Усто jнерчи
“Висён” кылын герӟаськемын вань секыт, урод малпанъёс, но мукет пал ласянь сое бурмытӥсьёсты син азяд пуктӥськод ке, трослы капчигес луэ. Тужгес но со гурт медпунктъёсын
шӧдӥське.
Ӵошкытысь ФАПе вуэме бере, отын пукись бабушен соку ик вераськоно кариськи. Зоя Петровна Широбоковалы
72 арес, “Забегаловский” совхозын ужамын. Эмъясьёс доры ӵем гинэ ветлоно луэ. Тани али но укол пуктыны лыктэмын.
- 1631 манетлы укол басьтӥ, туннэ сизьыметӥзэ пуктозы ини, нош юрттэмез уг шӧдӥськы. Ярам коть, гуртамы медпункт вань, татчы котькуд нуналэ лыктод, шуныт кыл кылод. Фельдшермы Ольга Валентиновна капчияк укол пуктоз но, бордаз буйгатоз на, маке со дэмлалоз. Йыры ӵем висьылэ, лыосме остеохондроз курадӟытэ. Туж секыт ке, гуртэ но ӧтьылӥсько. Ма-а, сотэк туж урод луысал.
Пересь кышномуртлэн кылъёсыз тросэзлы арлыдоослы тупало, озьы ке но, котькуд гуртлы озьы уг удалты, куке огпол лыктэм фельдшер пыраклы кыле выль интые. Нош Игра ёросысь вуэм Ольга Ушакова ужа ини татын 32 ар. Ваньзэсты тодэ, висёнъёссэс йыраз возе, аспӧртэмлыкъёссэс чакла. Бордаз ужась санитарка Татьяна Вахрушева туж дунъя эшсэ:
- Али фельдшеръёс больничной лист уг сётъяло ни, но нырысь ик дорамы лыктӥсь висисьлы со предварительной диагноз пуктэ ке, верамез озьы ик луэ. Райцентре эскериськыны ветлэмъёс веть дорамы ик эмъяськыны вуо. Ольга Валентиновна ужзэ рос-прос быдэсъя, вань учыръёсты сак эскере.
Таӵе шуныт кылъёс бере кызьы уд вераськы ӧнерчиен? Гуртазы пыэд висёнъёсъя огъя югдурез но тодоно. Али веть ӵапак вакытэз вуэ ини “висьыны”. Ольга Валентиновна ачиз сярысь трос вераськыны уг яраты вылэм, но ужез сярысь веракуз, улонэз но пичиен шараяськиз.
Ӵошкытын семья кылдытыса, Ушаковъёс кык пинал будэтӥзы, кыкназы ик нимазы уло ини. Маиз шумпотымон,
Маша нылзы, кудӥз эмъян удысэ одӥг пыдыным но уг лёгиськы шуэ вал (со то адӟиз, кызьы мамаез уй но, нунал но висисьёс доры бызьыса мынэ), кызьы ке шӧдтэк шорысь кадь Ижкарысь эмакадемиез йылпумъяз. Али нош онкологияя центрын интернатураез ортче. Гужем со ёрос больницаямы
ужаны лыктоз ни. Ольга Валентиновна шумпотыса вера, нылызлы ужез туж яра. Та нылкышнолэн аслаз но мумиз вордскем гуртаз медпунктын санитарка луыса тыршемын. Мамаезлэн ужан интыез туж яра вал пичи Олялы, соин ик, кема малпаськытэк,
со Сарапулысь эм училищее мынӥз, фельдшер-акушерлы дышетскиз. Озьыен, соослэн семьяязы быдэс династия кылдэмын ни. Эмъян удыс та нылкышноосты токма бордаз уг кыскы, соослэн со лулпушазы пыӵамын, висисьёсын ужаны луонлык, оло, Инмарен сётэмын. Удысэз сярысь Ольга Ушакова тазьы вера:
- Калык, жаляса верано ке, котьку висе. Умой, соос дырыз-дыръя эмъясь доры вазисько ке. Та дыре дорамы нуналаз 15-20 гуртоосмы вуыло. Ньыль аръёс талэсь азьло асьмеос больничной лист сётъяськом вал, соку калыкмы эшшо трос люкаськылӥз. Тросэз арлыдоос остеохондрозэн но бадӟым вирзӥбетэн курадӟо. Соос милям 90 пала. Дас вить аресозь пиналъёс 81 кузя, 1 аресозь тэшкылиос 6 кузя. Та пичиосты ӵемгес прививкаосы вайыло, нош висё ке, райцентрын пуктэм лечение ортчытӥськом. Озьы ик мӧйыосын но. Котькуд ар, котькытын сямен ик, сӥзьыл грипплэсь прививкаос пуктылӥськом. Школае но нылпи садэ ветлӥськом, нырысь ик мумы-бубыослэсь соглаш луэмзэс курыса. Одӥг-ог пумит луисьёс но луо. Шоро-куспо арлыдъем улӥсьёсмы но куд-огез прививкалэсь куштӥсько. Милям веть 4 ар талэсь азьло шукырес учыр вал. Школаямы ужась поварлы но мукет соглаш луэмъёслы свиной грипплэсь прививка пуктӥмы. Нош со повармы отчыозь огшоры грипплэсь но прививаться ӧз кариськылы. Пневмониязэ шӧдэме бере, одно ик Якшур-Бӧдьяе мын шуи. Соку ик ӧз мыны, висёнэз сое быдтӥз. Со учыр бере куд-огез ӵошкытъёс прививкаослэсь кышканы кутскизы. Али югдур капчигес кадь. Огъя суредэз дунъяно ке, тросэз мӧйыос, мумы-бубыос верало, вакцина пуктыса, зэмзэ но кынмыса висёнъёссы ичигес яке туж вакчи дыр куспын ортчо шуыса. Озьыен, вераны луэ, кунлэн адямиосыз сярысь сюлмаськемез токма ӧвӧл. Тазалыкез ялан эскерыса возёно. Адями маке умойтэмзэ шӧдэ ке, одно ик эмъясьёсын кенешыны коть кулэ.
Ольга Ушаковаен вераськонъямы
90-тӥ аръёсы кылдэм югдурозь но вуимы. Юон пушкы выем, улонлэсь номыр умойзэ адӟисьтэм гуртоос, олокыӵе но суретъёсты юыса, ӵем гинэ сюлмаськон вайылӥзы фельдшеръёслы.
Озьы вал котькуд гуртын. Сыӵе суредэз адӟытэк ӧз кыльы Ольга Валентиновна но. Юисьёс куспазы жугисько но, лулсэрзы сӧриськыса кулон калэ но вуо - эмъясьлы одно мыноно, адямиез эскероно, пыд йылаз пуктоно. Но нылкышно воксё уг жаля, эмъясьлэсь удыссэ бырйиз шуыса, мукет ужын со ассэ воксё уг адӟы. Пиналъёссэ дышетон понна кӧня ке интыын ужано луылӥз, кузпалыныз ӵош лэсьтӥзы ваньзэ, мае лэсьто котькуд мумы-бубыос.
Ӵошкытысь медпунктэ гуртоос оскыса мыно, татын соосты эмъялозы, буйгатозы, кенеш сётозы, шуныт кылын вешалозы. Та кылъёс малпамын ӧвӧл, соосты веразы асьсэос приёме лыктэм висисьёс. Со дунъет зарнилэсь но дуно.
Вера ВАХРУШЕВА
