Марфа Морозовалэн нылпи дуннеез
- Война дыръя пиналъёс, сиськемзы потэмен, парта сьӧразы ик умме усё вал,-
вера 50 ареслэсь трос школаын ужам Зеглудысь дано дышетӥсь Марфа Яковлевна Морозова.- Соин колхозлэсь луд кури, гужем отчы бакча
сиён, сезьы но йыды кизьылӥмы, толалтэ йыдылэсь
кеньырен ӝук, сезьы пызьлэсь кисаль пӧзьтыса сиылӥмы. Пиналъёс вожмаськыса ик сиё вал ваньзэ, дышетскыны кужымзы но потылӥз.
1941-тӥ арын 21 инвожое Марфа Морозова Вуж Ӟатча школаез
йылпумъяз. Берпуметӥ ӝытсы шулдыр ортчиз. Шумпотон, капчи мылкыд, азьланезлы
оскон... Егитъёс ӧз но малпалэ, Совето Союзлэн кунгожез доры фашистъёс
омырско ни, ӵуказеяз ик пиосты фронтэ нуозы шуыса. Веть соослы
тросэзлы 18 тырмемын ни, ӵапак армие мынон дырыз вуэмын. Марфалэн но тани-тани
вордскем нуналыз, 23 инвожое. Но шумпотон кышкыт иворен пазьгиськиз: война.
Фронтэ кошкизы вань таза пиосмуртъёс, пӧлазы дышетӥсьёс но. Вуж Ӟатча ёросысь роноен
соку кивалтэ вал Василий Михайлович Емельянов, Марфаез дышетэм пиосмурт.
“Школае ужаны мынод-а?”- юаз. Кышкыт ке но вал, нылаш дӥсьтӥз, соглаш луиз. Озьы
со 2 но 4 классъёсты кутӥз. Быдэс ар Марфа Яковлевна ужантӥяз пыдын ветлӥз. Мукет араз егит
нылаш аслаз школаяз, Зеглудэ куриськиз. Тӥни отын ини Марфа Морозова пиналъёсын
сюлмысь ужаны быгатэмзэ паськыт возьматӥз. Со вакытэ ик 1945-тӥ арын Ижысь
педагогической училищеез йылпумъяз. Ачиз со вера:
- Пиналъёсы либытэсь вал, дышетскыны мылкыдзы зол шӧдӥськылӥз. Телевизор, радио ӧй вал, книга сётылӥз вань выльзэ.
Нылпиос адӟо вал ук, дышетскем адями умойгес уж шедьтэ, чебергес
дӥсяське. Нош али улонлэсь вань луонлыкъёссэ, гочатӥсь арбериоссэ соос
пичи дырысен адӟо: телевизор, телефон, чебер дӥсь но ческыт сиён.
Ваньмыз вань бере ини, дышетсконлэн кулэлыкез лябомемын. Соин дышетӥсь но пиналъёс понна
куддыръя адӟем карымон уг луы ни. Таиз, конешно, туж ик умой ӧвӧл. Дышетскон быдэ
вуымтэослы нырысетӥ интыын ик сылыны кулэ. Соос мед валалозы, школае тэк
пукыны уг ветло, отын быдэс улонлы инъет сёто.
Улонзылы йыг-йыг инъет сётэмез понна Марфа Яковлевнаез куд-ог
дышетскисьёсыз али но уг вунэто. Тани Селычкаын улӥсь Даниловцыысь потэм
Зоя Алексеевна Кусова ачиз но пенсие потэмын ни, но нырысетӥ дышетӥсьсэ со уг вунэты,
одно ик жингыръя, тазалыкез сярысь сюлмаське яке дышетӥсьлэн нуналэныз ӟечкыла. Нылъёс гинэ
мар, армие кошкем пиос но Марфа Яковлевналы службазы сярысь гожъяллязы, кыкетӥ анай шуылӥзы, зол гажазы.
Дышетӥсьлэн ужан сюресэз туж секыт аръёсы мытӥськиз. Визьнод сётэм
сяна, егит нылашлы малпаськоно луиз нылпиослэн кӧтъёссы тыро мед луозы шуыса, партаоссы
вылын бумага но перо мед кыллёзы шуыса. Но нырысь ик солы тыршоно луиз удмурт
пиналъёслэсь дӥсьтонзэс поттон, но ӟуч сямен чебер
вераськыны дышетон бордын. Макем усьтылӥз сюлэмзэ нылпиос азьын, сокем соос но
кыстӥськизы сётэм тодон-валанэз пыӵатыны. Марфа Яковлевна гурт пиналъёсты
жалялляз ке но, туж юн курылӥз но: сётэм ужез котьку пумозяз но дырыз-дыръя
лэсьтоно, сотэк адями уз дышы кыл кутонлы. Вал та дышетӥсьлэн воксё нимысьтыз
пусйымон учырез но. Палэнысь лыктэм ӟуч семьяысь пинал, толэзь но ортчытэк,
удмурт сямен вераськыны кутскем. Анаез Марфа Яковлевналы йыркуръяськытэк гинэ
верам: “Пиналме уг валаськы ни, сокем чаль удмурт кыллы дышиз, мар каром?”
Конешно, кышномурт но дышетӥсь огкыл шедьтӥзы, ог-огзылы юрттӥзы. Кызьы сотэк?
Котькуд гуртын дышетӥсь син азьын вал уго.
Марфа Морозовалэсь урокъёссэ учкыны ветло вал быдэс ёросысь но мукет
районъёсысь дышетӥсьёс. Роноысь ӧнерчиос котьку пусйылӥзы солэсь юн
мылкыдзэ, ваньзэ синйылтыны быгатэмзэ. Сюлмысь ужамзэ адӟытэк ӧз кыле. Марфа
Яковлевна дышетӥсьёслэн съездъёсазы Ижкаре ветлылӥз, нош 1960-тӥ арын Москвае но вуылӥз, Кремле пыраз.
1972-тӥ арын солы национальной классъёслы лыдӟиськон пособие дасяны ӵектӥзы. Кӧня книга бугыръяз
дышетӥсь, лыдъянтэм. Ижкаре сяна, Москвае но ветлоно луиз, отын со Александра
Мазукабзоваен, книгалэн кыкетӥ дасясеныз пумиськылӥз. Озьы, 1979-тӥ арын быдэс Совето
Союз адӟиз “Искорка” нимо пособиез. 100000 тиражъем книга берлогес эшшо кык пол
печатласькиз. Кин тодӥз, Марфа Яковлевна пичи удмурт гуртын ужа шуыса?
Тросэз ик ӧз, но тыршемез быдэс шаермылы пайда сётӥз, кӧня гурт пиналъёслы
дышетсконазы юрттэт луиз.
Марфа Яковлевналэсь грамотаоссэ но медальёссэ адӟыса гинэ валаськод,
макем гажазы но данъязы сое. Нырысь со шаерамы дано дышетӥсь луиз (1957),
собере быдэс РСФСР-ын (1960). 1971-тӥ арын сое Трудового Красного Знамени
орденэн пусйизы. Война аръёсы ужамез, вань улонзэ дышетон удыслы сётэмез понна
медальёс но мукет гадьпусъёс. 1950-1991-тӥ аръёсы Варавай сельсоветын депутатын улӥз, 18 ар Зеглудысь
ветеранъёслэн кенешенызы кивалтӥз. Ас вакытаз “Ошмес” газетын кылбуръёсыз но потазы.
1978-тӥ арын пенсие потыса, кема ужаз на яратоно Зеглуд школаяз. 90-тӥ аръёсы но сое ӧтьылӥзы на юрттыны. Нош туэ Марфа Морозовалы 90
ар тырмиз. Улэ со вазь кошкем сузэрезлэн нылыз дорын, Варавай гуртын. Ольга
Алексеевна Ашихмина но мукет племянницаосыз солы нылъёсыз кадь луизы. Ярато но
гажало юн сюлмо апазэс, котькуд куронзэ быдэстыны тыршо. Пырак дышетскисьёс
сямен.
 |
| Марфа Морозова кыкетӥ радын паллянысен витетӥез сылэ |
Огзэ нокызьы но юатэк ӧй чида: “Кызьы бен сыӵе йӧно, чебер но визьмо нылаш семья ӧз кылдыты?” Марфа
Яковлевна мӧзмыт кариськиз: “Нокызьы но ӧй вунэты нырысетӥ яратонме. Ож кутскем
бере, со Ижын лётчикъёслы курсъёсты ортчиз но фронтэ кошкиз, бырыны шедиз. Нош юасьёс вал, кызьы сотэк...”
Тӥни озьы. Юн сямыз яратоназ но пыӵам, вань улонзэ одӥг пияш борды думем.
Таӵе яратонлы синмаськыны гинэ кыле на... Ӧвӧл ни табере кускозь усись сьӧд йырси пунэтъёс,
лябомизы ини киос, пыдъёс. Мукетэсь ини туала пиналъёс... Но сыӵе ик сак учке Марфа
Морозова адями шоры, дунъя но валаны тырше малпанъёссэ. Дышетӥсь, психолог, юрттӥсь но валась. Ма
понна гажазы сое гуртоосыз, со понна ик дунъязы кивалтӥсьёс. Ӟечкыласьком Марфа
Яковлевнаез вордскем нуналэныз, юн тазалык но сайкыт мылкыд сӥзиськом солы! Вань
улонзэ нылпиослы сӥземез понна музъемозь йыбырттӥськом.
Вера ВАХРУШЕВА
Комментариев нет:
Отправить комментарий