Кайса со кайсы кадь - кезьытлэсь уг кышка

Селычкаын улӥсь Николай Вахрушев “Ошмес” газетлэн героез 2005-тӥ арын луылӥз ни вал. Соку Капиталина Загребина пыр-поч юалляськиз спортэ вуэмез но отын вормонъёсыз сярысь.

Милемды нош али дэмӟытӥз Николай Геннадьевичлэн огез туспуктэмез. Южтолэзьлэн пумаз со элькунысьтымы биатлонъя мукет судьяосын Сочие ветлӥз. Лыдӟисьёсмы тодыны кулэ, отын ортчоно олимпиадаозь дыр арлэсь ичигес кылиз ини, нош олимпи трассаосты Россиысь но кунгож сьӧрысь биатлонистъёс рос-прос эскеризы ини.

Тӥни огзэ сыӵе ӵошатсконэз дунъяны ветлӥз Николай Геннадьевич но. Та улосчимы быдэс дуннеын тодмо кизилиос пӧлы ӵем гинэ шедьылӥз, нош таяз учыре солы Финляндиысь чупрес нылашен Кайса Макарайненэн одӥг туспуктэме пуксьыны удалтӥз.

Учке ай, удмурт пиосмурт но фин нылкышно кыӵе тузӥесь адско. Нош нимыз нылашлэн туж тупа удмурт “кайсы” кыллы. Кылдэмзыя та кылъёс, оло, пӧртэмесь, но сямзыя тупало. Кайса со кайсы кадь - нокыӵе кезьытлэсь уг кышка, куас сюресъёстӥ котькыӵе вакытэ лобаса ветлэ. Таӵе дано спортсменкаен тодматскыны - со бадӟым шумпотон.

В.ПЕТРОВА