Мӧзмыт ке но, оскон сётӥсь Арлыдо адямиослы номыр но кулэ ӧвӧл ни шуыса веран туж шонертэм. Улыны ми ум дыртӥське ини, со озьы. Мар малпамын, дырыз дыръя лэсьтэмын. Али ми ваньзэ рос-прос, гань-гань, дыртытэк лэсьтыны быгатӥськом. Дырлэсь куремзэ ум учкиське, сюлэмъя, ас мылкыдъя выриськом. Но егит дыр тодэ лыктылэ ик.
“Дружба” колхозын ужам аръёсы син
азям нырысь ик пуксьыло. Егитъёс соку ужын но азьпалскылӥзы,
шулдыръяськонъёсын но асьсэды йӧскадь возизы.
Котькуд празднике тупась кырӟанъёс но
быдэсъязы. Пиосмуртъёс сокем трос кырӟаса
ӧз ке но луэ, ваньзы тодо вал, ку но мае кырӟано.
Тани армие келянъёс но чал-чал ӧз ортчылэ,
вань келясьёс кошкись пияшлэсь мылкыдзэ ӝутыны
вырылӥзы. Мылкыд нош ӝожмыт
луэ вал ӵыжы-выжыосты, эшъёсты
кельтӥськод шуыса. Али тросэз егитъёс армилэсь
кышкало, отчы дедовщинаен сэрен мынэмзы уг поты. Нош азьло армие ветлымтэ пи
шоры нылъёс но мукет синмын учко вал, кин ке жаляса, кин ке пыкылыса. Армие
ветлон сярысь пиос пичи дырысенызы ик малпало вал ини. Мӧйыос
сьӧры быж сямен ветлылӥзы,
вань йылолъёсты йыразы кельтылӥзы. Кырӟан
котьку мылкыдэз возьматылӥз: шулдыр, мӧзмыт,
оскытӥсь яке пыраклы люкись.
Егит дыры Кунянгуртын ортчиз
бере, тодам лыктэ одӥг гур, сое кырӟало
вал вуоно солдатъёс, коркаысьтызы кошкыкузы:
Ой, кылёз ук кылёз
Шур уллань но возьёсыд, 2 пол
Ой, эшшо но кылёз на
Ӵош ужам
эшъёсыд. 2 пол
Ой, кылёз ук кылёз
Вордэм анай-атаед, 2 пол
Ой, эшшо но кылёз на
Карточка кадь агаед. 2 пол
Ой, кылёз ук кылёз на
Сюй мунё кадь апаед, 2 пол
Ой, эшшо но кылёз на
Яратоно нылмуртэд. 2 пол
Мӧзмыт
кадь кырӟан, но со дыре ик
пияш тодэ: сое витё но ярато. Та гур ӵем
гинэ йырам берга, угось со оскон сётэ вал егитъёслы, ваньмыз умой луоз шуыса.
Николай ШКЛЯЕВ.
Сосновой гурт
Комментариев нет:
Отправить комментарий