Ивор куды (пионер галстук, лемтэйёс, семьялэн нуналыз)

Пионер галстук - дуно эш

Туэ Удмуртиысь пионер движенилы 90 ар тырме. Кылем даурлэн 90-тӥ аръёсозяз пионер луыны тырше вал котькуд дышетскись. Со ним ӝутэ но данъяськытэ вал. Нош кыӵе утьылӥзы пионеръёс галстукъёссэс...

Али озьы ӧвӧл ни. Но ужало мукет огазеяськонъёс, кудъёсыз пыӵатыны тыршо вордскем шаерез яратон мылкыдэз, дышето умой ужъёсты лэсьтыны. Со “Юность”, РСМ, волонтёръёс, “Шунды” но мукетъёсыз. Пионер движенилэсь тужгес пайдаё, ӟечлыко йылолъёссэ кутыса ужало. Нош ёросысьтымы шаертодонъя музеймы но ёрос клуб “Пионер галстук мынам семьяям” нимо сочинениослы конкурс радъяз. Ужъёс вуизы Мукши, Кекоран, Вуж Ӟатча, Ӵошкыт но Чур шор ёзо школаосысь. Мукшиос удмурт сямен но гожтӥллям (кивалтӥсьсы А. Тарасова). Вормисьёслэсь нимъёссэс  но ужъёссэс вуоно номерын печатлалом.

Елена Широбокова, ёрос музейысь тодослыкъя ӧнерчи 

иворъёс

Кибыосты эн гочатэ

Шуныт куазь вуэмен, сайказы кибыос но. Кылем арен ӵошатыса, туэ лемтэйёс ичигес, но арысь аре адямилы паласькись висёнъёссы пӧртэмлыксыя тросгес но тазалыклы кӧшкемытэсь луо. Соин ик сак луон сярысь нош ик тодэ вайытэм потэ.

Вуж Ӟатчаысь участковой эмъюртлэн валтӥсь врачезлэн Ирина Беляевалэн верамезъя, 1-тӥ куартолэзьысен та нуналозь лемтэй куртчиськемен доразы ог 5 адями вазиськиз, тросгес пиналъёс. Кибыез шонер ишкалтыны больницаязы ик юрттӥллям. Пусъёно, кунамы котькуд дышетскись пиналлы лемтэй куртчиськемлэсь прививка сӥзьыл ик пукто. Соин Вуж Ӟатчаослы номырлэсь кышканы, прививка вань ке, со одно юрттоз, висён шедиз ке. Таӵе учыре иммуноглобулин но пуктоно ӧвӧл ни.

Лемтэй тэльын гинэ уг улы, со юртъеръёс котыре но тӧлъя лыктэ, турын пушкын но улэ. Соин сак луоно котьку, тужгес куартолэзе но инвожое.

Семья - улонлэн валтӥсь инъетэз

15-тӥ куартолэзе быдэс дунне семьялэсь нуналзэ пусйиз. Та нуналэз котькуд семья аслаз лыдъяны кулэ, угось котькуд праздник малпамын адямиосты ог-огзылы матэгес карон, шуныт кусыпъёсты юнматон понна.

Ёросамы та нуналэз кин кызьы пусйиз. Тани ёрос загсын 17-тӥ мае “Тӥляд пиналды луоз” нимо котырес ӝӧк ортчиз. Загсысь ужасьёс таӵе пумиськон кыкетӥзэ радъязы ини. Доразы люкаськылӥзы нуны витись анайёс. Пӧртэм пумиськись шуг-секытъёс сярысь вераськизы эмчиос. Льготаос, пособиос сярысь - мер юрттэт сётонъя ёзэтысь ӧнерчиос, Пенсионной фондлэн, МФЦ-лэн, паспорт сётъян пунктлэн кивалтӥсьёссы но мукетъёсыз.

Вуэм нылкышноос нылпизэс оформить  карон, нылпи садэ черодэ султон, пособие басьтон но трос мукет луонлыкъёс сярысь тырмыт но ӟеч тодон-валан басьтӥзы.

Ӵошатскон-эшъяськон

Чурысь семьяос праздникез воксё мукет сямен пусйизы. Соос 18-тӥ куартолэзе “Красный квадрат” спортъя празднике пыриськизы. Черкогурт кузя пуктылэмын вал этапъёс, кудъёсаз котькуд семья пыриськиз шудонэ, ӵошатсконэ яке тодон-валан сынанэ.

Радъяз ваньзэ Чурысь “Позитив” центрлэн (клубзылэн) кивалтӥсез Владислав Янов. Семьяос ужрадэ мыло-кыдо пыриськизы. Пичиез но, бадӟымез но бере кыльыны ӧз тырше. Огъя ӵошатскон эшлыко кусыпъёсты но юнматӥз, семьяослэсь  тазалыксэс  эскеры-

тӥз.

В.ПЕТРОВА