Якшурысь пиналъёс пайдаё шутэтско (Як-Бодья)

Гочатӥсь гужем дыр

Кин тужгес чидатэк вите гужемез? Кин азьло ик тодэ, ма кароз гужемлэн котькуд нуналаз? Конешно, пиналъёс. “Шутэтсконо, шудоно, бызьылоно, лагере ветлоно - тани со одно ик быдэстоно “ужъёс”.

Якшурысь Саша Широбоков но Захар Широбоков гимназиын ӵош дышетско, вуоно сӥзьыл соос 3-а классэ мынозы. Нош али пиос дышетскон сярысь уг малпасько, вань мылкыдзэс ульчалы сёто. Захар та дыре гимназие школьной лагере ветлэ ик, нош ӝытъёсы якшур пиналъёс гурт клубазы мыно, отын кык час ӵоже дырзэс шулдыр ортчыто. Клубын ужась Людмила Широбокова вера:

- Пиналъёсмы гуртамы али лачак, 20 пала ветло дорамы. Пичиез но, бадӟымез но - 1-8 классъёс. Куспазы соос ӵашето но, эшъясько но. Пиос тросгес бере, куд-дыръя чурытгес но кариськоно луэ. Но шудон кутске ке, ваньзы сак карисько. Бызьылон-а со, ватскыса шудон-а, бабыса улӥд ке, бере кылёд. Нош ӵошатскон - со пиналъёслэн али валтӥсь мылкыдзы. Котькудӥзлэн азьпал вуэмез потэ, кужмогес но чупресгес луэмез потэ.

Соин ик, пӧсятозь бызьылэмен ӵош, гань гань пукон дыр но луыны кулэ. Соиз сярысь библиотекаын ужась Ирина Широбокова сюлмаське. Котькуд пумиськонэз кыӵе ке темалы сӥзе: Пушкинлэн нуналыз, котырысь инкуазь но мукет. Со темаосъя ик йырвизь эскерон викторина ортчытэ. Капчияк, укыр секыт юанъёстэк, но пайдаен.

Гужем вакыт али гинэ кутскиз кадь. Но ортчемзэ валаса но уд быдты, сокем чаль со кошкоз. Пумен дышетскон ар вуоз, сюлмаськонъёс кутскозы, со дыре ик тунсыко ужрадъёс но. Веть дышетскем сяна, тросэз мыло-кыдо пиналъёс олокыӵе но ӵошатсконъёсы ветло. Тани Сашикен Захарен туэ тулыс “Ут ренняя звезда” конкурсэ пыриськизы, нырысьсэ ӵош кырӟазы. Пичи кырӟасьёс туэ туж трос вал ке но, якшур пиос ӧз кӧбералэ, “Дуэт” номинациын куинетӥ инты басьтӥзы. Дасяз соосты клубын ужась Вера Загребина. Тау солы со понна, азьланяз но та пиос медам палэнске кырӟан удыслэсь, ӟучъёссэ сяна, удмурт крезьгуръёсты но мед дышетозы. Соос ке ӧз азинтэ удмурт кылзэс, кин-о калыкез шумпоттоз на?

Нош али пиналъёс, Захар но, Сашик но, Иви но, Лена но мукетъёсыз - ваньзы мед шутэтскозы. Гужем гочатэ шулдыр куазеныз. Пичиосты ульчае, возь вылэ, шур доры ӧте.

В.ПЕТРОВА