Сабантуй-2013 Якшур-Бӧдьяын

Рахмат вань эшъёслы!

 8-тӥ инвожое, куд-огезлы со витёнтэм шорысь но луиз, ёрос стадионын Сабантуй шулдыръяськон ортчиз. Ми дышимы вал ини, бигер эшъёсмы та бадӟым праздниксэс пӧсьтолэзе ортчытъяло шуыса. Но бусы ужъёс - гырон но кизён - туэ вазь йылпумъяськизы, шулдыръяськонэн беромыса ӧвӧл улоно, азьланьын мукет сюлмаськонъёс витё уго - турнаськон но нянь утялтон - малпазы ёросысьтымы бигеръёс.

Куазь но та шулдыръяськонлы котьку ик шундыё, чебер тупа. Стадионэтӥ быдэс семьяосын ветлӥсь калык шоры учкыса ик мылкыд  ӝутскиз. Лыктэмъёс лачак вал шуыны уг ке но луы, тырмымон люкаськизы. Котькуд бадӟым празднике вашкала дыръёсы быдэс семьяосын поталлязы, кин ӵыжы-выжыяськылӥз но, кин выль эш шедьтылӥз. Огъя лэсьтэм ужлэн пайдаез, емышез мед луоз, азьланезлы оскон мед сётоз - та мылкыдъёс кузёясько Сабантуйын. Тюрк кылысь “сабан” плуг шуыса берыктӥське, нош “туй” - сюан, шулдыръяськон. Сабантуй данъя Инкуазез но музъем вылын ужасез. Удмуртъёслэн Гербер праздниксы но сыӵе мылкыдын ортче. Кыкез ик юмшанъёс шаерамы калыккуспо луизы ини. Пӧртэм выжыосысь потэмъёс шумпотыса лыкто та шулдыръяськонъёсы. Но, огазеясь мылкыд сяна, котькудӥзлэн вань аспӧртэмлыкъёсыз.

Нырысь ик син азе пуксе “курэш” нимо нюръяськон. Татын егит пиосмуртъёс но быдэ вуымтэ пиос кужымзэс мертало, сэзь луэмзэс возьмато. Биньгозыез но йырберъёсазы думыса соос кыскало, юбо кузя ветло, выллань тубало. Нош нылкышноослы мукет ӵошатсконъёс малпамын. Тужгес тунсыкоез но дунъямонэз - карнанэн ву нуллон. Пуньы вылын ыль курегпузэн бызьылон, мешоке пырыса тэтчан. Ваньмыз сак но со дыре ик чупрес луэмез возьматэ. Ӵошатсконъёсы трос пиналъёс пыриськизы - ваньзылэн кузьым басьтэмзы потӥз угось! Куд-огез ваньмаз ассэ эскериз, праздникез быдэс мугорыныз шӧдӥз.

Кызьы шуиз ёросысьтымы бигеръёслэн огазеяськонзылэн тӧроез Мархаба Зиннатова, Сабантуй умой мед ортчоз шуыса, со быдэс уй вӧсяськиз. Ваньмыз пӧрмиз. Куазь но умой тупаз, калык но лыктӥз, ӵошатсконъёсы мыло-кыдо пыриськиз. Палэнэ ӧз кельтэ та праздникез вылӥ кивалтӥсьёс но. Мархаба Фаязовналы шуныт кылъёс вераны ветлӥзы. Ижкарысь бигеръёслэн центрзылэн йырыз Фнун Мирзаянов, Кун Кенешысь депутатъёсмы Софья Широбокова но Алексей Вахрушев лыктэм калыкез праздникез ӟечкылазы. Гажан кылъёссэ вераз ёросмылэн кивалтӥсез Владимир Ефремов. Пӧсь саламен вазиськизы бигер эшъёссылы Ӟуч общество но “Удмурт кенеш” огазеяськон. Сцена вылысен чузъяськизы бигер, ӟуч но удмурт кырӟанъёс, нош собере мылкыд карисьёс эктыны потӥзы. Та эктон праздниклэн огез валтӥсь тодметэз: кин кемагес чидалоз эктыны, со ваньзылэсь шудо но тыршись лыдъяське. Огез нылаш пиосмурт ӵошатсокнэ но пыриськиз - ӝужыт юбо кузя ӝыныезлэсь вылӥегес ӝутскиз. Вот кызлар ке, кызлар (нылаш)! Номырлэсь но уг кышка вылэм Алина Мулланурова. Нош праздниклэсь валтӥсь кузьымзэ курэш нюръяськонын утӥз ӟучомем ке но удмурт пияш, “Людмила” магазинлэн кузёезлэн Людмила Вахрушевалэн Андриян пиез. Батыр ке батыр, таин уд споръяськы. Кузьымтэк нокин но ӧз кошкы та нуналэ.

Сабантуез радъян понна сюлмаськем адямиосты Мархаба Зиннатова нырысь ик пусйыны но тау карыны куриз. Тужгес бадӟым юрттэт сётӥз, мылкыдзэ бурдъяз Карам Гилязов. Шумпотыса огинэ кариськизы Зиннатовъёс, Курбаниязовъёс, Муллануровъёс. Депутатъёсмы Софья Широбокова, Алексей Вахрушев, ёрос администрация но ёрослэн йырыз Владимир Ефремов, “Якшур-Бодьинское” МО-лэн йырыз Сергей Поторочин, Культурая управление но ёрос клуб - ваньзы вылазы но быгатэмзыя юрттӥзы. Ваче ужаса гинэ шутэтскон но пӧрме, озьы мед луоз пайдаё азьланяз но.

Вера ВАХРУШЕВА

Туспуктэмъёсыз авторлэн но

Николай ЯКОВЛЕВЛЭН