Якшур-Бӧдья ёрос библиотекаын ижкаръёс кырӟазы

Пумиськон

Вормонэз пумитазы кырӟаса

Голованов Н.Г., Щербакова Н.Н., Сурнина Н.Н., Никитин Ю.Н.

Ёрос библиотекаын “Литературная гостиная” огазеяськонлэн тулыс понна берпуметӥяз пумиськоназ Быдӟым ож дыръя но со бере кылдэм кырӟанъёслы сӥземын вал.

Гостинойёсты радъясь библиотекарь Любовь Карпова тарад Ижкарысь куноосты ӧтьылӥз. Малы отысь, шуоды? Паймонэз ӧвӧл, сыӵе тунсыко адямиосын ӵемгес пумиськысалмы ке, лулпушмы но чебергес луысал, мугор висёнъёсмес но вунэтысалмы.

Тодматске. Нина Николаевна Щербакова вань улонзэ кунгож сьӧр кылъёслы дышетӥз, кырӟаны яратэ но быгатэ, солэн репертуараз 200 пала романсъёсыз. Нош крезьгурен юрттэ, гитараен шудэ Николай Геннадьевич Голованов. Вань улонзэ ужамын заводын, но ас мылкыдызъя дышетскиз шудыны гитараен, аккорддеонэн, баянэн. Эшшо со шахматист но эстет. Огезлы 82 арес, кыкетӥезлы 78 тырмоз. Кыкназылэн ик сюлэмъёсазы вулкан бугыръяське, соос котьку дасесь творчествозэс калыке поттыны. Нош вайиз соосты ёросамы Карашурын улӥсь эшсы Наталья Николаевна Сурнина, кудӥзлэн бубиз Якшур-Бӧдьяысь школаын дышетскиз на. Ньылетӥез эшсы МВД-ысь ветеран, кылбурчи Юрий Никитин. Та пиосмуртлэн кылбуръёсыз тожо ожъёслы сӥземын, 1941 арысен та нуналозь ортчылэмъёсызлы.

Пумиськонэ калык ӧжыт ке но лыктӥз, огез но ӧз жаля ветлэмезлы. Синтэмъёслы но ляб адӟись школа-интернатысь пиналъёс сак кылзӥзы Юрий Николаевичлэсь кылбуръёссэ. Огез пияш, Никита Горличенко, ачиз но кылбур лыдӟиз. Пиос туж тау каризы Ижысь куноослы. Кырӟан бере кылбур, нош романс... “Журавли”, “На полянке”, “Последний бой” - огез мур, бӧрӟытӥсь, мукетыз капчи мылкыдо, яратон сярысь. Нош кыӵе кылбуръёс гожъя вылэм Юрий Николаевич! “Завещание из 1941 года”, “Памяти друга” кылбуръёсыз туж малпаськыто. Чехословакиын, Афганистанын, Чечняын, Грузиын кышкыт учыръёс, Москваын 1991-тӥ арын ортчем путч - вань та темаос сюлмыз пыр потэмын, куд-огез ас вылаз шӧдэмын.

Нина Николаевна но Николай Геннадьевич ож азьын вордскемын. Пиосмурт шаерамы вуиз эвакуировать карем семьяеныз. Нина Николаевна пичи дыръяз ик госпитальын ужаны вуэмын: отын нылаш выж миськылӥз, сӧсырмем солдатъёсты пуньы вылысь сюдылӥз, кырӟалляз соослы но трос мукетсэ лэсьтылӥз. Озьыен, таос кыкназы ик войнаез ас синъёсынызы адӟизы, шӧдӥзы солэсь курытсэ, тодӥзы пӧсь синвуосын бӧрдӥсь пиналъёсты, мӧйыосты. Паймонэз ик ӧвӧл, малы Нина Щербакова но Николай Голованов ож вакытлы сӥзем кырӟанъёсты ярато. Сьӧразы учкисьёссы но кырӟало. Тау соослы мылкыдэз бугыртэмзы понна, кужымзы кемалы мед тырмоз.

В.ПЕТРОВА