Удмурт поэтъёслэсь кылбуръёссэс лыдӟонъя конкурс

Кыло-буро ӵошатскон

Ёросысьтымы котькуд нылпи садын вордскем шаеренымы тодматскон занятиос ортчыло. Нош удмурт кылэз валась воспитательёс ӟучомись пиналъёсын ас кылынызы вераськыны но тыршо. Ёрос центрын анай кылзэс тодӥсь но валась пиналъёс туж ичи,

соин воспитательёс соосын ужало шудон пыр, дышето удмурт кылбуръёсты но кырӟанъёсты.

Алигес 1-тӥ номеро нылпи садын ужасьёс бадӟым группае ветлӥсь пиналъёссы пӧлын “Ошмесо шаере” ӵошатскон ортчытӥзы. Пичиос чебер лыдӟиськыны быгатэмзэс возьматӥзы, удмурт поэтъёслэсь ӟуч кылэ берыктэм кылбуръёссэс лыдӟизы. Нош пичигес группаосы ветлӥсь тэшкылиос соосты кылзӥзы.

Дасяз нош ӵошатскисьёсты воспитатель Татьяна Широбокова. Дас куинь визьпогъёс дышетӥзы Иосиф Ивановлэсь, Флор Васильевлэсь, Аркадий Клабуковлэсь, Анатолий Леонтьевлэсь, Герман Ходыревлэсь, Александр Белоноговлэсь но мукет кылбурчиослэсь чуръёссэс. Жюриын пукись воспитательёс Елена Бороденкова но Ольга Изместьева сак кылзӥзы пиналъёсты, вольыт вераськемзэс, кылъёсты умой тодэмзэс, пуш мылкыдзэс возьматыны быгатэмзэс дунъязы. Туж тыршизы пичиос, пиос но нылъёс. Но вормись котьку одӥг луэ. Кинлы ке ӧз тырмы мылкыд, кин ке кылъёссэ ӧжыт вунэтӥз, кин ке куаразэ лябгес поттӥз. Мар карод, пиналъёс ваньзы пӧртэмесь, соин ик соос ваньзы ас понназы мусоесь, тунсыкоесь, быгатӥсесь. Нош тужгес мыло-кыдо лыдӟись луиз Катя Шишкина, со 20 балл люказ. Кыкетӥ луиз Лида Максимова (19 балл), куинетӥ - Варя Зараева (18 балл). Ӟечокъёс ваньзы!

Но кылбур лыдӟонэн гинэ ужрад ӧз йылпумъяськы. Пиналъёс доры Незнайка но потаз (Ирина Беляева), со сяна, пиналъёс вордскем шаер сярысь визькылъёс веразы, удмурт эктонэ ваньзы пыриськизы, шудӥзы. Крезьгурен шулдыртӥз крезьгуръя дышетӥсь Ирина Смирнова. Маиз шумпоттэ, тросэз пиналъёс удмурт шӧмо дэремъёсын дӥсяськемын вал, со дӥсьёс 1-тӥ садиклэн тодмамон тусыз луизы ини.

Ужрад удмурт кылбурчиослы сӥземын вал. Котькудӥзлэн удмурт шаер, ошмесъёс, италмас, перепеч, табань, пельнянь сярысь чуръёссы трос гожтэмын. Ваньмыз со асьмелэн данъяськонмы. Пиналъёс сое сюлэмъёссы пыр поттӥзы ке, валазы ке - ӵошатсконлэн визьнод сётон мугез быдэсмиз.

Вера ВАХРУШЕВА