"Лаборатория "Шунды" проект вуылӥз Мукшие

Туала егитъёс шунды кадь яркытэсь

16 шуркынмонэ Мукши школаын урокъёс бере ӝытазе люкаськизы удмурт кылэз дышетӥсь егитъёс. Кекоранъёс, сюровайёс,

якшуръёс, кунянгуртъёс,

ӵошкытъёс, мукшиос но мукет гуртъёсысь егитъёс люкаськизы одӥг мугъя - соос понна

нош ик ужзэ радъяз

"Лаборатория "Шунды" проект.

Ӧтем куноос пӧлын вал удмурт егитъёслэн мерлыко огазеяськонзылэн тӧроез Ольга Тронина, азветлӥсь юрттӥсьёсыз но тунсыко, ӝужась удмурт кизили Богдан Анфиногенов.

Ӝыт куспын егитъёс быгатӥзы тодматскыны "Шунды" огазеяськонлэн ужась ӧръёсыныз, кудъёсаз пыриськыны быгатэ котькуд нылпи. Мед гинэ со шараялоз мылкыдзэ но тунсыкъяськонзэ. Уката но етӥзъёсыз но йӧноосыз со ӝытэ ик быгатӥзы огазеяськонэ пырыны. Соос понна нимысьтыз дасямын вал гадязы бырттылон "Шунды" пусъёс (значокъёс).

Собере ини кутскизы ужаны ньыль мастер-классъёс. Пиналъёс мылкыдзыя бырйизы я тазэ, я созэ.

Удмурт шудонъёсын но куд-ог эктонъёсын тодматӥз "Чебеляй" нимо эктон студие ветлӥсь пияш Дима Пикулев. Туэ гужем гинэ гуртъёсысь егитъёсмы «Ворекъян» фестивальын тодматскизы вал фин-угор калыкъёслэн эктонъёсынызы. Тросэзлы яраз бадӟым котретэ (хороводэ) султыса эктыны. Тарад но дышетон шулдыр ортчиз.

"Кин со азьветлӥсь?" но "Кыӵе со кулэ луыны?" юанъёслы валэктонъёс утчаны юрттӥз Оля Тронина. Дышетскисьёслэн туж тунсыко тусъем азьветлӥсьёссы пӧрмиллям: узыр, одно ик машинаен, котькытчы вуттӥськись, визьмо но, одно ик, удмурт кылзэ гажась.

Куинети мастер-классын люкаськизы тросгес нылъёс: Алина Чернова дышетӥз соосты удмурт шӧмо поскесъёс (браслетъёс) лэсьтыны. Озьы нылъёс тодматскизы эшшо одӥг амалэн, кудӥз возьматоз соослэсь удмурт луэмзэс. Со дыре ик та киуж сак но чупрес луыны  дышетэ.

Ньылетӥяз люкаськизы витё пала гинэ егитъёс. Влада Митрофанова валэктӥз соослы, кызьы куараез пуктоно, мед со вӧл-вӧл, кыдёке чузъяськоз но вольыт кисьтӥськоз шуыса. Озьыен, дырзы егитъёслэн тэк ӧз ортчы, пайдаен.

Нош ужамзы бере ваньзы чаен пыжиськемъёс веръязы. Кӧтсэс тырыса, эктон-позыръяськонэ вамыштӥзы. Кызьы бен удмуртъёс эктонъёстэк но кырӟанъёстэк? Чузъяськизы туала удмурт егитъёслэн кырӟанъёссы но ди-джейёслэн гуръёссы. Ӧтем кизилиез Богданэз (со ик Ullapalla Воy) шумпотыса пумитазы нылъёс но, пиос но. Тросэзлэсь кырӟанъёсызлэсь кылъёссэс соос дышетыса вуиллям. Пияшен ӵош кырӟазы но эктизы но.

"Шунды"-ен тодматскон шулдыр ортчиз. Удмурт кылэз валасьтэм но тодӥсьтэмъёсыз гинэ, оло, ӧзгес валалэ пумиськонлэсь пуштроссэ. Жаляса верано, сыӵеосыз егитъёс пӧлын али трос гинэ пумисько, озьы ке но, шумпотымон, соос уг палэнско шулдыръяськонъёслэсь. Валало лэся, котькуд пумиськонлэсь мазэ ке выльзэ но тунсыкозэ поттыны луэ. Оскем потэ, кытчы ке палэнэ кошкемзы яке дышетсконние пыремзы бере, егитъёсмы гажаса тодазы вайылозы таӵе пумиськонъёсты.

Бадӟым тау верам потэ Мукшиысь дышетӥсьёслы, доразы ӧтемзы но пумитамзы понна. Медам ноку но кысы гуртазы нош ӝужам "Шундызы"!

Любовь ШИРОБОКОВА

Якшур-Бӧдья ёросын ужа удмурт батюшка отец Иоанн

"Тодонэз бадзым, осконэз юн"

Якшур-Бӧдья шор ёзо школаысь физкультураен азьло дышетӥсь 

Иван Перевощиков егит дыръяз ноку но ӧз малпалля, черкын куке но ачиз

службаос ортчытъялоз шуыса. 

Но Ижкарысь Наталия нимо удмурт монахинялэн1990-тӥ аръёслэн кутсконазыверамез зэмаз.

 Троссэ «адӟись»  пересь Иван Ивановичлы ачиз шуиз:«Тонэ священнике быръёзы, 

кык арня дьяконын ветлод…».

Соку пиосмурт Якшур-Бӧдьяысь 

Свято-Никольской

черкысь батюшкалы Владимир Кунаевлы юрттӥське вал ини.

Отец Иоанн (паллянысез) но Алексий Спасский

Нош кутскиз ваньмыз кузпалыныз Елена Аркадьевнаен черкын венчаться кариськемзы бере. Семья кусыпъёссэс Инмар азьын герӟаны дэмлаз Елена Аркадьевналэн бабаез Елена Фёдоровна Бушмакина. 1993-тӥ арын Перевощиковъёс пересьсылэсь мылкыдзэ быдэстӥзы. Нуналыз но туж чебер тупаз, Тройча бере, Дун-чылкыт Луллэн (Святой Дух) нуналаз. Со дырысен 20 ар ортчиз ини, вань со вакыт ӵоже Иван Иванович валаны турттӥз осконлэсь чылкытатӥсь, буйгатскон сётӥсь кужымзэ. Но вератэк ӧвӧл кельтоно пиосмуртлэсь быдэ вуон аръёссэ.

Вордскиз со Малой Бӧдья гуртын, удмурт крестьян семьяын. Якшур-Бӧдья школаез йылпумъятозь ик бызьылонъя элькунмылэн сборной командаяз пыре вал ини. Гурт удысъя академиын агрономлы дышетскиз, но со удысын одӥг нунал но ӧз ужа. 1981-тӥ арын сюресэз сое Якшур-Бӧдьяысь спортъя школае вуттӥз. 1984-88-тӥ аръёсы УдГУ-ын спортъя факультетын дышетскыса, нош тренере берытскиз. 1991-тӥ арын Иван Иванович Якшур-Бӧдьяысь шор ёзо школае кошкиз, та дырозь отын ужаз. Дышетэм пиналъёсыз сое туж гажало но ярато.

Кузпалыныз Инмар азьын кусыпъёссэс герӟамзы бере, пиосмуртлэн йырсазяз маиз ке воштӥськиз кадь. Но соку ик черке ӧз мыны. Огыр-бугыр улон трос воштӥськонъёс, мылкыд тӥяськонъёс азе пуктӥз калыкез. Соку пиосмуртлы тунсыко потӥз: кыӵе черк пушласянь, малы отчы калык кыстӥське? Мылкыд каремезъя Ижкарысь черкъёсы ветлӥз, Наталия монахиняен пумиськиз, соку ик улоназ зэмам вераськонзы пӧрмиз. Можга ёросысь Поршур гуртысь отец Виктор трос валэктонъёс сётӥз оскон пумысен. Озьы тӥни, 1996-тӥ арын лулпуш малпанъёссэ валан понна, Иван Иванович пумен черке ветлыны кутскиз. Службаослэсь мылкыд басьтыны кутскемез бере пиосмурт валаз, со татын туж интыяз шуыса. Приходэ ветлӥсьёс пӧлысь огназ пиосмуртэз отец Владимир Кунаев но синйылтӥз, службаосын юрттӥськыны ӧтиз, алтарь котыре пономаре пуктӥз. Эшъяськемзы эшшо но мылкыдзэ ӝутӥз. Дыр ортчыса, Иван Иванович "Апостол" лыдӟыны кутскиз. Со вакытэ бордаз гимназиысь бадӟым классъёсын дышетскись Григорий Нелюбин но батюшкалы Алексий Спасскийлы юрттылэ вал ини. 2009-тӥ арын Ижкарысь но Удмуртиысь Митрополит Николай соосты кыкназэс ик подрясникен (кузь сьӧд дэремен) ветлыны  бакель (благословить) кариз. Со дырысен Иван Ивановичлэн   черкын зэмос ужан вакытэз кутскиз. 2012-тӥ арын декабре Михаил Архангеллэн  нуналаз Иван Ивановичез дьяконэ пыртӥзы, нош 2013-тӥ арын январе со иерей луиз ини. Ачиз пиосмурт вера:

- Наталия монахиня улонме шонер адӟиз, ӧжыт гинэ янгышаз ке но. Дьяконын куинь арня ветлӥ. Мон али ке но асме утчасько. Кин ке но монэ валтэ кадь. Тани Иж-Забегалэ, кытын али Михайло-Архангельской храм пуктӥське, мон тунсыкъяськонме буйгатыны мынӥ. Нош люкаськем калык юа: ку-о дорамы ялан ужась батюшка лыктоз ини? Кызьы ке ӵем вошъяськись ужасьёслэн ужзы уг азинскы, озьы ик татын но луэ. Соин кулэ, пе, асьмелэнэз, ёросамы улӥсез. Тӥни соку аслым паймымон ивор кылӥ: монэ дэмлало, пе. Таӵе дыръя "я" но шуыны секыт, шумпотымон но кадь, калык мыным оске шуыса…

Таиз валамон но. Отец Иоанн туж лякыт сямо, востэм но шуыны луоз, ассэ возьматыны воксё уг яраты. Но Иж-Забегалэ батюшкае пуктэмзы бере отысь но матысь гуртъёсысь оскисьёс капчиен лулскизы: черк но чальгес ӝутӥськоз, удмурт адямиен огкыл но шедьтыны капчигес луоз.  Иж-Забегалын ӟучъёсгес уло ке но, Чекерысь, Мукшиысь, Ӵошкытысь пересьёс но шоро-куспо арлыдъемъёс ваньзы кадь ик удмуртъёс. Сак, кылзыны быгатӥсь, визьмо батюшкалы луыса осконзы будэ, мылкыдзы капчия. Та дыре Иван Иванович удмуртарняосы (пятницаосы) но кӧснуналъёсы (субботаосы) Иж-Забегалын, нош арняосы - Вуж Ӟатчаысь Казаньысь Инмар Мумылэн приходаз службаос ортчытъя. Гужемзэ, отец Алексий Афонэ кошкылон вакытэ, Якшур-Бӧдьяысь Свято-Никольской храмын но тыршиз, та дыре но куд-ог службаосты нуэ. Ваньмыз пӧрме солэн, но одӥг быдэсмымтэ малпанэз вань: Михаил Атамановен тодматскемез ӧз на луы. Та мур визьем удмурт протодиаконэн тодматскон котькинлы трос выльзэ, бурдъяськымонзэ сётэ. Выль но Вуж Сӥзёнъёсты (Новый и Ветхий Заветы), Библиез удмурт кылэ берыктэм адями зэмзэ но дунъянтэм ӵектонъёс верасал, дыр, Иван Ивановичлы. Осконо, пумиськонзы одно ик пӧрмоз.  

Эшшо огзэ пусъем потэ на. Райцентрысьтымы черке ветлӥсьёс, Иван Ивановичлэсь ӟеч сямзэ тодыса, Иж-Забегалэ но шумпотыса ветло. Тани огез соос пӧлысь газетмылэн кемалась эшез Валентина Широбокова туж гажа отец Иоаннэз:

- Отец Иоанн кема аръёс ӵоже  юрттэ ини черкын. Туж тыршись, тодонэз бадӟым, осконэз юн, калык со доры капчиен вазиське. Мон понна со тужгес кулэ луись сямъёс.

Туж гажаса вера эшез сярысь Свято-Никольской храмлэн настоятелез Алексий Спасский но:

- Мон туж тау карисько Инмарлы, мыным сыӵе сюлмо юрттӥсь келяз шуыса. Отец Иоанн тыршись, валась  но калыкен огкыл шедьтӥсь адями. Со вань сюлмыныз кыстӥське прихожанъёс доры, нош кыӵе гажало сое пиналъёс! Со дыре ик сак эскере хозяйственной ужпумъёсты. Юн осконэз сое азьлань нуэ.

Улонлэсь кылдон мугзэ валаны тыршон, ма понна тон вордскид та дунне вылэ юанэз сэрттон-пертчон котькинэ сюлмаськытэ. Кин ке со сярысь малпа но пумен вунэтэ, кин ке вань улонзэ валэктон утча. Отец Иоанн но сыӵе мылкыдын улӥз, кема утчаськыса, Инмарлэн мудорез азьын валан шедьтӥз.  Со зэмзэ но ас интыяз вуиз: калыкысь потэм удмурт батюшкаез Якшур-Бӧдьяын гинэ уг, быдэс ёросын тодо но гажало ини.

Вера ВАХРУШЕВА

Туспуктэмез  Николай ЯКОВЛЕВЛЭН