среда, 5 декабря 2012 г.

Сценаез шодон дуно сётиське


18-ти шуркынмонэ Удмурт театрын “Чеберай-2012” чошатскон ортчиз. Таче ужрадъёс бере портэм малпанъёс кылдо, кинлы ма яраз, кин мукетсэ вите вал. Котькудизлы пыриськыны уг луы, чошатсконын одиг вормись луэ - тужгес зол дасяськемез адями. Малпанъёсын но, ужъёсын но.
Якшур-Бодья ёрослэсь данзэ утён понна “Чеберай” конкурсэ пыриськиз, ватыса уг улы, пичиез сузэре Любовь Широбокова. Кызьы шуо таче дыръя удмуртъёс, чошатсконэ пыриськон - со нырысь ик астэ вормон. Конкурс сярысь ялон сётэмзы бере куд-ог нылъёс кема гинэ малпаськизы яке соку ик оз тодэ. Тужгес пось мылкыдоосыз соку ик вазиськизы, со сярысь “вконтакте” мер вотэсын (социальная сеть) иворъёс ялан потазы. “Чеберай” ортчон азьын но сайкасьёсыз вал на, озьы ваньмыз чош 10 нылъёс вожвылъяськыны мылкыд каризы.
Котькуд чошатсконын аслыд оскон но кулэ, висисьёслэн шумпоттись ки чабонъёссы но юртто. Соин эшъёсты театре нуон пумысен сюлмаськоно луиз ик. Но ваньмыз пормиз. Мынон нуналамы мылкыд капчи вал, чошатскыны кариськид бере, пумозяз вуттоно ни. Удмурт театрлэн коридоръёстиз йыромыса ветлим ке но, воштиськон-дисяськон гримёрноез шедьтимы ик. Конешно, ваньзы бызьыло, дисьёссэс гладить каро, реквизит утчало, кин ке интервью но сётыны вуиз ини. Тулкымъяськон нош ваньзэс огазея. Кызьы бен сотэк? Катанчи сьорын сюлмаськыса-бергаса, мар сцена вылын вал, адзытэк кыли, соин ик Любаез сцена вылысь адземъёсты юатэк оз луы.
Наталья Вахрушева, ёрос администрациысь райсоветысь онерчи:
- Та жытлэсь мон эстетической шумпотон басьти. Ачим но сыче чошатсконэ пыриськыли бере, тунсыко вал учкыны, макем воштиськемын удмурт нылъёс, макем будиз соослэн дисьтонзы. Конешно, арысь аре нылъёсмы чебересь но йоноесь луо. Конкурс ортчиз капчи, шулдыр. Нырысети интые потэм Татариысь Кукмор ёросысь Олеся Полатова соку ик висъяськиз - зол дасяськем. Туж потэ вал Любамы мед азьпалскоз шуыса - веть со но туж чебер адскиз. Капчиен вераськиз йыр-визь сынан конкурсын, нош кыче тунсыко обряд возьматиз “Туривесь” ансамблен - веранэз ик овол. Куд-огез залын синвуаськизы но.
Василий Байкузин, Сюровайысь баянист:
- Мон чошатсконэз катанчи сьорын “учки”, соин нылъёсты дунъяны уг басьтиськы. Сомында чебер апайёс полы шедьыса, йыр ик берганы кутске. Любамылэн гримёрнояз вал Эграысь мусо нылъёс - соос эшсылы Люда Григорьевалы йылол возьматыны юрттизы. Эх, кыxе соос эктизы отын ик баянэлэн гурезъя! Крезьгурез но эктонэз яратисьёс ог-огзэс котькытын шедьто вылэм.
Ольга Загребина, “Центральный” магазинысь бухгалтер:
- Любаен мон чош дышетски. Коня сое тодисько, со котьку мыло-кыдо, дисьтись но визьмо азям пуксе. Туж потэ вал, мед вормоз шуыса. Коня со дасяськиз, восточной эктонэзлы дисьсэ ачиз вуриз, туфлиоссэ ке но бисерен чеберъяз, аспортэмлыкогес мед луоз шуыса. Оскисько вал - азьпалскоз. Сцена вылэ нырысети номерен потиз - вань секытсэ вылаз басьтиз. Мукетъёсыныз чошатэм бере, валай ини, куд-огез нылъёс эшшо но зол дасяськиллям. Озьы ке но, Люба мон понна полазы самой чеберез, визьмоез, веськрес мугороез вал. “Ныл келян” йылолэз возьматыкузы сыче бордоно кадь кырзаз, ачим ик синвуаськытэк ой чида. Асьмелэн, висисьёслэн но, янгышмы вань - золгес чашетоно, чабоно вал Люба понна. Мукетъёсызлэн висисьёссы, ваньзылэн оз ке но, туж тыршизы нылъёссэс мылкыдъяны.
Коня адями, сомында ик малпан. Ачим огез понна гинэ пичи сузэрме, Любикме, куаретисько - золгес дасяно вал визиткаез. Бен со ачиз но озьы ик лыдъя. Но... мылкыдзэ уг куашкаты. Улонын котькуд вамыш пайда вае. Таиз пыдэстэм шумпотонлы но тырмымтэосты адзонлы пормиз. Ас малпанъёсыз но конкурсэз шодонэз сярысь Люба пыр-поч “Рассвет” газетын гожтиз (23.11.12, 89-ти номер).
Чошатсконъёс азьланяз одно ик луозы. Ёросысьтымы нылъёс “Чеберай” конкурсэ пыриськыны мылкыд каризы ке, Люба али ик дась соослы куд-ог дэмланъёс сётыны. Опыт басьтэм адями зэмзэ но дуно кенешен юрттоз.
Вера ВАХРУШЕВА