Туала
дышетон амалъёс но вашкала сямъёс
биологияя дас куать дышетӥсьёс, пӧлазы дышетонъя управленилэн кивалтӥсьсы Надежда Соколова
но вал, “География но биология урокъёсын туала технологиосты кутон” семинаре
пыриськизы, Якшур-Бӧдья ёросысь вашкала калык сямъёсын тодматскизы.
Кылем арын асьме дышетӥсьёсмы Каракулиное ветлӥзы ини. Отын соосты умой пумиталлям, Кам
шур вылэ нуллӥллям, Удмурт шаерлэсь самой лымшор интызэ возьматӥллям. Сыӵе тунсыко ветлэм бере
якшурбӧдьяос но кунооссэс йӧно пумитаны дасяськизы.
Нырысь ик каракулиноос “Якшур-Бӧдья - усьтэм корка”
архитектурая комплексэ дугдӥзы. Татын соосты ёрос клубысь “Тӧдьы юсь”
этнофутуризмъя огазеяськон кырӟанэн пумитаз, нош Александр I тусын дӥсяськем Алексей
Барышников, ёросамы туризмез азинтонъя методист, пыр-поч вераз императорлэн
Якшур-Бӧдьяетӥ ортчемез сярысь. Валэктӥз, малы сӥземын комплекс. Куноос, тросэз ёросамы
нырысьсэ вуизы, тунсыкъяськыса кылзӥзы, кызьы пумитаз Александрез 1824-тӥ арын Ивановъёслэн
семьязы, удмуртъёслэн Бӧдья воршудзы но тангыра сярысь мадёсъёсты тодӥзы.
Таӵе ӟырдыт мылкыдэн пумитам бере, дышетӥсьёс гурт гимназие мынӥзы. Отын соосты шуныт
кылъёсын ӟечкылазы ёросысьтымы унолэн кивалтӥсез Григорий Шаляпин
но гимназилэн директорез Татьяна Веселкова. Татын визьнодасьёс кык урокын
пукизы. Биологиен дышетӥсь Ксения Кудрявцева 8-тӥ классын “Биоритмы. Сон и сновидения”
темая урок нуиз. Нош географиен дышетӥсь Ирина Русских но директорлэн воштӥсез Ольга Малых 5-тӥ классын “Кладовая
полудневного светила” сетевой проект возьматӥзы. Гурт гимназиын трос аръёс ӵоже туала
технологиосын ужало ини, котькуд пиналлэн луонлыкез вань интерактивной доскаен
но, компьютерен но ужаны. Ваньзэ тае каракулиноос вылӥ дунъязы, урок
возьматэм дышетӥсьёслэсь ужан амалъёссэс адӟем каризы.
Пайдаё ужам бере, куноос нош ик ёросэнымы тодматсконэз азьланьтӥзы. Палэнэ ӧз кыльы
Свято-Никольской храм. Шаертодонъя ёрос музейлэн директорез Галина Михайлова
вераз, ку но кызьы пуктэмын вал нырысетӥез черк, кызьы ӝутӥськиз вылез. Озьы ик
куноос воскресной школае пыразы. Соос синмаськыса ик учкизы черкез но со
котырысь юртъёсты.
Эшшо одӥг интые вуылӥзы на со нуналэ дышетӥсьёс - куноос но
асьмелэнъёсыз визьнодасьёс. Сюровай клубын ужась удмурт культурая “Табань”
центр котьку дась калыкез пумитаны. Кивалтӥсез Любовь Байкузина но “Азвесь” ансамбле
ветлӥсь кышноос мыло-кыдо пӧрмытскизы, сиён-юон дасязы, табань пыжизы, кубоен ыж
гон черсыны дышетӥзы. Пусъем потэ, лыктэм дышетӥсьёс пӧлын тросэз ӟучъёс вал. Соос
нырысьсэ адӟизы табань пыжонэз но, ыж гон черсонэз но. Нош
унозылэн кивалтӥсьсы Надежда Соколова посӥськыса ӧз улы, “мон быгатӥсько черсыны” шуыса
вераз но быгатэмзэ возьматӥз. Мукетъёсыз но асьсэды эскеризы, вашкала уж борды
кутскылӥзы.
Пумиськон таукаронъёсын но кузьымъёсын йылпумъяськиз. Куноос ӟырдыт пумитам, пайдаё
ужам но шулдыр шутэтскон понна тау каризы. Таӵе огъя ужрадъёс шедьтэм кусыпъёсты юнмато
но азьланяз ӟеч емышъёсын ужаны луонлык сёто.
Ольга ЮСКИНА,
дышетонъя управленилэн
методикая огазеяськонлэн кивалтӥсез
Комментариев нет:
Отправить комментарий