Нюлэскузё луыны капчи ӧвӧл
Кылем толэзе гурт клубамы нылпиослы гужем площадка ужаз. Ветлӥзы отчы дышетскисьёс. Котькуд нунал СИКЦ-лэн кивалтӥсез Людмила Вахрушева но клубысь режиссёр Наталья Ходырева пиналъёсын пӧртэм дуннеосы вуылӥзы, котырысь улон сярысь трос выльзэ тодӥзы.
Озьы инвожолэн берпуметӥ
нуналъёсаз но кыкваос Нюлэскузё доры куное вуылӥзы.
Гурт библиотека огдырлы тэльлы пӧрмиз,
кытын будо писпуос, уло пӧйшуръёс. Нюлэскузё
мыло-кыдо пумитаз кунооссэ, соин ӵош
алӥз: тэлез утёно, пӧйшуръёслэсь
улон интыоссэс ӧвӧл
таркано. Тушо пересь валэктӥз пиналъёслы,
мар луоз, адямиос инкуазез ӧз ке уте: ву
ярантэм луоз, писпуос но будосъёс куасьмозы, пӧйшуръёс
кошкозы. Соин ик Нюлэсмурт, нылпиос ваньзэ мургес мед шӧдозы
шуыса, ас интыяз кудзэсты ке пуктыны мылкыдзэ вераз. Тэлез чылкытын возьыны
капчи ик уж ӧвӧл
уго. Со понна конкурс ялӥз: кин тросгес тодэ
нюлэс сярысь? Дас ӵошатскон пыр ортчизы
пиналъёс. Кылсярысь, писпулэн тусыз тодмо, нош кызьы со нимаське? Яке кыӵе
тодметъёсъя потыны луоз тэльысь, йыромид ке? Кыӵе
пӧйшуръёс но будосъёс Удмурт шаерлэн Горд
книгаяз пыртэмын? Таизлы но юанлы пиналъёс шонер ответ шедьтӥзы:
тужгес по утёно ӵушъялэз, коньыез,
урдоез (барсук), мудӥсь шырез (крот), ӧвӧл
ишконо тӧдьыгырлыез (ландыш),
италмасэз (купальница), куакагырлыез (колокольчик) но бакакуараез (мать-и-мачеха).
Ваньзылэсь умой нюлэсэз тодэ вылэм 4-тӥ
классысь Даниил Новгородцев. Ӧжытлы гинэ
ичигес - Ксюша Булдакова (3 класс). Сьӧразы
уйиськиз Вика Широбокова (7 класс). Мар бен, Данил Нюлэскузёлы умой юрттӥсь
луоз. Бере уз кыле эшъёсыз но.
Басьтэм но тодэ ваем
тодон-валанъёссэс юнматон понна Нюлэскузё пиналъёслы удмурт кылын гожтэм
экоплатъёсты возьматӥз. Оло, кык кылын валэктэмъёс
сюлме золгес пыӵалозы? Соку
мороженойлэсь яке сысконлэсь, мукет ческыт сиёнъёслэсь яркыт бинялтэтъёссэс
(обёртки) сюрес урдсы куштыны кизы уз пыры ни. Одӥг
нунал куспын урод сямъёслэсь уд куштӥськы,
но нуналысь нуналэ улон интыяд ӧвӧл
жагконо шуылӥд ке, тыршемлэн пайдаез
одно луоз.
В.ПЕТРОВА
Комментариев нет:
Отправить комментарий