Якшур-Бӧдьяысь "Удмурт Кенеш" удмурт группа усьтон сярысь вераськиз

“Удмурт кенеш”

“Усьтоно удмурт кылэз дышетонъя группа. 

Со вакытлэн куронэз”

Куартолэзьлэн шораз ёросысьтымы “Удмурт Кенешлэн” паськытатэм кенешез ортчиз. Люкаськылӥзы правленилэн ёзчиосыз но гурт кенешъёсысь азьло но выль тӧроосыз.

Арлэн кутсконаз Пичи кенешлэн ёзчиосыз ваньзы соглаш луизы вал: улӟытоно гурт кенешъёсты. Гуртын нуиськись уж понна кылкутӥсь шедиз ке, соку “Удмурт Кенеш” сярысь ӵемгес кылозы, куашкам мылкыдын улӥсьёс, ваньзы ик ӧз ке но, улӟозы, егитъёсызгес бурдъяськозы. Соин та юан ӝутэмын вал котькуд ёрос кенешын, озьы ик милям но. “Удмурт Кенешлэн” юрттӥсьёсыз азьло но вал, али но луо дышетӥсьёс но лулчеберет удысын ужасьёс. Гурт кенешъёслэсь ёзчиоссэ гожъяны куронэн Куд-огеныз вераськыны пӧрмиз райцентрын ортчем ужрадъёсын, куд-огез ужантӥям, редакцие пыразы. Списокъёссэс дасяны нырысь ик дыртӥзы кекоранъёс, мукшиос, порвуос но селычкаос. Оскисько, мукетъёсыз но со ужез пумозяз вуттозы.

Озьы ик вераськон мынӥз “Удмурт Кенешлэн” Данъян книгаяз ёросысьтымы азьветлӥсьёсты пыртон сярысь. Али отчы куинь якшурбӧдьяос пыртэмын: Валентина Широбокова, Надежда Гильманшина но Римма Шкляева. Туэ вераськимы Валентина Ивановалэсь, Людмила Обуховалэсь, Ольга Лукиналэсь нимъёссэс дэмланы.

Котькуд куартолэзе гимназиысь но Якшур-Бӧдья шор ёзо школаысь пиналъёсын “Тодматскиськом удмурт кылын” ужрад ортчытӥськом. Туэ со пумиськонэз радъяны тупаз Наталья Байкузиналы но Татьяна Загребиналы. Темаез удмурт дӥсьлы сӥземын луоз.

Валтӥсь юанъёсты эскерем бере, правленилэн ёзчиосыз асьсэлэсь ӵектонъёссэс но веразы. Якшурысь Нина Широбокова дэмлаз синтэмъёслы но ляб адӟисьёслы школа-интернатысь удмурт пиналъёс доры ветлыны, улон-вылонзы, мылкыдзы сярысь вераськыны, газетын соосты нимысьтыз возьматыны. Одно ик ветло шуыса кыл кутӥм.

Ӵошкыт школаысь дышетӥсь Людмила Обухова “Удмурт Кенешлэн” нимыныз элькун Гербере мыноно делегацие ёзчимес но ӵектыны куриз. Таиныз тожо соглаш луимы. Гурт удысъя управлениысь ӧнерчи Елена Поздеева та юанэз одно ик лыдэ басьтом шуиз. Людмила Геннадьевна эшшо одӥг тунсыко дэмлан сётӥз: Школьный посёлокын выль нылпи  сад пуктон сярысь вераськизы ини, али ик малпасько вылэм отын удмурт кылэз дышетонъя группа усьтыны. “Со вакытлэн куронэз”,- пусйиз дышетӥсь. Зэмзэ но, та юанэз пуктоно кивалтӥсьёс азе но, вераськоно мумы-бубыосын но. Та дыре “Вконтакте” вотэс бамын “Якшур-Бӧдья” группаын “Гожтысалды-а тӥ пиналдэс удмурт кылэз дышетӥсь группае?” юанэн опрос ортче. Йылпумъянъёссэ одно газетын печатлалом.

Ӧм вунэтэ ми Ашальчи Оки нимо премиен данъям Валя апаймес (Валентина Широбоковаез) эшшо огпол ӟечкыланы. Ас ёросаз кылэм шуныт кылъёс но тодаз мед кылёзы шуыса тыршимы.

Нош люкиськон азьын пӧртэм гуртъёсысь люкаськем ёзчиосмылы гуртэ уж сётӥмы. Удмурт кылын экоплакатъёсты клубазы, школаязы яке магазин котыразы лякылыны. Котырысь инкуазез утён сярысь удмурт кылын гожтэм ӧтёнъёс пиналъёсты, оло, золгес малпаськытозы. Нош дасяз со плакатъёсты Ижкарысь “Ваньмон дыр” группа, кудаз пыре милемлы тодмо Алексей Шкляев.

Йылпумъяса, шумпотэммес верам потэ на. Вуоно дышетскон аре гимназиын удмурт класс люкаськоз-а, уз-а, юан уг сылы ни: Якшурысь но Выжоысь мумы-бубыос ог дасо нылпиоссэс отчы гожтӥзы ни. 31-тӥ куартолэзь бере (соку пиналъёс нылпи  садэнызы люкиськизы) визьпогъёс школае мыныны дасясько ини. Удмурт кылзэс яратыны мылкыд но вольыт сюрес соослы сӥзиськом.

Вера ВАХРУШЕВА,

Якшур-Бӧдья ёросысь “Удмурт Кенешлэн” йырыз