«Шундылэн» ужрадъёсаз шумпотыса пыриськозы егитъёс

«Шунды» бурдъёс кузьма!

Дыр ортчемъя, удмурт егитъёс валаны кутско, котырысь улон соослэн мылкыдъёссылэсь, малпанъёссылэсь но ужъёссылэсь пӧрме шуыса. Со валамон луиз «Шунды» ёзчиослэн но ёрос ёзэтъёслэн кивалтӥсьёссылэн пумиськоназы.

Егитъёсын ужанъя, Йӧскалык политикая министерствоослэн но Эшъяськон юртлэн юрттэмзыя «Дзержинец» лагерьын 20 пала удмурт егитъёс кык нунал ӵоже (20-тӥ-21-тӥ оштолэзе)  нырысь ик валаны тыршизы, малы кулэ удмуртлыкез азьланьтон но сое калыклы пыӵатон, кин соин кулэ вырыны но кытысен со кулэ кутскыны. Озьы ик малпаськыса пукизы, кыӵе ужъёс борды йӧн-йӧн басьтӥськоно, кызьы удмуртлыкез популярной кароно, кыӵе амалъёс туннэ со понна вань. Шумпотыса вераны кулэ, люкаськемъёс пӧлын Кузебай Гердъёс но Трокай Борисовъёс пуко вылэм! Соос валало, кин лэсьтоз на, ми ке ӧм.

Ужез радъяны юрттӥзы ӧтем куноос. Нырысь ик Лариса Ускова удмурт психологен ӵош утчазы командаын ужанъя туж кулэ валэктонъёсты. Ма со команда но кызьы со кылдэ? Мар сое огазея? Кыӵе со – зэмос азьветлӥсь? Валче ужам бере, кылдытӥзы тунсыко образ. Туннэ нунал понна удмурт егитъёслэн азьветлӥсьсы, роликъёс вылын ворттылыса кадь, котькытчы вуттӥськыны кулэ. Усиз ке, одно ик ӝутӥськоз, уго солэн пыдесаз наколенникъёсыз вань. Султыны нош юрттозы солэн юрттӥсьёсыз – мыло-кыдо ёзчиосыз. Одӥг кияз солэн коньдон пачка, мукетаз пайдаё ужась юрттӥсьёсыз ӝог гинэ клавиатура вылтӥ бызьыло но Интернетэн эшъясько. Гадяз – щит, нош со сьӧрын удмуртлыкез яратыса но гажаса йыгаськись сюлэм. Йырыз борды басьтӥськид ке – паймод но бырод. Синъёсаз тыл ӝуа, отын ик со пумен адӟе, ма луоз азьланяз. Пельёсыныз со сак кылэ котырысь верамъёсты но быгатыса кылзэ критикаез. Нырыныз со котьку шока чылкыт омырен. Интуициеныз шӧдэ умойтэмзэ. Ымыныз ӟеч вераське но котькинэн огкыл шедьтыны быгатэ. Йырсиосыз пештырскыса кадь уло, малы ке шуоно йыраз бергась малпанъёс но идеяос уг сёто соослы интыязы пукыны. Тӥни сыӵе со – туала азьветлӥсь! Озьыен, оскон вань, азьланяз со роликъёссэ воштоз ини мотоцикллы яке воксё машиналы.

Кыкетӥез юрттӥсьсы воксё Москваысь лыктэм. «Уралистика» сайтэз кылдытӥсь Артём Малых огазеяськонлэсь шуг-секытъёссэ ас сяменыз валэктыны тыршиз, кылдэм шуг-секытъёсты сэрттон-пертчон пумысен малпаськытӥз. Озьы ваньзы ӵош стратегия бордын ужазы. Группаослы люкиськыса, егитъёс туннэ нуналлы кулэ луись ӧръёсъя (медиа, мерлыко улон но экономика, туризм но мукет) азинскон сярысь вераськизы. Палэнысь вуэм удмурт кылэз дышетэм пияш выль кужым но малпанъёс сётӥз шуыса валамон луиз.

Мон ачим но со пумиськонын ужай. Трос выльзэ но пайдаёзэ басьтыса, бурдъёсы нош ик вӧлъяськизы. Осконэ нош ноку но уг быры, асьме ёросамы но егитъёсмы палэнэ уз кыле – «Шундылэн» ужрадъёсаз шумпотыса пыриськылозы. Нош мӧйыос одно ик юрттозы пӧртэм проектъёсты азинтыны.

Любовь ШИРОБОКОВА, ёрос «Шунды» ёзэтлэн кивалтӥсез