Ас вылам мертамын: Лӧптэм мылкыд – нылпилэн кужымез

Ас вылам мертамын

Лӧптэм мылкыд – нылпилэн кужымез

Анай-атайёс котькуд ар тыршо нылпиоссэс гужем лагерьёсы интыяны. Угось, пиналъёс понна со шулдыр шутэтскон но выль тодматсконъёс. Нош малпаськоно ке, ма пыр гинэ уг ортчы нылпи, отчы вуэ ке. Ваньмыныз соин «тодматсконо» луиз нырысетӥ нуналысен ик аслым но, вожатоен ужаны интыяськи бере.

Секыт югдуре шедем нылпиосты «Шунды» огазеяськон таяз аре нырысетӥзэ люказ. Лагерной сменаез «Тулкым» нимазы. Ортчиз со Дэри ёросысь «Ёлочка» легерьын. Огшоры гинэ сыче ним удмурт сменалы ӧвӧл сётэмын вылэм. Дас нунал куспын, зэм но, зол гинэ тулкымъяськизы ваньзы: 38 кузя нылпиос но, соосын ужась ньыль вожатойёс но. Быдэс элькунысьтымы  люкам нылпиослэсь лӧптэм мылкыдзэс кобыен омыръяны луэ вал, сокем трос эмоциос басьтӥллям соос лагерьын шутэтскон куспын.

Ужазы куинь оръёс (направлениос). Театральной искусствоез нуиз Ижкарысь музыкальной колледжын дышетскись студентка Анна Пислегина, Киужъёсын вырыны Ижкарысь нылпи садлэн воспитателез Эмма Андреева дышетӥз, со ик вал сменалэн начальникез. «Журналистика» удыслэн аспӧртэмлыкъёсыныз нылпиосты тодматӥ мон - "Рассвет" газетлэн корреспондентэз. Эшшо одӥгез юрттӥсьмы вал Ирина Агеева, удмурт факультетын дышетскись студентка. Со нылпиос понна трос пӧртэм шудонъёс но ужрадъёс малпалляз, озьы ик ӟеч сиськемзы понна кыл кутӥз.

Кельшись удысэз бырйыкузы, куд-ог нылпиос шугъяськизы. Нырысетиӥ кыкеныз соос школаын кызьы но озьы выремын вал ини, нош журналистикаен тодматсконо луиз нырысетӥзэ. Пумозяз отрядъёс люкиськизы куинетӥ нуналаз гинэ. Соку ик валамон луиз, мон доры шедизы самой укылтэмъёсыз, одӥг интыязы пукыны ӵыдисьтэмъёсыз. Ӧжыт кышкай но вал, кызьы мон соосын ужало! Соос кылзӥськыны но уг быгато кадь потӥз, палэнысен учкыса. Нырысетӥ занятиын ик малпай: «Ваньдэсты одно ик киям куто». Серекъясьтэм тусо кариськыса валэктыны кутски, ма со сыӵе журналистика но газет поттон, кыӵе аспӧртэмлыкъёсыз но луонлыкъёсыз вань та удысын. Сак кылзӥськизы. Куд-огез мае ке гожтыса но кельтэм ас блокнотаз. Со азьын ваньзэсты сочинение гожтытӥ, котькудӥзлэсь гожъяськыны быгатонлыксэ мертан-ӵошатон понна. Мынам малпамея, нылпилэн ляб сочинениысьтыз но аспӧртэмлыксэ шедьтыны луэ. Озьы котькудӥзлэсь кулэ луэмзэ пусйыны тырши. Уката но шумпотыса нылпиосы кутскизы асьсэлы псевдонимъёс малпаны. Кыӵе гинэ нимъёс ӧз кылдэ соку: Ӟоз Ваня, Оки, Инвожо, СтепанНюк, NevosВан, МаксимЧи но мукетъёсыз. Кушем нимъёссы смена ӵоже зол гинэ куд-огъёсызлы лякиськиллям.

Газет поттон бордын ужакумы, котькуд ныллэн но пилэн аслаз нимысьтыз ужез вал. Редактор корреспондентъёсын ӵош малпалляз темаосты, рубрикаосты но котькуд полосаысь статьяослы инты мерталляз. Малпамзы бере корреспондентъёс утчаса ветлӥзы иворъёс, интервью басьтыны дышетскизы, нылпиослэн юанъёссылы валэктонъёс утчаны тыршизы. Уката тунсыко потӥз ваньзылы Индиысь лыктэм вожатойёсын тодматскон. Ӵапак пресс-конференция кадь ортчиз со пумиськонмы. Нылпиос соку гинэ валазы кадь, малы кулэ школаын англи кылэз дышетон. Фотографъёсмы но соку зол гинэ ужазы: котькуд нылпилэн сыӵе тунсыко но котьку пальпотӥсь адямиосын туспуксемез потӥз.

Куноос сярысь вераськоно ке, соос котькуд нунал вуылизы кадь «Тулкыме». То «Мынам Удмуртие» телеканалысь ужасьёс, то егит калыкен ужанъя министр Владимир Соловьёв, то Ижкарысь кизилиос Николай Анисимов но Алина Антонова но трос мукет ӧнерчиос. Соос понна милям нимысьтыз баммы но висъямын вал: «Куно пумитан дунне» шуыса нимазы сое нылпиос. Нимысьтыз бам люкамын вал «Тазалык дуннелы». Отчы пыризы нылпиослэн спортивной ужрадъёсы пыриськемзы но вормонъёссы сярысь статьяос. Корреспондентъёслэсь гожтэм статьяоссэс лад-лад эскерылӥз но компьютерен набирать карылӥз корректор-наборщик, собере ини, текстъёсты но фотоосты бумага вылэ поттэм бере, вёрсткая дизайнеръёс редакторен ӵош малпаськылӥзы, кытчы мае интыяны. Статьяослэсь но рубрикаослэсь нимъёссэс гожъяллязы нимысьтыз адямиос, угось котькуд пиналлэн аслаз нокытын пумиськисьтэм почеркез. Газетлы логотип но асьсэос суредазы, котькуд бамлэсь дуръёссэ чеберман понна узоръёс но малпазы. Палэнысен шумпотыса гинэ учкылӥ мон соослэн тыршыса ужамзы шоры. Ма соослэн пӧрмиз, учкыны быгатӥськоды туспуктэмъёсысь та ссылкая http://vk.com/club55392207.

Зэмзэ вераса, мон малпай вал, ужмы шоро-куспо ортчоз шуыса, вуэ куштэм кӧльылэсь кылдэм тулкым быдӟа гинэ вӧлмытскоз. Нош берпуметӥ нуналаз валамон луиз, ужмылэн емышез быдэс гуртэз яке воксё быдэс карез ик гылтыса кошкысал оло – собыдӟа энергетика потэ вал нылпиослэсь. Сокем зол эшъяськиллям вылэм соос дас нунал куспын. Нырысетӥ нуналаз ик гуртэ куриськисьёс эшшо кӧня ке нуналлы кылемзы потӥз. Ма карод, гуртлэсь мӧзмон вормиз ик. Доразы нош маке быдӟа котомка тыр лӧптэм мылкыдын но тодэ ваёнъёсын бертӥзы. Вуоно арын та смена нош ик радъямын луоз. Вуоно пумиськытозь, «тулкымъёс»!

Любовь ШИРОБОКОВА