Умой ужъёсты лэсьтон арня

Умой ужъёсты ар ӵоже лэсьтоно

2000-тӥ арысен Россиысь егитъёс умой ужъёс лэсьтон нуналэз пусъё. Нош быдэс

дуннеын та нунал 1985-тӥ арысен ялэмын. Быдэ вуымтэос улонысь сюрессэс озьы гинэ уг шедьто, но визьмо но быгатӥсь адямиос борды итӥсько ке, умой ужъёс лэсьтонэ соос сюлмысь пырисько. Калык тыршемзэс мед адӟоз шуыса ик малпамын

та нунал, ӟуч сямен - Всемирный день молодёжного служения.

Оштолэзьлэн пумаз элькунысьтымы вань каръёсын но ёросъёсын “Весенняя неделя добра” акция ялэмын вал. Палэнэ ӧз кыле ёросысьтымы Нылпиослэн творчествозыя юртсы, Культурая, спортъя но егитъёслэн ужъёссыя управление но ёрос клубысь “Континент” центр. Огъя малпам ужрадъёсы та ужъюртъёсысь ӧнерчиос арня ӵоже ог 1000 пала пиналъёсты пыриськытӥзы. Котькуд нунал сӥземын вал нимысьтыз ужъёслы. Нырысетӥ нуналаз ёросысьтымы дышетскисьёс школаоссы котырын утялскизы. Нош волонтёръёс но РСМ-ысь (Российский Союз Молодёжи) егитъёс райцентрлэн ульчаостӥз ветлӥзы, ортчисьёслы яркыт буёло шаръёсты кузьмаллязы.

Мукет нуналъёс но туж пуштросо ортчизы. Быдэ вуымтэос но кивалтӥсьёссы Данъян площадьын утялскизы, озьы ик Быдӟым ожысь ветеранъёс но инвалидъёс доры ветлӥзы, азбаръёссэс чылкытатӥзы.

Тунсыко пусйизы нуналэз Чурысь но Вуж Ӟатчаысь дышетскисьёс. Соос “Деревенский переполох” шудон-ӵошатсконэ пыриськизы, шулдыръяськизы. Нош Нылпиослэн творчествозыя юртын но школаосын умойлыклы сӥзем урокъёс ортчизы. Пиналъёс ангелочекъёсты лэсьтыны дышетскизы но визьнодан занятиосы пыриськизы. Волонтёръёс озьы ик лэсьтэм ужъёссы сярысь вераськизы.

Арнялэн берпуметӥ нуналаз ваньзы люкаськизы Якшур-Бӧдьяысь синтэмъёслы но ляб адӟисьёслы школа-интернатын. Волонтёръёс, “Юность” но “Утро РСМ” огазеяськонъёсы пыриськись пиналъёс доноръёслы но мукет дышетскисьёслы ас кужыменызы дасям концерт возьматӥзы. Таукаронъёсын пусъемын арня ӵоже асьсэды тужгес яркыт возьматэм пиналъёс но школаос - гимназия, Якшур-Бӧдьяысь школа но школа-интернат. Арня ӵоже котькуд дышетсконниын шудонъёсты, книгаосты, гожъяськон арбериосты люканъя акция ортчиз. Вань котыр мер юрттэт сётонъя центре сётэмын. Отысь со юрттэт секыт югдуре шедем но ляб улӥсь семьяосы вуоз.

Озьы ик бадӟым тау верам потэ мукет школаослы но: Чернушкаысь, Лынгаысь, Вуж Ӟатчаысь, Мукшиысь, Ӵошкытысь, Чурысь, Кекоранысь, Селычкаысь. Акциосы пыриськем пиналъёслы азинсконъёс сӥзиськом, нош лэсьтэмез вылын медам буйгатске.

Умой ужъёс лэсьтонлы арня ортчиз. Нош вунэтоно меда со сярысь? Ваньзылы валамон, секыт югдуре шедем яке быгатӥсьтэм адямиослы котькуд нунал юрттоно. Соку котырысь улон но капчигес луоз, сайкась шунды но тросгес шунытсэ сётоз.

Любовь ПЕРМЯКОВА,

Нылпиослэн творчествозыя

юртысь ӧнерчи