Якшур-Бӧдья ёросысь ветслужбалы 100 ар тырмиз. Кочишысь Зоя Эсенкулова 21 ар пудо эмъя ини

Уж юрттэ чиданы

100 ар ӵоже ёросамы пудо эмъясьёслэн службазы ужа ини. Кылем даурлэн кутсконаз адями эмъян удыс но соку гинэ пыд йылаз султыны выре вал ай, но кивалтӥсьёс валазы: пудоез эмъяса, адями тазагес луоз. Кӧня черъёс паласько адямилы висись но висисьтэм пудоослэсь туала дыре но, нош соку югдур эшшо но урод вал.

Озьы, 1913-тӥ арын ёросамы но ветфельдшер юнматэмын вал. Шедьтэм документъёсъя отын пусъемын Поварицын фамилия. Со-а нырысетӥез пудо першал луэ ёросамы, оло, эшшо мукетыз ужаз, гуртъёстӥ ветлӥз, вераны уг луы. Но тодмо мукетыз кивалтӥсь, кудӥз ужаз 1929-1934-тӥ аръёсы. Со Пётр Семёнович Андреев. Нырысетӥ ветлечебницалэн пу юртэз туала ёрос администрацилэн интыяз сылӥз. Со дырысен, ми тодӥськом, ветслужба будӥз, юнмаз. Али ветеринаръёс юнматэмын котькуд муниципал кылдытэтын, котькуд возёсын. Соослэсь ужамзэс эскеро ёрос ветлечебницаысь ӧнерчиос. Син азьын гурт пудоос гинэ ӧвӧл, сак эскерисько нюлэсын улӥсь пӧйшуръёс но (улон интызыя, ветлон сюрессыя но мукет тодметъёсъя). Пудо вордон удыс ноку но капчи ужен ӧз висъяськылы. Скал кыскиськод-а, сое сюдӥськод-а яке эмъяськод-а - капчи ноку но ӧз йӧтылы. Угось пудо уг вера висемез сярысь, сое сак эскерыса гинэ валаны луэ, мар ке но умойтэм шуыса.

“Родина” возёсысь Кочиш фермаын ужась Зоя Эсенкулова ветеринар луыса 21 ар ужа ини. Ёросамы со Пичи Пурга ёросысь вуэмын, Можгаын ветеринарлы дышетскемез бере. Тямыс нылпиё семьяын вордскем Зоя умой тодӥз, макем секыт пудо утялтон. Озьы ке но, пичи дырысеныз доярка луэмез потыса улӥз. Дышетскем кулэ ик шуыса, нылаш пудоослы матын луись ӧнер басьтӥз. “Родина” колхозэ направлениея вуиз, 3 ар ветеринарын ужаз. Собере пичи дырысьтыз малпанзэ вунэтытэк, куинь арлы скал кыскисе кариськылӥз. Но басьтэм профессизэ улон вунэтыны ӧз сёты, 1995-тӥ арысен та дырозь Зоя Кирилловна пудоосты эмъя.

- Ужме туж яратӥсько. Кинлы ке юрттэт сётэмед луэ ке, солэн пайдаез вань ке, астэ дунне вылын кулэен лыдъяськод. Куддыръя туж секыт но луылэ, ӵемгес огнад кылиськод ке, киосты но ӝутыны мылкыд ӧвӧл. Нош эмъям пудоед катьяське ке, ачид но улӟиськод кадь,- керпотэм пыр вера Зоя Эсенкулова.

Та гурт нылкышно шоры учкыса, валано, макем саюлын уло огшоры ке но, зол специалистъёсмы. Калыке трос потатэк, гуртоос асьсэ сярысь вераны но уг ярато. Сыӵе дыре соосты эшшо но зол возьматэм потэ, мед тодозы ужась калыкез.

Та дыре Зоя Кирилловна огназ улэ, кыкез ик пиез ас понназы уло ини, мамазэс эскерылыны бертыло, асьсэлэсь пиналъёссэс вайыло. Нош кузпалызлэн 20 ар талэсь азьло ини сюлмыз дугдӥз. Кочише вуыса, егит нылаш Геннадий Эсенкуловез адӟыса, соку ик синмаськиз солы. Ӝужыт, чебер, ужась тракторист. Улон соослы трос шудо вакытъёс кузьмаз, но воргоронлэн сюлмыз ӧз чида куинетӥ приступсэ. Кызьы бен вормиз кайгузэ нылкышно?

- Уже ик юрттӥз,- вера Зоя Кирилловна.- Пиосы пичиесь вал ай, пудо трос вози. Ваньзы котыртӥ бергано,  уже вуоно - озьы сюлэм бӧрдонэ палэнскиз, но пыраклы ӧз кошкы.

Озьы луэ, дыр, котькуд адямилэн: мар ке уг тырмы ке, мукетыныз воштэ. Пудо эмъян со улон сётон кадь, кужымедлы оскон. Зоя Кирилловна котькуд ӧтемлы вазиське, котькыӵе дыре курадӟись пудо доры мынэ. Тужгес солы яра тулыс, куке фермаын кунян вайиськон дыр вуэ. Котькуд нуналэ вордске выль улон. Куалекъясь пыдъёссы вылэ султыса, кунянъёс юрттэт утчало, мумызэс ӧтё. Отын ик пудо першал котыразы берга, сак эскере соослэсь но скалъёслэсь тазалыксэс, дырыз дыръя юрттэт сётэ.

Зоя Кирилловналэн ужез капчи ӧвӧл, кырсез но, куректонэз но шеде. Но мукет интыын со ассэ уг адӟы ни. Ёросысьтымы ветслужбалы 100 ар тырмемен ӵош сӥзем потэ солы юн тазалык, кужым но пайдаё уж. Котькуд малпанэз мед быдэсмоз.

Вера ВАХРУШЕВА

Туспуктэмез авторлэн