Мусо вордскем палы
Арысь аре ёросысьтымы юбиляр
луись гуртъёсын - быремъёсаз но калыкен тыроосаз - тужгес но сюлмо улӥсьёсыз,
отысь потэмъёсыз праздник ортчыто, шаеретӥмы
пазьгиськем калыкез огинэ люкало.
Тужгес но сюлэм шымырске соку, куке
тон лыктӥськод вордскем
гуртэдлэн бушам интыяз. Уг сыло ни кылем
кенеръёс, кырыжам дыборъёс (дворъёс), куке но тап-тап лёгем сюресэз но ожо
басьтэм ини. Озьы ке но, тодэ ваёнъёсын ваньмыз улэп. Пичи дыр, ӵош
шудэм эшъёс, лушкем интыос, ошмес, школа, колхоз гидъёс но мукет тодметъёс син
азе яркыт суредэн пуксё. Мар веранэз, али улоно гуртъёсын но тросэз воштӥськиз
ини, ӝутскизы чебер коркаос, кылдӥзы
выль ульчаос... Яке тани мукет суред: пытсаськиз начальной школа, собере нылпи
сад, медпункт. Мӧзмыса сыло куке но
шудо куараосын тырмем юртъеръёс. Улон воштӥське...
Но калык улэ, ог интыяз уг сылы, вордскем гуртэныз ӵош
азинске, палэнын улыса но, сое уг вунэты.
Со сярысь ик вера, кылсярысь,
Богородскын вордскем гажано эшмы, Мукшиын улӥсь
дышетӥсь Надежда Гильманшина:
Гуртэ мынам, гуртэ,
Бадӟым
ик тон ӧвӧл.
Нош бертэмлы быдэ
Монэ веша ӵук
тӧл.
Веша но эркия,
Ӧте, дораз
кыске.
Агай кадь мусоя,
Юрттэмелы оске.
Татӥ
бызьылыкум,
Мон вал, дыр, туж шудо.
Доре нош бертыкум,
Мылкыдъёсы дырто.
Вутто соос монэ
Ужась калык пӧлы.
Уг вунэты тонэ,
Мусо вордскем палы.
Котькуд гурт улӥсьёссэ,
пиналъёссэ выль ужъёслы мылкыдъя, куд-огзэ кылбур гожтонлы но ӝутэ.
Туэ но ёросамы вань гуртъёс, кудъёсызлы котырес лыдпус тырме. Оло, соос сярысь
но кин ке чебер чуръёс гожтоз? Тнаи со юбиляръёс:
Лынвай (1813) - 200 ар
Средний Уйвай (1868) - 145 ар
Зеглуд (1848) - 165 ар
Каравай (1848) - 165 ар
Алгазы (1838) - 175 ар
Порва (1648) - 365 ар
Нижний Пислеглуд (1693) - 320 ар
Якшур (1678) - 335 ар
Патраки (1863) - 150 ар
Куртчум (1928) - 85 ар.
Лыдпусъёс кутэмын ёрос музейысь.
Гажано лыдӟисьёсмылэн кыӵе
ке йылтонъёссы, юанъёссы луизы ке, одно ик жингыртэ редакцие.
Вера ВАХРУШЕВА
Комментариев нет:
Отправить комментарий