Ӝыны ар ӵоже ёросамы 8 пожар вал

Тылпуэз ӝутскемезлэсь азьло алоно. Со уг жаля...

Арысь аре тылпу кысонлы малпам арбериос выльмо но чупресгес ужаны луонлык сёто, со сяна МЧС но тылпу кысӥсьёс тыл потонтэм вылысь алон ужрадъёс ялан

ортчыло. Озьы ке но, горд атас пичи ке но потон муг шедьтэ ке, вань кужмыныз омырске тэльёс но улон интыос вылэ. Ӵемысь та кӧшкемыт учыръёсын янгыш луэ ачиз адями.

Ёросамы арлэн кутсконысеныз та дырлы 8 пол пожар ӝутскылӥз (сомында ик кылем арлэн I палараз лыдъяськиз). Ярам, быремъёс туэ ӧвӧл (кылем арын 4 адями улонысь кошкиз). Сӧсырмыны шедизы 2 мурт (кылем арын - 1). Бырем ваньбурлэн дуныз 500 сюрс манет котыр люкаськиз.

Ваньбурлэн тӧлъя кошкемез куд-огезлэсь вань улонзэ тӥя, пыд йылаз султыны озьы гинэ уг сёты. Соин ик чакласьконо азьло ик. Вылӥгес верам ни вал, ӵемысь янгыш луэ ачиз адями. Тани лыдпусъёс, кудъёсыз та верамез жаляса верано, юнмато:

1. тылэн эскериськытэк выремен, 3 хозяйство ӝуаз;

2. эстӥськон гурез тупатъятэк воземен, 1 пол тылпу потӥз;

3. юри сутэмен сэрен 2 юртъер ӝуаз, сӧсырмыны шедиз 2 адями;

4. проводкаез шонертэм кыскемен 2 пол тыл ӝутскиз.

Кытын бен ӵемгес горд атас “кузёяське”?

Ватыса ум улэ - юись семьяослэн юртъеръёсазы. Асьсэос-а уг эскерисько, муртъёс-а “юртто”, котькыӵеез луэ. Тани Чурын тыл потылӥз 1 пол юри сутэмен, квартиралэн кузёосыз асьсэос йыртэмаллям. Выжоилын сарай ӝуаз, кык адями сутскыны шедиз. Лигронын 2 квартираем корка ӝуаз, кытын ӧжыт гинэ пересь кышномурт ӧз быры. Таиз уж, 270 сюрс тыр ваньбур быремен валче пуш ужъёсъя ёзэтэ (отдел внутренних дел) сётэмын. Кык пол тыл ӝутскылӥз Якшур-Бӧдьяын. Огполаз гужем корка, сарай ӝуазы, кыкетӥяз улоно корка пеньӟиз. Тужгес ӵем тылпу ӝутскылэ Селычка МО-ысь “Меридиан” сад-бакча товариществоын. Отын 3 суткем учыръёс пусъемын. Татысь бакчаосты Ижысь пунэмъёссы понна кошкем муртъёс басьто. Коркаоссэс йӧнала уг эскеро, проводкаен йыртэмало, азбаръёсысьтызы тылскемъёссэс  пумозяз уг кысо. Тӧл туэ ялан пельтэ, та шутозь кысэм эгыр но пуроме. Тани алигес ортчем пожаръёс “Меридианын” ик вал, 5-тӥ но 7-тӥ инвожое. Берпуметӥ учыре 4х4 метръем корка ӝуаз, кузёослэн тылскемзэс уйлы йӧнала кысымтэенызы.

Соин ик, эшшо но эшшо огпол тодады вайытӥськом: гужем пӧсь, тӧло, тыл туж чаль омырске. Алон (профилактической) ужрадъёсты ми ялан ортчытъяськом. Та дырлы 64 трос квартираем коркаез эскеримы, 596 ас понназы сылӥсь хозяйствоосы пырамы (пӧлазы 112 трос нылпиё семьяос, 87 огназы улӥсь пересьёс, 199 секыт югдуре шедемъёс). Со сяна калыкез 64 пол сходъёсы люкаллямы. Ваньзэ лыдъяса, 5298 муртэн тылпу ӝутскемлэн мугъёсыз сярысь вераськонъёс ортчытэмын. Пусъем потэ, ми шараям янгышъёс, нарушениос понна штраф ум тырытӥське, ми утиськоно амалъёсын тодматӥськом, кызьы шекъёсты тупатоно, валэктӥськом.

Чаклаське, эскериське, азьланез сярысь али ик малпалэ, гажано лыдӟисьёс. Гужем куазь уг жаля, пӧсеныз шумпоттэм сяна, пӧсекъятэ но.

Пётр АБДАСОВ,

ПЧ-43-лэн кивалтӥсез