез валаны,

Ю тысьлэсь секытсэ дунъяны,

Бен озьы ни луэ -

Мон - Куазьлэн пиналыз.

Со сюдӥз, со шунтӥз, со веттаз,

Со чылкыт вуэныз пылатъяз.

Мар шуод: мон - Куазьлэн нылпиез.

       Евгения ОГНЕВА

Школа - со...

Школа - со корабль,

Кудӥз нуэ тодон-валан зарезе,

Школа - со сюрес,

Кудӥз валтэ ӝужыт, бадӟым гурезе.

Школа - со тулкым,

Кудӥз вуттэ тонэ кулэ ярдуре,

Школа - со паськыт ыбес,

Кудӥз валтэ тонэ улонэ.

Нош дышетӥсь - со капитан,

Кудӥз кудёке азьпала адӟе,

Юрттэт кизэ тыныд мыче,

Ымнырысьтыд шугъяськемдэ лыдӟе,

Сюлэм пушкы шуныт тулкым лэзе.

Надежда ГИЛЬМАНШИНА

Возь вылын

 Турнам возь вылтӥ мынӥсько,

Куасьмись турынлы шумпотко.

Тузьлэн зыныз вӧлме омыре,

Ческыт шӧмын йыры пороме.

Турын бӧм вылын пукисько,

Шунды нош пыже но пыже.

Пӧсьлы чидатэк коттӥ кышетме.

Эх! Пельты вал та ымныре.

Ӟозъёс тэль дурын тачырто,

Жаль зорез соос но витё.

Учкай, пилемъёс люкасько,

Монэ улляны кадь выро?

Тӧлпери олокытысь вуиз,

Турынэз биньыса кадь ӝутӥз...

Чилясь куаръёс шокало,

Ӵашъёнсяськаен* шумпото.

       Надежда ПОНОМАРЁВА

*ӵашъёнсяська - фиалка

СЕРЕМЕС ВЕРОС

Эх, Яшка, мудрон кечтака 

Толон ужысь калшаса вуи. Ымам юдэс нянь донгыса вуи, оло, ӧй, йыгась­кись луиз. Шур сьӧрысь пиосмурт вылэм. Мон, пе, козёлды дуре лыктэм вал. Ачим гуртын ке но, йыры уж дурын на. Няньме кушасько но малпасько: каби­нетме ӵогай, тылзэ кысӥ, кивалтӥсь доры пырай... Кыӵе козёл? 

Нош пиосмуртэд горд помидор кадь пальпотыса шорам учке: мон солы 100 манет сётыны кулэ кадь. Нунал ӵоже нокыӵе козёлэз ӧй адӟылы. Паймы­са сылэмме адӟыса пиосмурт валаз, лэся, йыр кобыеным номыре уг валась­кы шуыса. Пальпотыса шуэ:

- Мынам козае вань, тиляд козёлды - ма отын валантэмез?

- Ӧйгес вала, - шуисько.

- Кызьы ӧд валалэ? Козёлды гуртын-а?

Козёл, козёл... Нокинэ ум возиське кадь... Оло, кык кукоез сярысь юа?­ - малпасько ас поннам.

- Ӧз на вуы,- шуисько витьымтэ кунолы.

- Кызьы ӧз на вуы?- паймиз пиосмурт.- Мынам кече гуртын ни. Ведра ву юиз но гид азбарын вӧз-вӧз кылле.

    Нош уг валасъкы. Йырам одӥг малпан: ма солы кулэ? Мынам бакчаез кись­кано, огреч октоно. Нош со кыӵе ке кеч...

- Кызьы уд валаське? Тӥляд козёлды вань-а?- норе пиосмурт. .

- Вань,- шуисько.- Нош ас поннам: огреч сылалтоно, убо уроно...

     - Нош милям козамы,- валэктыны выре пиосмурт.                                       .

- Туж умой. Ну и?- ачим малпанъёсыным бакчаетӥ поръясько.

- Ма ну и? Козаелы козёл кулэ. Ма татын валантэмез?

Но мон уг валаськы:

- Кыӵе козёл?

Пиосмуртэд киосыныз ик шонаса но мыньпотыса валэктыны выре:

- Тӥляд козёлды кулэ...

- Малы?- Оло, талы убоысь урем турынме сётыса келяно?

     Мыньпотыса шорам учкиз-учкиз но шуэ:                                                .

- Уд тодӥське малы? Тулыс, льӧмпу зын, йыр поромон... Козае бызьылыны ӧдъяз...

Ас поннам малпасько: ну.и мед. Кутске но ӵош бызьылэ.

     Нош шара вази:                  

- Козёлэ ӧз на берты.

- Ку вуоз, уд-а тодӥське?- юа но юа акылесэд.

- Уг. Со уйшор котыр гинэ гуртэ вуылэ,- нош йырысь малпанъёс уг кошко: сиён дасяно, бакчае потоно...        

- Ма ваньмыз бертӥзы кадь ин но, тӥлядэз кытчы ке киргаз-а, мар-а? Ужез трос ке, озьыен ӟеч козёлды. Ӟеч выжыысь, - сюлмаськыны ӧдъяз валантэм пиосмурт.

- Ӟеч, вылды,- а бакчаын коня уж...

- Я, мон соку витё,- азбарысь пукон вылэ интыяськиз ӝыт куное.

     Кӧня ке акыльтӥм ни кадь ог-огмылэсь. Мон-то, веранэз ик ӧвӧл. Отӥяз вераськонмы малпаськытэк, так юан-веран амалъя ортчиз ин. Со - ас паймо­наз, мон - аслам...

- Потэ ке, вите, но берозь пуконо луоды.

- А кин доры со туннэ пыраны кулэ?

- Уг тодӥськы. Кызьы пӧрмоз ин.

- Да, секыт ужез. Трос тыро, дыр?

- Ӧйтӧд, трос-а, ӧвӧл-а, но толэзьлы быдэ сюрс вае.

- Да, узыр улӥськоды.

- Конешно, узыр. Мукетъёсыз вить-куать сюрс ваё: Ми сюрсэн но узыр.  Ассэ сюдыны но уг окмы,

- Ма, кык воз турынлы окме ик, дыр? Солы трос кулэ ӧвӧл.

- Малы милемлы турын? Я, пенӟылыса бертылыкуз, гид азбарын кӧлакуз ке шат?

- Козёлды турын вылын гинэ кӧла-а, мар-а? Нош сиыны куро-а, мар-а сие? Ну, паймытӥз ке, паймытӥз. Лачмыт ӧретй кошкись вераськонмы нош ва­лантэм ӧраз пыриз.

- Козёлмы милям сӥль, колбаса, курег сие...

Пиосмурт паймеменыз йырзэ шонаны кутскиз:

- Маке йӧспӧртэм тӥляд со.

- Ма отын йӧспӧртэмез? Ужа куанеръёс мында, сиське узыръёс кадь. Табере воксё кышкатскиз ӧтьымтэ куноед:

- Козликъёсыз но сыӵеесь ик луизы ке?.

- А малы пӧртэмесь луыны кулэ?

- Нош юоназ комбикорм тыриськоды-а?- выжыятэ но выжыятэ пиосмуртэд

- Малы?- ма воксё ачид но бӧксыны кутскод ук таин.

     - Юонэз напгес медло шуыса,- номыр кариськытэк вазиз соид.              ,

- "Калашниковез" комбикормен мынам уг юы. Пыӵал лэсьтӥсед соку ул­тӥямез чидатэк, этикетка вылысьтыз пуляезлэсь зол лобатоз,- ачим но киыным шонаськыны кутски ин.

     - Кыӵе Калашников?-таид воксё паймиз.                  '

Трос тодэмме возьматыны вырыса, козёл утчасьлы валэктӥсько:

- Кыӵе, кыӵе... Пыӵал лэсьтӥсь. Мынам козёлэ пудо-живот-а, мар-а комби­кормен юыны?

Ӝыт куное интыысьтыз ик султӥз:

- Собере кин-о?

- Козёл - мынам алкаше. Зулеменыды йырме ик поромытӥды ин, нимзэ но вунэтӥ. Тӥледлы нош кыӵе козёл кулэ?

- Шуи ук, козаелы козёл кулэ. Но ньыль кукоез, боксӥсез. Яшкады кулэ... - Яшка нимоез?.. Ха-ха-ха... Ха-ха...

Вот кык шузиос-а? Час пала зулиськом, нош ог-огмес ум валаське. Ма таид сураськыса дорамы пырем ук.

- Ха-ха-ха...

Пиосмурт коза кадь номырзэ валатэк шорам учке.

- Яшка нимоез ке, тӥледлы артысь юртэ пыроно. Отын Яшка козёл улэ.

Ха-ха-ха...

Пиосмуртэд но мазэ-созэ валаса, бордам итӥськиз:

- Ха-ха-ха...

Эмма ЗАГРЕБИНА

Чошкытысь Ольга ЛЕБЕДЕВА нырысетӥ кылбур бичетсэ поттэ

Лулпуш сиос кырӟало

 Кылбурет удыс - со мур дунне, кытчы котькудӥз пырыны уг дӥсьты. Уг дӥсьты усьтыны малпанъёссэ, уг дӥсьты шара вераны мылкыдъёссэ...

Ёросамы кылбурчиос сокем трос ӧвӧл ке но, соос вань. Кудъёсызлэн сюлэм чуръёссы газетамы но потыло, книгаослы но пӧрмыло. Нимаз бичетэн потыны тросэз авторъёс уг дӥсьто, луонлык но уг кылды. Алигес, нош ик Интернет вотэсын утчаськыкум, ивор шедьтӥ, Ӵошкыт гуртысь Оля Лебедева кылбур бичетсэ поттэ шуыса.

Оля тросгес ӟуч кылбуръёс гожъя, но удмурт выжыосыз удмуртсэ но куро, лэся. “Ошмес” газетамы  кылбуръёссэ ми азьлогес печатлаллямы ни вал. “Лирика души” нимаз со нырысетӥ бичетсэ. Отчы пыризы куинь удмурт кылбурез но. Бичетэз усьтӥсь “Хочу сказать я Вам спасибо...” кылбурзэ нош Оля нырысетӥ юрттӥсезлы сӥзе, Ӵошкыт школаысь пичи классъёсты дышетӥсьлы Наталья Морозовалы. Нылаш трос возьматэ яратон, школа, семья но Быдӟым ож сярысь малпанъёссэ. Кыске Оляез инсьӧр но (космос).

Нырысетӥ вамыш лэсьтэмын. Лулпуш сиосыз кырӟало бере, мед чебер гурлы пӧрмозы. Оля Лебедевалэн нимыз элькунамы но мед кылӥськоз, нош гуртаз ваньзы тодо, кыӵе со тыршись, пуктэм малпанъёссэ быдэсъясь нылаш.

Тон но мон, но ми тонэн,
Тон но мон, но ми тонэн…
Эшъёсын та дуннеын

Улыны умой ӵошен.
Огнамы нош ми улӥмы ке, 
Сюрес пичи пырыослы
Пилиськысал, дыр, шаермы!

Тон но мон, но ми тонэн…

Яратон  тон понна (кырӟан).
1)Кылъёс йырын сураськыло:
Ӵошен яке огнам луо?
Пӧрмоз меда ярытыны,
Тынад гинэ сюлмад улыны?
2) Мынам потэ шумпотыса,
Тонэ гинэ адӟылыса,
Вӧзад тонэн весяк улны,
«Яратӥсько,» - шыпыртыны.

Припев:
Шунды пиштэ 
Тынад сюлмад но,
Толэзь югдэ тынад синмад,
Азвесь гинэ тынад куара но…
Зарни пие, яратон тон понна.
Азвесь гинэ тынад куара но…
Зарни нылэ, яратон тон понна.
3) Тон вань, быдэс шаер
Сыӵе умой, яркыт, чебер!
Киме кияд ке кутӥськод,
Гордэктӥсько, тон чупаськод…
4) Озьы ветлом таяз ӝытэ.
Тыныд яраз? Мон мукетсэ
Бадӟым сяська керттэт окто,
Пыдес вылам султо, шуо:
Припев

Улон
«Мар сыӵе улон?» –
Юай песятайлэсь.
«Улон – со шумпотон:
Эн кыль тон крезьгурлэсь.»
Нош малы песятай 
Крезьгур сярысь вераз?
Али гинэ валай:
Крезьгур – улон аслаз.
Улон – со герӟаськон,
Улон – со бубыли.
Улон – со кылбурчи,
Улон – со яратон.