Театр удыс Якшур-Бӧдьяын но азинске

Ӵук тылсиос кадь пишто гуртоос

Тулыслэн йыг-йыг вамышъёсыз улсын ёросамы нош ик “Театральные подмостки” ӵошатскон ортчиз. Арысь аре  пырисько отчы Кыкваысь, Мукшиысь, Лынгаысь, Чернушкаысь но Порвуысь артистъёс - клубъёсын ужасьёс но гуртын огшоры улӥсьёс. Нырысьсэ туэ сцена вылэ потазы варавайёс но зеглудъёс. 
Нырысетӥ вамышъёссы удалтӥзы, сцена вылэ поттэм ужпумез - 
котыр улосэз утёнэз - соос яркыт но валамон возьматӥзы.

"The BEST"

Та ужрад кемалась йылолэ пыремын ини, ёрос клубын ужасьёс котькуд ар витё выль но выль постановкаосты, артистъёсты но темаосты. Жюриын пукизы ёрос клублэн кивалтӥсез Ольга Протопопова, режиссёръёс Татьяна Воронина, Алексей Барышников, Ирина Исаева но “Ошмес” газетысь корреспондент Вера Вахрушева. Кин ке таӵе ужрадъёсын котькуд ар пуке, кин ке нырысьсэ дунъяз, мон но одӥг-ог шедьылӥсько сыӵе ӧнерчиос пӧлы. Валамон, дунъясько огшоры учкись кадь, но сыӵеез но дунъет туж интыяз луэ. Вормисьёсты бырйыку вань баллъёс лыдэ басьтӥськизы, котькуд  ёзчилэсь малпанзэ кылзӥзы. Озьы огъя уж ӟеч йылпумъянъёсын пӧрмиз. Но нырысь ик пусъем потэ тужгес пӧрмем возьматонъёсты но артистъёсты.

Тужгес умой шудӥсь пиосмуртэз бырйыны секыт ик ӧй вал. Кыкваысь Юрий Вахрушевез элькун сцена вылэ но поттӥд ке, удмурт кизилиослэсь бездыт уз адскы. Ӟеч артист!

Умой шудӥсь нылкышно луиз Зеглудысь Альбина Веретенникова. “Колӟо” экологической выжыкылысь гондырез со туж быгатыса шудӥз, котькуд пиосмурт но озьы уз пӧрмыты. Жюриын пукисьёс сое соку ик пусйизы.

Пиналъёс пӧлысь яркыт но сюлме пыӵамон шудӥз гимназиын дышетскись Юлия Ершова. Нош тужгес умой лыдӟись луиз эшез Александра Вершинина. Огъя вераса, “У войны не женское лицо” литературно-музыкальной композицизы понна “The вest” коллективе ветлӥсь 6 нылъёс I инты басьтӥзы (кивалтӥсьсы Светлана Суслова).

Сьӧразы кыстӥськизы, II интые потӥзы, Лынгаысь пиналъёс. “Зазеркалье” огазеяськоназы нылъёс но, пиос но ветло. “Золушка” выжыкылэз соос зол дасяллям, чебер костюмъёс вуриллям (кивалтӥсьсы Аксана Блинова). Висъяськизы на соос “Умойгес крезьгур оформление” номинациын.

Куинетӥ луизы Мукшиысь “Арлекин” кружоке ветлӥсь пиналъёс. Соос “Поезд проходит мимо” драма возьматӥзы. Отын наркотикъёслэсь мозмытскыны быгатымтэ быдэ вуымтэ пияш быре. Малы визьмо пиналъёс герӟасько со эзелен - валэктыны тыршизы мукшиос (кивалтӥсьсы Татьяна Кайсина).

Чернушкаысь “Актёр” огазеяськонэ ветло пиналъёс но, мӧйыос но. Кивалтӥсьсы Людмила Гасникова “Будьте счастливы” пьесаез ачиз гожтӥз. Со возьматӥз, кыӵе шудо улэ кышномурт, кудӥз будэтэ аслэсьтыз но улонысь кошкем сузэрезлэсь пиналъёссэ. Людмила Гасникова “Авторское произведение” номинациын пусъемын.

Шундылэн нырысетӥ ӵук тылсиосыз кадь пиштӥзы Зеглудысь артистъёс (кивалтӥсьсы Ольга Акманова). “Колӟо” нимо экологической выжыкылын пиналъёс, ужась егитъёс но шоро-куспо арлыдоос туж ӟеч шудӥзы. Котыр улосэз утёнлы сӥзем ар чотын возьматонзы туж вакытаз тупаз. Соин жюриын пукисьёс соослы I инты пуктӥзы.

Кыкваысь артистъёс ӧжытлы но бере ӧз кыле. “Маскарчи” огазеяськонэ ветлӥсь гуртоос кемалась ӵош шудо ини. А.Григорьевлэн “Парсьпи но эмеспи” пьесаысьтыз оглюкетсэ пуштросогес возьматон понна соос ӟеч декорациос но лэсьтӥллям - кенеръёс, гу, ӟус, чир-р поттӥсь парсьпи. Ваньзэ сое, конешно, малпаз кивалтӥсьсы Наталья Ходырева. Со понна та коллектив “Оригинальная сценография” номинациын висъямын на.

Зеглудъёс

Паймытӥзы туэ порвуос. Нырысетӥзэ адӟи соослэсь удмурт кылын шудэмзэс. “Казакпи” комедиын кык нылкышноос Варфоломей нимо пиосмуртэз люкыны выризы. Нош со кышнояськем маке, эшшо ке пиналъёсыз лачак. Кышнозэ но пичиоссэ адӟыса, казакпи соку ик семьяяз берытскиз. Одотез но Марьяез шудӥсь Зулхумор Зарипова но Ольга Широбокова нырысьсэ сцена вылэ потазы, озьы ик дебютэз вал Александр Загребинлэн. Но артистъёслэн куалекъямзы ӧз ик шӧдӥськы, учкисьёс сюлмысь горизы одӥг пиосмурт понна “нюръяськись” нылкышноосты. Куинетӥ инты басьтэм сяна, порвуос (кивалтӥсьсы Валентина Загребина) “Удмурт культураез утисьёс” номинациын пусъемын.

Варавайысь  артистъёс    (кивал-

тӥсьсы Татьяна Замерова) инкуазез утёнлы сӥзем темаез усьтӥзы, соослы “Приз зрительских симпатий” сётэмын.

Жюрилэн нимысьтыз номинациын пусъемын Мукши клубысь ужрадэз нуисьёс Елена Вахрушева но Елена Тронина. Яга пересь но Лешак коллективъёсты ялэм сяна, ог-огзэс пышкылыса улӥзы, учкисьёсты серекъятӥзы.

Ваньмыз ӵош 9 коллективъёс та нуналэ ӵошатскизы. Котькудӥз висъяськиз аслыз гинэ тупась быгатонлыкеныз: чебер вераськиз, тумошо выриз, сюлэмез позыртымон мур кылбуръёс лыдӟиз. Номеръёс но укыр кема ӧз кыстӥське, огез сьӧры огез ас сямыныз пиштӥз. Жюрилэн нимыныз бадӟым тау верам потэ гуртоослы, кин ваньмон дыръяз одно ик репетициосы ветлӥз, кылъёсты дышетӥз, дӥсь но декорациосты дасяз. Таӵе ужрадъёс яркыт возьмато гуртъёсын улӥсь таланто адямиосты. Азьланяз но соос мед шараяськозы, калыкез шумпоттозы.

Вера ВАХРУШЕВА