Кытын ужалозы Якшур-Бӧдьяысь быдэ вуымтэос?

ИВОР КУДЫ

Уж утчасьёслы уж

Быдэ вуымтэосты уже интыянъя программая туэ милемлы гужем ӵоже 210 адямиез тэк пукемлэсь “мозмытоно”. Витез школьникъёсмы оштолэзьлэн пумаз ик ужаны кутскизы. Тулыс праздникъёс азьын соос райцентрын калык люкаськон интыосты утялтӥзы, потазы урокъёссы бырем бере.

Толло нуналысен быдэс ёросысьтымы 80 пала пиналъёс школаосазы яке гурт клуб котыръёсазы ужаны потӥзы. Тани Вуж Ӟатча школаысь но школа-интернатысь быдэ вуымтэос школазы но пужым кедръёссы котырын утялскозы. Кекоран школаысь дышетскисьёс туристической тропазэс выльдозы, сяська мерттозы.

Ужалозы нылпиос гурт клубъёслэн (СИКЦ-лэн) дасям программаоссыя но. Тани Варавайын соос “Ветеран” юртын пичияк ремонт лэсьтозы. Вуж Ӟатчаын - выль черксы котырын утялскозы, Сюровайын - ожын бырем солдатъёслы сӥзем обелискез чылкытатозы, клуб котырез чебертозы.

Со сяна Якшур-Бӧдьяысь куд-ог дышетскисьёс нылпи садын, райпоын, “Строитель-2” ООО-ын ужалозы. Озьы ик Фрунзе нимо возёсын, Чурысь, Кекоранысь но Мукшиысь лесничествоосын.

Уже интыяськомы трос нылпиё но секыт югдуре шедем семьяосысь нылпиосты. Уждун басьтыны мылкыд карисьёс трос, но, жаляса верано, гурт возёсъёс но организациос уг дырто пиналъёсты уже кутыны. Со пумысен бен ми сюлмаськом ай.

Людмила КАЛАБИНА,

ЦЗН-ысь валтӥсь ӧнерчи

Вуж Ӟатчаысь школаез 13 кузя пиналъёс йылпумъязы

Берпуметӥ чингыли

Улонэ йыг-йыг вамыштозы

Вуж Ӟатча (Тыло) школаысь туэ потэм 11-тӥ класс гуртсы понна туж яркыт но данъяськымон луиз. Школаез йылпумъяса, та 13 нылъёс но пиос шаеретӥмы пазьгиськозы, асьсэлы улон сюрес лёгозы.

Класслэн кивалтӥсез Галина Опарина туж оске, котькуд дышетскисез аслэсьтыз быгатонлыкъёссэ эшшо но паськыт усьтоз, соосты улонын кутыны быгатоз. Тани кык нылашъёслэн дышетскон сюресъёссэс ми кӧня ке ар ӵоже син азямы возимы. Юля Лукина но Алёна Фёдорова классазы азьветлӥсьын улӥзы. Олимпиада, ӵошатскон, викторина - та ужрадъёсысь соос ӧз бырылэ. Ёросын но элькунын гинэ ӧз вормылэ, кыкназы ик Москвае вуылӥзы. Юля шаертодонъя Росси олимпиадаын 3-тӥ инты басьтӥз, азьланьын дышетсконзэ та удысэн ик, оло, герӟалоз. Нош Алёна биологияя ӵошатсконын 2-тӥ луиз, сое али ик витё ини Москваын Тимирязев нимо академиын. Но Алёналэн эмудысын ужамез потэ, нылашлы со туж сюлмызъя.

Таӵе чупрес нылъёслэсь ӵош дышетскись эшъёссы бере кыльыны ӧз тырше. Кытын-отын азьпалтылӥзы но. Тани Саша Дьяконов но Рита Липатова спортъя ӵошатсконъёсысь ӧз бырылэ, школазылэсь но муниципал кылдытэтсылэсь данзэс утьылӥзы, капчи атлетикаын но куас вылын бызьылыса. Андрей Загребин нош ёросмылэн волейболъя сборной командаяз шудылӥз. Света Эсенкулова технологияя олимпиадаосын призёрын но вормисьын улӥз.

Огъя вераса, та класс тэк ӧз пукы, “Юность” огазеяськонлэн вань ужрадъёсаз пыриськылыны тыршиз. Люкам баллъёссыя вужӟатчаос туэ ёросамы II луизы. Котькуд вормон возьматэ азе пуктэм ужпумез нуналысь нуналэ быдэстыны тыршемез. Азьланяз но та пиналъёс, табере егитъёс шуыны луоз ни, малпам ужъёссэс пумозяз мед вуттылозы. Берпуметӥ чингыли жингыртӥз, соослы шуд сӥзьыса. Паськыт улонэ вамыштыса, быдэ вуымтэос быдэ вуизы.

Ника ЮМИНА

Якшур-Бӧдьяысь "Удмурт Кенеш" удмурт группа усьтон сярысь вераськиз

“Удмурт кенеш”

“Усьтоно удмурт кылэз дышетонъя группа. 

Со вакытлэн куронэз”

Куартолэзьлэн шораз ёросысьтымы “Удмурт Кенешлэн” паськытатэм кенешез ортчиз. Люкаськылӥзы правленилэн ёзчиосыз но гурт кенешъёсысь азьло но выль тӧроосыз.

Арлэн кутсконаз Пичи кенешлэн ёзчиосыз ваньзы соглаш луизы вал: улӟытоно гурт кенешъёсты. Гуртын нуиськись уж понна кылкутӥсь шедиз ке, соку “Удмурт Кенеш” сярысь ӵемгес кылозы, куашкам мылкыдын улӥсьёс, ваньзы ик ӧз ке но, улӟозы, егитъёсызгес бурдъяськозы. Соин та юан ӝутэмын вал котькуд ёрос кенешын, озьы ик милям но. “Удмурт Кенешлэн” юрттӥсьёсыз азьло но вал, али но луо дышетӥсьёс но лулчеберет удысын ужасьёс. Гурт кенешъёслэсь ёзчиоссэ гожъяны куронэн Куд-огеныз вераськыны пӧрмиз райцентрын ортчем ужрадъёсын, куд-огез ужантӥям, редакцие пыразы. Списокъёссэс дасяны нырысь ик дыртӥзы кекоранъёс, мукшиос, порвуос но селычкаос. Оскисько, мукетъёсыз но со ужез пумозяз вуттозы.

Озьы ик вераськон мынӥз “Удмурт Кенешлэн” Данъян книгаяз ёросысьтымы азьветлӥсьёсты пыртон сярысь. Али отчы куинь якшурбӧдьяос пыртэмын: Валентина Широбокова, Надежда Гильманшина но Римма Шкляева. Туэ вераськимы Валентина Ивановалэсь, Людмила Обуховалэсь, Ольга Лукиналэсь нимъёссэс дэмланы.

Котькуд куартолэзе гимназиысь но Якшур-Бӧдья шор ёзо школаысь пиналъёсын “Тодматскиськом удмурт кылын” ужрад ортчытӥськом. Туэ со пумиськонэз радъяны тупаз Наталья Байкузиналы но Татьяна Загребиналы. Темаез удмурт дӥсьлы сӥземын луоз.

Валтӥсь юанъёсты эскерем бере, правленилэн ёзчиосыз асьсэлэсь ӵектонъёссэс но веразы. Якшурысь Нина Широбокова дэмлаз синтэмъёслы но ляб адӟисьёслы школа-интернатысь удмурт пиналъёс доры ветлыны, улон-вылонзы, мылкыдзы сярысь вераськыны, газетын соосты нимысьтыз возьматыны. Одно ик ветло шуыса кыл кутӥм.

Ӵошкыт школаысь дышетӥсь Людмила Обухова “Удмурт Кенешлэн” нимыныз элькун Гербере мыноно делегацие ёзчимес но ӵектыны куриз. Таиныз тожо соглаш луимы. Гурт удысъя управлениысь ӧнерчи Елена Поздеева та юанэз одно ик лыдэ басьтом шуиз. Людмила Геннадьевна эшшо одӥг тунсыко дэмлан сётӥз: Школьный посёлокын выль нылпи  сад пуктон сярысь вераськизы ини, али ик малпасько вылэм отын удмурт кылэз дышетонъя группа усьтыны. “Со вакытлэн куронэз”,- пусйиз дышетӥсь. Зэмзэ но, та юанэз пуктоно кивалтӥсьёс азе но, вераськоно мумы-бубыосын но. Та дыре “Вконтакте” вотэс бамын “Якшур-Бӧдья” группаын “Гожтысалды-а тӥ пиналдэс удмурт кылэз дышетӥсь группае?” юанэн опрос ортче. Йылпумъянъёссэ одно газетын печатлалом.

Ӧм вунэтэ ми Ашальчи Оки нимо премиен данъям Валя апаймес (Валентина Широбоковаез) эшшо огпол ӟечкыланы. Ас ёросаз кылэм шуныт кылъёс но тодаз мед кылёзы шуыса тыршимы.

Нош люкиськон азьын пӧртэм гуртъёсысь люкаськем ёзчиосмылы гуртэ уж сётӥмы. Удмурт кылын экоплакатъёсты клубазы, школаязы яке магазин котыразы лякылыны. Котырысь инкуазез утён сярысь удмурт кылын гожтэм ӧтёнъёс пиналъёсты, оло, золгес малпаськытозы. Нош дасяз со плакатъёсты Ижкарысь “Ваньмон дыр” группа, кудаз пыре милемлы тодмо Алексей Шкляев.

Йылпумъяса, шумпотэммес верам потэ на. Вуоно дышетскон аре гимназиын удмурт класс люкаськоз-а, уз-а, юан уг сылы ни: Якшурысь но Выжоысь мумы-бубыос ог дасо нылпиоссэс отчы гожтӥзы ни. 31-тӥ куартолэзь бере (соку пиналъёс нылпи  садэнызы люкиськизы) визьпогъёс школае мыныны дасясько ини. Удмурт кылзэс яратыны мылкыд но вольыт сюрес соослы сӥзиськом.

Вера ВАХРУШЕВА,

Якшур-Бӧдья ёросысь “Удмурт Кенешлэн” йырыз

Селычкаын песянайлэсь нуналзэ пусйизы

ПЕСЯНАЙЛЭН НУНАЛЫЗ

Шуныт кусыпъёс  - улонмылэн инъетэз

Туэ элькунамы нырысьсэ песянайлэсь нуналзэ пусйимы. 26-тӥ куартолэзь табере соослэн нуналэнызы ялэмын. Нош ми, селычкаос, песянайёслы сӥзем праздникмес 17–тӥ куартолэзе школаямы ортчытӥмы. Та ужрадмы пумысен серем пыр верасез но вал, асьмеос вань дуннелэн азьпалаз мынӥськом шуыса. Брангурт песянайёс гинэ но ми бере сое пусйизы уго.

Шулдыръяськон ӝытэз ортчытонлэн мугез но туж пусйымон вал. «Старушки-веселушки» ансамбльмы кылдэм дырысен туэ 15 ар тырмиз. Дас ар ӵоже соос юртто ини школае ветлӥсь пиналъёсты удмурт йылолъёсын но сямъёсын тодматыны.  Соин ик арлыдоосмес ми одно люканы малпамы. Концерт дасяз гурт калык, вань быгатӥсьёсыз: пичиез но, мӧйыэз но. Школаямы со нуналэ 40 пала арлыдоосмы люкаськизы, пӧлазы дасо пала пиосмуртъёс вал. Эшъёссэс ӟечкыланы вуылӥз Якшур-Бӧдьяысь «Россияне» ансамбль но. Арлыдоосмылы тау карыны ветл?з муниципал кылдытэтмылэн йырыз Дмитрий Лебедев.

Трос шуныт кылъёс кылӥзы та ӝытэ песянайёсмы. Шумпотыса, синкылиоссы ик потылӥзы. Ваньмы ӵош люкаськыса, яратоно эшъёсмылы пичияк кузьым но дасямы: котькудӥзлы Таукарон но чай юон кружкаос сётӥмы. Таукаронэ таӵе кылъёс гожтӥмы: бадӟым тау школалэн но гуртлэн улоназ пыриськемдылы, ӟуч но удмурт сямъёсты, кырӟанъёсты яратэмдылы, - бордазы туспуктэмзэс но пуктӥмы.

Бер ӝытозь шулдыръяськимы ми огинэ кариськыса, кырӟаса но эктыса. Трос шулдыр крезьгуръёсын шумпоттӥз арганчимы Татьяна Демышева.

Школаын та песянайёсмес пиналъёс но туж шумпотыса котьку пумитало, соосын ӵош мылысь-кыдысь котькыӵе ужрадэ пырисько. Нылпиосты утялтыны шуыса котькуд празднике пересьёсмы лачак пӧрам сиёнъёс ӝӧк выл тыр дасяло. Тарад но вань лыктэм гурт калыкез соос ик сюдӥзы.  

Малпасько, таӵе пумиськонъёс одно ик ортчытъяно. Соос туж юртто быдэ вуымтэослы но арлыдоослы огкыл шедьтыны, шуныт кусыпъёслы, ог-огдэ яратонлы дышето.

Эшшо огзэ йылтэм потэ на.  Интернет вотэсын милям коллективмы «Пукон корка» нимын пусъемын. Туэ ми пыриськылӥм  Эстониялы ӵыжы-выжы луись калыкъёс куспын ялэм «Дунне писпу» конкурсэ. Вормисьёс пӧлы ӧм ке но шеде, туж шумпотӥськом ёросысьтымы этнофутуризмъя «Тӧдьы юсь» огазеяськон  понна. Соосын данъяськеммес вераммы потэ. Ӟечкыласьком вормонэнызы, азьланяз быгатонлык но паськыт сюресъёс сӥзиськом!  Ми но асьме гуртамы мытэм ужъёсмес одно ик азинтом.

Любовь НИКОЛАЕВА

"Тодматскиськом удмурт кылын" куинетизэ ортчиз Якшур-Бӧдьяын

Пумиськон

Шортдэрем, чуглэс но кутъёс

Берпуметӥ чингылиос жингыртон азьын ёросысь “Удмурт кенеш” но Якшур-Бӧдьяысь шор ёзо школаысь но гимназиысь дышетӥсьёс нош ик “Тодматскиськом удмурт кылын” пумиськон ортчытӥзы. Шор ёзо школаысь Татьяна Загребина 3 классэ вайиз, гимназиысь Наталья Байкузина 4 классэн вуиз.

Ужрадлэн шӧмыз гинэ ӧвӧл, тусыз но удмурт мед луоз шуыса, нылъёс ас киосынызы йыр чеберъянъёс лэсьтӥзы, куд-огез пиос нош дэремъёс дӥсязы. Тупатскыса лыктӥзы дышетӥсьёс но. Татьяна Николаевна лымшор пал тусъем шортдэремзэ дӥсям, нош Наталья Артемьевна Кибашлыослэн юртысьтызы туала удмурт шӧмо дӥсь курем. Туэ пумиськонлэсь темазэ вашкала дӥсьлы сӥзьыны вераськемын вал бере, со сярысь пыр-поч валэктыны тодӥсь адямиосты ӧтимы. Кибашлыослы юртысь ӧнерчиез Ольга Перевощиковаез но ёрос музейысь ужасез Любовь Пасынковаез. Любовь Аркадьевна ик кутскиз ужрадэз. Сьӧраз ваем экспонатъёсыз вылын - вашкала улдэрем, шортдэрем, азькышет, муресазь (нагрудник), коньдоно весь, йыркышет, куинь сэрего кышет, укотуг (налобная повязка), чуглэс (чулки) но кутъёс - музейысь ӧнерчи пыр-поч вераз, кызьы нимаське котькудӥз арбери. Возьматӥз, кызьы дӥсяно соосты. Пиналъёс, сак кылзыса, Любовь Аркадьевна сьӧры вань выль кылъёсты шара вераллязы. Тужгес паймымон потӥз нылпиослы, кызьы дӥсяло вал удмуртъёс шортдэремез. Таӵе тунсыко амалэз котькудӥз уг тоды ни, кыл вылын но сое валектыны секыт. Нош музее лыктӥды ке, отын одно возьматозы.

Таӵе йырвизь сётӥсь вераськон бере пиналъёс эшшо огпол вань арбериослэсь нимъёссэс тодазы вайизы. Но... котькуд “дышетскем” бере йырез тӧлатэм потэ. Таиз сярысь сюлмаськизы ини дышетӥсьёс. Наталья Артемьевна кыксэ ик классэз комнадаосы султытӥз но “Кин азьло вуоз?” ӵошатскон ортчытӥз. Дышетӥсь дӥсь нимез вера, нош пиналъёс арбериосын коробка дорозь бызьыса, отысь кулэзэ берлань ваё. Куд-огез пӧлысьтызы шугъяськизы ке но, пумаз ӵош ик вуизы. Бере ӧз кыльы Татьяна Николаевна но. Со “Каляга басьтод-а?” шудон ортчытӥз. Таяз но нылпиос ӝог бызьылыны быгатэмзэс возьматӥзы. Мукет шудонъёсын но дышетскисьёс шудӥзы. Ужрадэз шулдыргес кариз, баянэныз удмурт гуръёсты кисьтӥз ёрос клубысь аккомпаниатор Алевтина Широбокова. Молодец, тожо удмурт дэремен лыктэм ай со!

Ӵошатскыса бызьылонъёс дыръя кӧня ке нылъёс мукет уж лэсьтӥзы. Наталья Артемьевна соосты удмурт раскраскаосты буяны куриз. Зол тыршизы нылъёс. Нош Кибашлыослэн юртысьтызы ӧнерчи Ольга Перевощикова со суредъёсты туссыя дунъяз. Нылъёс пӧртэм буёлъёсты кутӥллям: горд, ӵуж, вож, лыз но мукет. “Таӵе турлы буёлъёсты куто лымшор палась удмуртъёс, нош ми но уйпалъёс тросгес куто тӧдьы, горд но сьӧд тусооссэ”,- валэктӥз пиналъёслы кибашлы нылкышно.

Йылпумъяськиз пумиськон кузьымъёсын. Кутэм сямъя, пиналъёс ог-огзылы синпельёс дасязы. Гимназиос ӵуж-ӵуж италмасъёс лэсьтӥллям, нош шор ёзо школаысь нылпиос выль эшъёссылы суредъёс кузьмазы. Мыло-кыдо ужамзы понна “Удмурт кенешысь” Таукаронъёссэ басьтӥзы дышетӥсьёс но ӧнерчиос. Нош пиналъёсты та пӧсь шундыё нуналэ кынтэмен (мороженоен) шумпоттӥмы.

Таиз пумиськон эшшо но удмурт шӧмо пӧрмиз. Тани гимназиысь кык пияшъёслэн  удмурт дэремъёссы асьсэлэн вылэм. Со сярысь мумы-бубыоссы сюлмаськиллям. Озьыен, дэремъёсты дӥсяны муг шеде ке, тыршемзы токма ӧвӧл. Та пумиськонъёсмылэн но пайдазы бадӟым.

Вера ВАХРУШЕВА

"Эль ныл" фестивале якшурбӧдьяос но ветлӥзы, дунъязы

Сцена вылын - модалиос

Берпуметӥ дыре валамон луэ, туала удмурт мода интыяз сылыны уг ӵыды. Со сярысь

нырысь ик вера Дарали Лелилэн кылем арын «Mademoiselle Oudmourte» модельной

агентство усьтэмез. Удмуртиысь дизайнеръёслэн вашкала калык дӥськут люкетъёсты улӟытон 

мылкыдзы но ӵемгес шӧдӥське ни. Ма веранэз, тросаз удмурт пумиськонъёсын

туала шӧмын вурем шортдэремъёсын ветлӥсь адямиосты адӟыны луэ.

Одӥгаз ужрадын нош туала вурем дӥськутъёсын ветлӥсь калык маке мында люкаськемын вал. 30-тӥ оштолэзе Удмурт кун филармониын ортчиз модалы сӥзем «Эль ныл» фестиваль. Ужрадлэн валтӥсь малпанэз – удмурт модэлез быръён.

Таӵе ужрад сярысь малпанъёссэ Дарали Лели кемалась йыраз возьылӥз ни. Пӧртэм шуг-секытъёсын пумиськоно луиз ке но, берлань ӧз чигна. Озьы со пичи дыръяз ик малпам «выжыкылзэ» туала улонэ пычатыны тыршиз. «Модель» кылэз но удмурт кылэ берыктэмын со понна. Табере модельной агентствое ветлӥсь нылъёслы «модали» шуыса вазиськыло. Даралилэн верамезъя, модалиосмы дунне стандартъёслы уггес тупало на шуыса: «Ӝуждалаенызы куинез-ньылез гинэ ушъяськыны быгатозы. Чебер ветлэменызы –ӝыныез. Туспуксьыны но огез-кыкез гинэ зэмзэ пӧрмыто. Озьы ке но, ар куспын люкам быгатонлыкъёсмес одӥг ужрадын усьтоно кариськимы».*

Зэм но, нылъёслы дунне стандартъёс дорозь будоно но будоно на. Мукет ласянь малпаськоно ке, оло, соослы со воксё кулэ но ӧвӧл. Сцена вылын ветлыны быгатонлык куд-ог дыръя гинэ кулэ луылэ. Но куке асьме мусо нылашъёсмы лек тусо ымныръёсын кутскизы потаны (медам вожзэс вае), соиз ини воксё шӧтэм, даже серем адӟиське вал. Оло, дизайнеръёслэн сыӵе юри малпанзы вал…

Мукет ласянь учконо ке, тросэз вурем дӥсьёссы калык пӧлы потамонэсь. Котьма мед вералозы, асьме удмурт нылашъёсмы, ульчаостӥ чебер дӥсяськыса ветлыкузы, мыняса ветло. Вылӥ модалэн куронъёсыз вань ке но, ӧжыт аслэсьтыд йӧспӧртэм луыны быгатонлыктэ ыштӥд ке, «пластмассовой» мунёлы укшаны кутскод ук. Озьыен, вань оскон, асьме модалиосмы ас йӧспӧртэмлыксэс уз ыштэ шуыса. Филармониын ортчем ужрад йылпумъяськиз нылъёсты ӟечкыланъёсын. Вормисе потӥз Можгаысь 24 аресъем Ирина Игнатьева

Фестивале ветлэм бере бугырскем мылкыдзэ усьтӥз Селычка школаысь ӟуч кылъя дышетӥсь Любовь Николаева:

- Удмуртиысь  дизайнеръёс  возь-

матӥзы пӧртэм пумо туала амалъёсын лэсьтэм дӥсьёссэс. Паймытӥзы егит дизайнеръёс. Огъя 19 пӧртэм коллекция возьматэмын вал. Кыӵе гинэ пӧртэм яркыт удмурт сямен лэсьтэм ужъёссы ӧй вал отын! Дэремысен дукесозь. Дӥсьёс вурэмын пӧртэм арлыдо адямиослы. Тужгес но трос егитъёслы. Учкисьёсыз но егитъёсгес вал. Берпуметӥ дыръёсы удмурт шӧм котькытын адске, тани модае со вуэмын. Кызьы уд шумпоты? Та ужпумез ӝутӥз Дарали Лели, элькунысьтымы тодмо егит удмурт журналистка. Со усьтӥз модая агентство. Малы ке нош удмурт сямен ӧвӧл нималлям. Лэсьтэм ужъёссэс, дӥськутэз но чеберлык котыръёссэс басьтыны луиз отын ик. Ачим но басьтӥ чыртывесь но сумка. Абдратӥзы егит кырӟасьёс но. Трос выль нимъёс кылыны луиз, тужгес но паймытӥз чебер, зол куараеныз Кристина Ярская. Малпасько, та ужрад асьмелэн азьланьскоз, удмурт шӧм мургес пыроз удмурт дӥськутэ.

Озьы ик вуылӥз ужрадэ Наталья Нефёдова, Якшур-Бӧдья спортшколаысь тренер:

- «Эль ныл» фестивальын мыным котьмаиз яраз. Модельёслэн сцена вылын быгатонлыкъёссэс возьматонзы но, фойеын адӟытон-вузаськон но. Уката но сюлмы бугыръяськыны кутскиз, куке сцена вылэ потӥзы «Эктон коркаос». Соосын ӵош эктэм ик потыны кутске. Синмаськи фестивалез радъясезлы, йӧно удмурт нылашлы – Дарали Лелилы. Азьланяз но солэн ваньмыз мед пӧрмоз.

Берпуметӥ кылъёс борды итӥськыса, ваньзэ умойзэ гинэ сӥзем потэ. Зэм но, таӵе кутскем ужлэн мед луысал пайдаё азинсконэз.

Любовь ШИРОБОКОВА

Якшур-Бӧдьяысь Юля Загребина мунёезлы удмурт дӥсь вуриз

Мунёлы удмурт дэрем вурисько ачим

Туэ тулыс гимназиын витетӥзэ ини 1-4 классъёс пӧлын

презентациен проектъёслы ӵошатскон ортчиз. 

Туэ со “Планета открытий” нимаськиз.

Та ужрадын пиналъёсдокладъёссэс лыдӟо, бордаз презентация возьмато. Арысь ареужрадэ пыриськисьёслэн лыдзы будэ, 

туэ соос кызё пала вал.

Нырысь ик докладъёсты лыдӟон классъёс пушкын ортче, тужгес умойёссэ ужъёсты школаын лыдӟо, собере ёросын. Озьы котькуд дышетскись тодосчи луыны дышетске, шуо визьнодасьёс. Докладъёс-презентациос пӧртэм темаослы сӥземын луо: “Нырысетӥ книгалэн кылдэмез”, “Малы кулэ писпуос?”, “Кызьы ӝӧк вылэ нянь вуэ?”, “Кызьы лэсьтоно юбер уморто?”, “Кока-колаез юыны яра-а?”, “Ма фольгалэсь лэсьтыны луэ?” но трос мукетъёсызлы.

- Котькудӥз тема туж тунсыко,- шуиз Вера Михайловна Караваева, жюрилэн тӧроез, начальной школалэн кивалтӥсез. Туэ таӵе докладъёс тужгес умоен пусъемын вал:

1 классъёс пӧлын - “Кызьы переменаосты пайдаёгес ортчытъяно?”, 1-тӥ Б классысь групповой уж;

2 классъёс - “Курмем вуэн будосъёсты киськаны яра-а?”, авторез - Кирилл Пушин;

3 классъёс - “Семьялэн гербез”, дасяз Дмитрий Медведев;

4 классъёс - “Кызьы ӵашетон тазалыкез быдтэ?”, авторез Юлия Зорина.

Таиныз ужен гимназия ёросын ортчись презентацие потаз, отын но та уж I инты басьтӥз.

Нош милям син шорамы 1А классысь Юля Загребиналэн “Мунёлы - удмурт дэрем” проектэз етӥз. Солэн кылдэмез сярысь кӧня ке юалляським анаезлэсь, Светлана Васильевналэсь:

- Проекттэс ма бордысен дасяны кутскиды?

- Юлялэн дышетӥсез Ирина Леонидовна Назарова дышетскон ар кутскыку ик вераз вал, презентациялы дасяськоно шуыса. Тема но ачиз ик сётӥз. Нылы удмурт классын дышетске бере, удмурт культуралы но историлы пичияк сэрег лэсьтоно, пе, вылэм. Отчы удмурт вашкала дӥськутэн мунёосты пуктоно, пе.

Номыр но секытэз ӧвӧл кадь но, удмурт костюм вурыны капчи ик ӧвӧл вылэм: дӥсез суредано, басма утчано, вуроно но чеберъяно. Кема лэсьтыны вырим.

Утчаським книгаосысь, журналъёсысь, Интернетысь. Вашкала Бӧдья дӥськут сярысь музейын, Кибашлыослэн юртазы ужасьёсын вераським. Ми палан кышномурт дӥсь тӧдьы етӥн басмалэсь вуриське вылэм, сэзулъёссэ, саесъёссэ шалэн* чеберъяллязы. Валентина Николаевна Широбоковалэсь  (солэн кемалась ик ӧвӧл Якшур сярысь книгаез потӥз) юалляським, со но трос тунсыкозэ вераз.

Шаркан но Якшур-Бӧдья ёросъёсын кышномуртъёс азьло одӥг выллем дэремъёс нуллӥллям, шуо тодосчиос. Соин ми ӵужапаймылэн нэнэезлэсь нуллэм шало но кильымо шортдэремзэ шыкысысьтыз поттӥм, со вылысь эскизъёс но выкройкаос дасям, собере вурим. Музейысь, Кибашлыослы юртысь адӟыса, Валентина Николаевналэн верамезъя чеберъяны тыршим. Пыдаз кут но шедьтӥм, етэ.

Лэсьтэм ужмес пиналъёслы валамон лыдӟыны кылъёсты Ирина Леонидовна шедьтыны юрттӥз. “Изь, изь, нуные” кырӟанэн кутскиз презентациямы. Собере вить минут ӵоже Юля вераз, кызьы ми мунё лэсьтӥмы но мае выльзэ тодӥмы. Азьланяз нылылы но удмурт дэрем вуреммы потэ на, мед адӟозы, ми кыл вылын гинэ ум ужаське.

Мунёлы удмурт дӥсь кызьы вуремез сярысь докладзэ Юляез мукет классъёс азьын но лыдӟыны куриллям на. Нырысетӥ лэсьтэм вамышсы, озьыен, пайдаё но тунсыко луиз. Нырысь мамаезлэн юрттэменыз, собере аслаз тыршеменыз Юля одно ик ассэ возьматоз на.

Вера ВАХРУШЕВА

Собере вуримы

*шал - оторочка, подол

Нырысь суредамы

Пӧрмиз таӵе мунё

Вашкала шортдэрем