БУД-э пыриськиз Якшур-Бӧдьяысь Алевтина Изместьева. Шаерчиос будо Бӧдьялан

ивор куды

БУД - бадӞым удмурт диктант

Оштолэзьлэн кутсконаз быдэс Россиын улӥсьёс шонер гожъяськыны быгатэмзэс эскеризы. Кин - ӟуч кылъя, кин - удмурт кылъя но. Ижкарын таӵе ужрад кыкетӥзэ ортчиз. Тодмо удмурт гожъяськисьлэсь Вячеслав Ар-Сергилэсь текстсэ УдГУ-э ог 30 адями гожтыны ветлӥз, нош радио пыр Ар-Сергилэсь ик ӧжыт воштэм “Палэзьпу” вероссэ 211 адями гожтӥз. Пыриськизы отчы быдэс элькунысьтымы дышетскисьёс но, арлыдоос но. Ӧз кыльы палэнэ ёросмы. Радио пыр кылзыса диктантэз Якшур-Бӧдья шор ёзо школаысь ӟуч кылъя дышетӥсь Алевтина Изместьева но гожтӥз. Ужез понна Алевтина Павловна 96 балл басьтӥз, со III инты басьтыны тырмиз. I интые потэм адями 99 балл басьтӥз, II-е - 97 балл. Ӟечкыласьком дышетӥсьмес вормонэныз, 67 аресаз но со егитъёсын ӵошатске но азьпалтэ соосты.

В.ПЕТРОВА

Егит шаерчиос

Кылем арняе нылпиослэн творчествозыя юртын (ДДТ) шаертодонъя научно-практической конференция ортчиз. Ёросысьтымы вань школаосысь 5-11-тӥ классъёсын дышетскисьёс пыриськизы отчы, ваньзы ӵош 21 кузя луизы. Таӵе ужрадэз нылпиослэн юртысьтызы ӧнерчиос трос аръёс ӵоже ортчытъяло ини, нош историяя дышетӥсьёслэн огазеяськонзы туэ витетӥзэ.

Азьло аръёсы та ужрадъёс нимазы радъясько вал. Туэ Светлана Сохина, ДДТ-ысь ӧнерчи но Римма Зиннатова, историяя Чурысь дышетӥсь, огазеяськизы. Соин ужъёс но трос люкаськизы.

Пиналъёс пӧртэм темаосты кутӥзы: колхозъёслэн кылдэмзы, Ижевск-Балезино чугун сюрес, удмурт шортдэрем, кин со - кряшенъёс - ваньмыз тунсыко но рос-прос возьматэмын вал. Жюриын пукись ёрос архивлэн кивалтӥсез Наталья Ившина пусйиз, рефератъёс но докладъёс арысь аре зол луо шуыса.

Вормисьёс кык группая висъямын: 8-11 но 5-7 классъёс. Нырысетӥяз вормиз Чур школаысь Наташа Корепанова, кыкетӥ луиз гимназиысь Софья Ившина (9 кл.), куинетӥ - Ӵошкыт школаысь Мария Вахрушева (8 кл.). Кыкетӥ подгруппаын нырысетӥ инты басьтӥз Кекоран школаысь Иван Орлов (6 кл.), кыкетӥ - Мукши школаысь Дарина Васильева (7 кл.), куинетӥ луизы Кекоран школаысь Даниил Говязин (7 кл.) но юрттӥсез Антон Вахрушев (11 кл.).

Ӟечлыксыя ужъёс тросэз ог-огзылы матын вал, соин нимысьтыз грамотаосын пусъемын Якшур-Бӧдьяысь синтэмъёслы но ляб адӟисьёслы школаысь Александр Сакмаров (10 кл.), Вуж Ӟатчаысь Ирина Лукина (7 кл.), Чернушкаысь Артём Абашев (5 кл.) но Мукшиысь Валерия Абросимова (5 кл.).

Вера ВАХРУШЕВА