Вылаз
шинель, йыраз пилотка...
 |
| Роман Петрович, 1965 ар |
Быдӟым ожлэн тӧдьы виштыосыз
кема аръёс ӵоже тулкымъяськытозы
на калыкез, утчатозы ивортэк ышем солдатъёсты, концлагерьёсын быдтэм пиналъёсты
но егитъёсты. Соос улэпесь ӧвӧл ни, ватэм интызэс ке но шедьтыны луысал ке...
Якшурын улӥсь Ираида Романовна Булдаковалэн атаез
Роман Петрович Широбоков, сӧсырмыны шедьыса, ожысь дырызлэсь вазь бертӥз, 1943-тӥ арын, куартолэзе. Тани кызьы тодаз вае со папаезлэсь
бертэмзэ (семьязы Альманын улэ вал):
 |
| Роман Широбоков семьяеныз. Альман |
- Мон 1936-тӥ арын вордскемын,
папаелэсь фронтэ кошкемзэ уг тодӥськы ни. Но бертон нуналэз али кадь ик син азям. Рая
эшеным ульчаын шудӥськом. Кытысь ке ӧвӧл, папае Оклин Петыръёс (Пётр Загребин) доры пырем шуыса кылӥськиз. Ожысь бертӥсь адямиез соку ик
гуртаз мыныны уг лэзё вал, уга. Ми вылӥе тубыны шуыса кариським но, бускель пунылэсь кышкамы.
Ма кызьы-озьы, мынам папае бертӥз ук, та шузи пуны уг лэзьы. Бӧрдэм ик потэ! Но кема
витёно ӧз луы, папа васькиз, вылаз - шинель, йыраз - пилотка. Сьӧраз лачак калык
ваське. Монэ папа кияз кутыса ик коркае пыртӥз, мама гур котырын
берга вал. Паймеменыз, шумпотэменыз ма карыны ик ӧз вала, нош папа пол
шоры пуксиз но войнэ ветлэмез сярысь вераны кутскиз. О-о, пол шоры пуксьыса ик.
Ваньзылэн тодэмзы потэ вал ук, мар со сыӵе - война, кызьы со кизэ ыштӥз, кытын ожмаськиз?
Троссэ али вунэтӥ ини, тодко на кызьы
китэк кылиз верамзэ. Война азьын папае вал дуре вал, ожын но со ужез солы
оскиллям. Нош кизэ со ыштэм тазьы:
пулётэз зарядить карем бере, кизэ команда сётыны ӝутэм. Тӥни соку ик кизэ
ишкалэм, чиньыосызлэсь лобӟемзэс но адӟем на. Ки интые моклок кылиз.Госпитальёсын кема
кылльыса, сое гуртаз лэзизы. Китэк ке но, улэп! Милемлы бадӟым шумпотон.
Папамылэн балалайкаез но гитараез вал, кыкеныз ик шудыны быгатэ вал. Но
балалайкаен ӵемгес шудылӥз, гурез шулдыргес пӧрме вал уга. Бур кияз изьыысьтыз
кизилизэ думе но соин ик шудэ вал. Папамес ӵем гинэ Ишем школае ӧтьылӥзы, вань праздникъёсы
балалайкаеныз шудыны курылӥзы. Ужаз со колхозын ик, кебитын. Киызлэсь со керпотэ
вал кадь, весь ватыны вырылӥз, но ужаны тыршиз ваньзы кадь ик.
Альманысь
Широбоковъёслэн семьяязы вить пиналзы вал, ваньзы ӵош ужазы, улонлы шумпотӥзы. Но куректон палэнэтӥ ӧз кошкы, война пумын Романлэн София кышноез тифлэсь
кулӥз. Сомында пиналъёсты
ӝутон понна пиосмурт
нош кышно вайиз. Анналэн аслаз нылыз вал ини, Романэн эшшо одӥг ныл вайизы. Семья будӥз, пиналъёс отчы-татчы пазьгиськыны
кутскизы. Ираида Романовна Соловьиысь Владимир Булдаковлы бызиз.
Роман Широбоков ӧз быры ожын, но кема улыны солы ӧз кылды. Огпол пыдзэ чигтыса, бурмымтэ мае
ке нош ик чигтӥз. Пыдыз ӧз бурмы ни, 1973 арын пиосмурт улонысь кошкиз...
Ожысь бертэм рядовоез
Роман Широбоковез ноку но ветеран шуыса ӧз данъялэ, мӧля тыр медальёс ӧз ошылэ. Но солэн вал орденэз но «За победу над
Германией» медалез. Вордскем шаерез
азьын со возьытэ ӧз усьы, аслэсьтыз ужзэ быдэстӥз, музъемзэ утьыны ӧз кышка. Кӧня со кадь ветеранъёс
улонысь вазь кошкизы, сӥлы каремез ӧз шӧдэ. Соос уло сюлэмъёсын, соосын данъясько пиналъёссы но нунокъёссы.
Вера ВАХРУШЕВА
Кин со – Анатолий Васильевич?
Та туспуктэм кылле Якшурын улӥсь Булдаковъёслэн фотоальбомазы. Фотолэн бераз
гожтэмын: «Уважаемому свату
Степану Петровичу от вашего свата Анатолия Васильевича. Старшина-кавалерист.
ХII - 1944 год.» Степан Петрович - со
Владимир Степановичлэн бубиз, нош кин со сватсы, арлыдо пиосмурт уг тоды ни.
Оло, кин ке тодмалоз та йӧно солдатэз?
Анатолий Васильевичлэн ӵыжы-выжыосыз, оло, Якшурын ик уло? Тодмады ке, вазиське
редакцие, вераськом.
Комментариев нет:
Отправить комментарий