Галстуклы сӥзем конкурсын 4-6 классъёс пӧлын вормиз Чурысь Вика Пантюхина

Пионерилы -90 ар

Галстук азьлане сюрес усьтӥз 

“Взвейтесь кострами, синие ночи,

Мы пионеры - дети рабочих...” -

озьы кутске вал тодмо кырӟан - вань пионеръёслэн гимнзы. Та кырӟанэн ик пионере пыризы мынам прабабушкае, бабушкае но мамае. Пӧртэм вакытъёсы соос пионер луизы, но котькудӥз тодаз возе со аръёссэ.

1936 арын пичи нылаш Нина Стремоусова, прабабушкае, нырысетӥзэ горд галстук керттӥз. “Мон туж данъяськи, пионер луи шуыса,- тодаз вае со.- Котькуд нунал мамае сое гладить карылӥз. Курмытыны кышкасько вал. Пукон вылэ ӝикытак  ошылӥ”. Война азьын аръёс туж секытэсь вал, калык сютэк улӥз. Прабабушкае ӵош дышетскись эшъёсыныз бусыосысь усем шепъёсты октылӥз. Тужгес тыршисьёссэ линейкаын пусйылӥзы. Пичи Ниналы но шуд усиз ваньзы азе потаны, трос шеп октэмез понна ушъямез кылзыны. Со дырзэ тодаз вайыса, бабушелэн синвуосыз ик потыло. Яратэ вал со эшъёсыныз тимуровской ужез но. Пересьёс доры мыныкузы, одно ик галстуксэс кертто вал. Мед адӟозы, пионеръёс лыкто...

1958 ар. Куартолэзь. Вормон нуналысен 13 ар ортчиз ни. Табере мынам бабуше Таня Кочурова гуртаз лобаса бертэ: со туннэ пионер луиз. Ӧс куспын тӧдьы халатэн сылӥсь папаез (со врач) пумита нылзэ, ӟыгыртэ но чупа. Нылаш уг тоды на, ӵуказе солэн ӵыж-горд галстукез  уз луы. Вить аресъем пичи сузэрез сое мунёезлы шуыса вандылоз. “Мон понна соку улон быриз,- мыняса вера бабуше.- Со нуналэ школае но ӧй мыны. Кызьы озьы, ваньзы галстукъёсын, нош мон ӧвӧл. Папае тодмоезлы райцентре жингыртӥз, ӝытазе мон азьын ӵыж-выль галстук кылле вал ини”. Тӥни озьы кутскиз Таня Кочуровалэн пионер сюресэз. Собере вал сборъёс, дружинаос, походъёс, тылскем дорын пуконъёс, вожатойёс - ваньмыз яркытэз, мае адӟизы кылем даурлэн 60-70-тӥ аръёсаз улэм пиналъёс.

1980 арын куартолэзе ик торжественной линейкаын галстук керттӥзы 4-тӥ классын дышетскись Галя Яковлевалы, мынам мамаелы. Со али но тодэ со кылъёсты: “Галстуктэ керттӥд ке, утялты сое, со веть асьме знамяен одӥг буёлэн...”. Нырысь сое отрядэзлэн председателе пуктӥзы, собере пионер дружиналэн йырыз луиз. “Райцентрын ортчылӥсь сборъёсын пионер галстукъёс горд макъёс кадь адско вал,- шуэ мамае но йылтэ,- галстук улонэ сюрес сётӥз”. Тужгес зол пыӵаз сюлмаз “Орлёнок” лагере ветлэмез. Удмуртиысь пиналъёс “Звездная” дружинае шедизы, кудзэ бурд улазы возизы космонавтъёс. Пиналъёс ӵем ветлылӥзы Туапсе город доры, отын интыяське вал “Звёздный городок”. Отын космосэ ветлэмзы бере тазалыксэс юнмато вал космонавтъёс. Мамаелы сыӵе экскурсия витьымтэ учыр кузьмаз. Со ӧй луысал, мамае пионер галстуксэ ӧй ке вунэтысал. Городоке вуэмзы бере, соосты музее нуизы отын космонавтъёслы быдэс дуннеысь вуэм кузьымъёс люкамын вал. 13 аресъем Галяез туж паймытӥзы Вьетнамысь пунэм сандалиос, сакырлэсь кисьтэм Ленинлэн монументэз (нюлыса ик шӧмзэ эскериллям ай пиналъёс). Собере тужгес тунсыкоез - Лебедев космонавтэн пумиськон. Мамае солы лачак юанъёс сётъям, соин, лэся, ярам Лебедевлы. Туспуктэм лэсьтыны пуксиллям но, мамае соку гинэ валам, галстуксэ керттыны вунэтэм шуыса. Космонавт сое буйгатэм, аслэсьтыз керттэм. Озьы мамаелэн кык галстукез луэм. Туж дуно тодэ ваёнъёсын герӟаськемын кыкез ик.

Дыр чаль кошке. Пионерилы туэ 90 ар. Трос-а со, ичи-а? “Со мынэсьтым куинь арлы гинэ бадӟым”,- шуэ прабабушкае.- Озьыен, егит на”. Пионер улон сярысь тодэ ваёнъёс котьку вылесь, сайкытэсь мед луозы, веть будӥсь нунокъёс со сярысь котьку нырысьсэ кылылозы...

Вика ПАНТЮХИНА.

5 класс, Чур шор ёзо школа. Кивалтӥсез: Галина Пантюхина