Библиотекаослэн нуналазы Сюровай библиотекалы 30 ар тырмиз

Выль ужан амалъёс котьку азинто

 Куартолэзьлэн пумыз котьку кадь ик пӧртэм ужрадъёслы узыр луэ. Туэ пусйымон лыдпусъёс пӧлы пыриз Сюровай гуртысь библиотекалэн 30 аръем юбилеез но. Быдэс ёросысьтымы лыдӟиськонниосын ужасьёс, Культурая управленилэн кивалтӥсез Елена Тимофеева но ёрос клублэн директорез Ольга Протопопова ветлӥзы отын ужась эшсэс Зоя Вахрушеваез ӟечкыланы.

Та юбилей герӟамын вал библиотекаослэн нуналэнызы. Ку-о бен куноосты люкалод на, куке вань сыӵе тупась нунал? Удысэдлэсь азинсконъёссэ возьматыны, лыдӟисен ушъяськыны, кивалтӥсьлы куронъёстэ шараяны.

Гурт библиотекаын ужась Зоя Вахрушева, клублэн директорез Любовь Байкузина, клубысь режиссёр Вячеслав Широбоков но “Азвесь” ансамбльысь бабушъёс ӟырдыт, шулдыр кырӟанъёсын пумитазы вуэмъёсты. Лыктэм куноос ас гуртазы кадь пукизы “Табань” центрлэн шуныт кабинетаз. Татын библиотекаръёсты сюлмысь ӟечкылазы Кекоран муниципал кылдытэтлэн йырыз Любовь Вахрушева но райсоветлэн депутатэз Валентина Загребина. “Исток” ООО-лэн кивалтӥсьёсыз юбилярлы бадӟым торт кузьмазы. Туж мусо адскизы та праздникын Сюровай нылпи садысь нылъёс. Валерия Байкузина но Снежана Загребина шумпоттӥзы куноосты кырӟанэн но кылбурен. Озьы ик лыктэмъёс пыр-поч тодӥзы библиотекалэн кылдэмез сярысь. Зоя Михайловна тодэ вайытӥз нырысетӥ ужасез - Вера Вахрушеваез. Али та кышномурт Якшур-Бӧдьяын улэ, почта ёзэтын ужа. Со бере тыршиз Екатерина Широбокова, кудӥз та дыре Кекоран школаысь библиотекаен кивалтэ. 1989-тӥ арысен та книга юртын 24 ар ӵоже ужа ини Зоя Вахрушева. Книгаоссэ сяна, та нылкышно тодэ котькуд лыдӟисьсэ, солэсь сямзэ но лыдӟон мылкыдзэ. Пиналъёс будо, кошко, лыкто выльёсыз. Кыӵе ке ужрадэ, шудонэ, ӵошатсконэ люкано-а - Зоя Михайловна тодэ, кызьы но маин нылпиосты библиотекае кысконо. Тужгес трос лыдӟиськисьёссэ но дораз ӵем ветлӥсь юрттӥсьёссэ Зоя апай Таукаронъёсын пусйиз.

Но таин гинэ ӧз йылпумъяськы пумиськон. Веть татчы люкаськизы быдэс ёросысь библиотекаръёс, тросэз соос кема аръёс ӵоже ужало ини та удысын, тодо сое ас вить чиньызэс кадь. Ужзэс умой радъямзы понна, выль амалъёсты кутэмзы понна МАУ ИКЦ-лэн грамотаосыныз Ольга Витальевна но Елена Николаевна укмыс ужасьсэс пусйизы. Тани со сюлмо кышноос: Зоя Вахрушева (Сюровай), Надежда Перевощикова (Алгазы), Ирина Широбокова (Якшур), Надежда Широбокова (Лынга), Алевтина Соболева (Вуж Ӟатча), Людмила Вахрушева (Кыква), Ольга Тарасова (Зеглуд), Валентина Ильминских (Варавай) но Любовь Карпова (Якшур-Бӧдья). Азьланяз, оскем потэ, та нылкышноос но мукет библиотекарьёс, кинлэн ӧвӧл на бадӟымгес данъянъёссы, вылӥ пусъемын луозы. Нош гуртын ужасьёсыз одно ик, угось туала пиналъёсты ой! кыӵе капчи ӧвӧл компьютер бордысьтызы ишкалтыны, огшоры шудонъёсын, книгаосын тунсыкъяськытыны.

Библиотекарьёсмылы эшшо огпол сӥзем потэ нырысь ик трос лыдӟиськись, выль книгаос, журналъёс, ӵаш-ш поттыса ужась компьютер но тӧл кадь лобась Интернет.

В.ПЕТРОВА