Якшурысь ужбергатӥсь Анатолий Широбоков ужлэсь уг кышка

“Оген номыр ӧй пӧрмысал”

Ужын будэтэм адямибыдэвуыса но ялан уж утча, ӧвӧлэзлэсь ваньзэлэсьтэ. Якшурысь Анатолий Широбоков та амалъя ик улэ.

1984-тӥ арын “Фрунзе” нимо 
колхозэ со кышноеныз ӵош егит специалист луыса вуиз. 
Чебересь, мыло-кыдоесь, 
ужасесь. Анатолий 
Владимирович механике 
кутскиз, кышноез Зоя 
Филипповна колхоз гараже 
нормировщике интыяськиз, собере бухгалтерын ужаз.

Ваньмыз умой мынэ вал гурт возёсын, но 90-тӥ аръёсы быдэс шаермылэн политикаез воштӥськиз. Колхозъёс куашканы кутскизы, кивалтӥсьёс фермер ужез азинтыны дэмлазы. Озьы Якшурысь куинь выжыысь семьяос - Пислегъёс, Кайсыос но Прошъёс (Вениамин Никитин, Владимир (Ив.) Широбоков но Анатолий Широбоков) Бабашуре тубизы. Фермер возёсазы вань пудозэс нуизы. Колхоз пайёссы понна кӧня ке скал сётӥз,. 20 котыр сюроос люкаськизы. Ужаны дышем семьяос ӧз кышкалэ нимазы кариськыны, Якшур-Бӧдьялась молокозаводэ йӧлзэс вузаллязы, гужем турын дасяллязы. Будӥсь пиналъёсты сюдыны-дӥсяны окме вал. Но мылкыд пумен сӥяны кутскиз. Государстволэсь юрттэт ӧвӧл, йӧл дун укыр пичи, азинскыны, возёсэз паськытатыны луонлык ӧвӧл. Анатолий Владимирович мукет уже кошкиз, “Уральская нефть” компание водителе мынӥз. Валамон, уждун татын трослы бадӟым. Кӧняез колхозын ужасьёс кошкизы со аръёсы нефтяникъёс доры? Лыдъянтэм. Ёрмыса улэмез нокинлэн но ӧз поты. Умой уж шедем бере, Широбоковъёс сюлэмзыя корка но пуктӥзы: котькуд сэрегаз кузёезлэн киыз шӧдӥське, ваньмыз лад-лад, кемалы шуыса лэсьтэмын.

Со куспын ик 3 пиналъёссы будӥзы, Андрей но Денис пиоссы вылӥ образование басьтыса, огез “Роснефть” компаниын, мукетыз “Купол” ИМЗ-ын ужало. Настя нылзы ИжГТУ-ын лэсьтӥськонъя факультетын дышетске, I курсэз йылпумъяз ини.

2003-тӥ арын Анатолий Владимирович азьын нош юан султӥз: ма кароно? Ужантӥяз сокращение улэ шедиз, умой уж шедьтыны секыт. Со вакытэ кышноез Зоя Филипповна базарын аслаз лавкаяз вузаське вал ини. Кема малпаськыса ӧз улэ, сямызъя туж чалмыт, йыгмыт пиосмурт вузкарон удысэ вуиз. Райцентрысь базарын палаткаяз ужась кутӥз, ачиз товар вайылӥз, ёросэтӥ вузаса ветлӥз.

Нош 2004-тӥ арын Широбоковъёс Якшур гуртэ асьсэлэсь магазинзэс пуктӥзы. Якшур калык паймиз но, шумпотӥз но, кин ке, оло, вожъяськиз но. Мукет пал ласянь, вань кытысь товар бырйыны: кытын дунтэмгес, кытӥ выльгес, кытӥ воксё адӟылымтэ на. Кинлы ке нош - ужан инты. Котькуд пал ласянь “Находка” магазин якшуръёслы пайдаё луэ. Нош кузёезлэн сюлмаськонъёсыз сярысь огшоры басьяськись уг тоды, медам но тоды, сотэк но гурт калыклы йыр висён шеде. Магазин ужа ке, озьыен Анатолий Владимирович дырыз дыръя кулэ товар вайиз, нош Зоя Филипповна тыл но газ понна коньдон тыриз, налоговой инспекцилы, тылпу кысӥсьёслы ветнадзорлы кулэ отчётъёс дасяз, вузкарисьёсызлы уждун сётӥз. Озьы котькуд толэзь. Таӵе сюлмаськонэз котькин уз вормы, зол сямо адями гинэ. Зоя Филипповна но Анатолий Владимирович ог-огзэс туж гажало но дунъяло, оген номыр но ӧй пӧрмысал, шуо.

Бен, оген котькыӵе ужез бергатыны секыт. Магазин возем сяна, та семьялэн хозяйствоез но мар ке быдӟа: 2 этажъем корка, 50 соткаем бакча, пудо, мушъёс, трактор, машина, пиналъёслы пуктӥськись корка. Магазин вылын гинэ ул вылэм, но чидалоз шат Анатолий Владимирович? Гуртын будэм адями, ужлэсь дунзэ валась пиосмурт ноку одӥг вормонэн уз буйгатскы. Со шудо уженыз, яратоно кышноеныз но пиналъёсыныз.

26-тӥ инвожое Прош выжыысь Толиклы 50 арес тырмиз. Солэн ваньмыз азьпалан на. Зоя Филипповна но пиналъёсыз сюлмысь ӟечкылало сое юбилееныз, кужым, тазалык но выль вормонъёс сӥзё. Нош соослэсь яратэмзэс Анатолий Владимирович котькуд нунал шӧдэ.

В. ПЕТРОВА