“Галстуктэ керттӥд
ке, утялты сое...”
Туэ Удмурт шаерысь пионер
движенилы 90 ар тырмысал. 70-80-тӥ
аръёсы кыдам пионеръёс али но тодазы ваё, кыӵе
со дыр вал! Вордскем шаередлы пайда ваён, ог-огедлы юрттон, зэмлык понна
нюръяськон - со вакытлэн валтӥсь
тодметъёсыз. Ваньзэ сое улонэ сюлмысь пыӵатыны
тыршизы нырысь октябрёнокъёс, собере пионеръёс, комсомолецъёс. Но пионер
галстуклэсь номыр дуноез ӧй вал кадь, со горд
басмалэсь данзэ котькуд пинал умой тодылӥз.
Пионер галстукен герӟаськем
тодэ ваёнъёсты улӟытон понна,
ёросысьтымы шаертодонъя музей но ёрос клуб дышетскисьёс пӧлын
сочинениослы ӵошатскон ортчытӥзы.
Пыриськизы отчы Чур, Кекоран, Мукши но Ӵошкыт
школаосысь пиналъёс. Ужъёсты дунъязы пуштросэзъя, тунсыко учырез возьматыны
быгатэм понна. Вормисе потӥзы: 7-8
классъёс пӧлын - Мукши школаысь
Полина Тронина (7 класс), кыкетӥ луиз Дарина
Васильева). 4-6 классъёс пӧлын I инты
басьтӥз Чур школаысь Виктория Пантюхина (5 класс),
II - Кекоранысь Иван Орлов, III - Чурысь Татьяна Ботика. Ӟечкыласьком
пиналъёсты вормонэнызы. Мумы-бубыослэн пионер улонэнызы тодматскыса, оскем
потэ, соос трос умойзэ басьтӥзы со вакытлэн
сямъёсысьтыз.
Вылӥ
верам пиналъёслэн ужъёссы туж тунсыкоесь. Но ӧжытлы
но бездытэсь ӧвӧл
Мукши школаысь 7 классын дышетскись нылъёслэн огъя ужзы. Пионер улон сярысь
тодэ ваёнъёс музеязы лачак люкамын. Соосты гожъязы на 2003-2005 аръёсы школаез
йылпумъям пиналъёс. Дышетӥсьлэн Алевтина
Тарасовалэн ӵектэмезъя Виктория
Широбокова, Анастасия Пасынкова но Елена Перевозчикова со гожтэтъёсты
бугыръязы, тужгес тунсыкооссэ конкурсэ келязы. Удмурт кылын гогжъямъёс соку ик
синме кыскизы. Сомында тодэ ваёнъёсты лыдӟыса,
аслам син азям пионере пыреме тодэ лыктӥз.
Чебер, шундыё тулыс нунал, Якшурысь вуж клуб, радэн сылӥсь
одноклассникъёсы, клятва... но тани чыртыям горд галстук пиштэ. Зэмзэ но
сюлэмез бугыртӥсь ужрад. Нош мае
тодазы возё мукшиос но кыкваос? “Ошмеслэн” таяз номераз сётӥськом
со гожтэтъёсысь куд-ог люкетъёсты.
“Мон Эльвира Александровна. 3-тӥ
классын дышетскыкумы, милемыз пионере пыртӥзы.
Тодӥсько на, кызьы ваньмес школьной коридоре
султытӥзы, клятва вераны косӥзы,
горд галстук керттӥзы. Али но пель сьӧрам
чузъясько кылъёс: “Галстуктэ ке керттӥд
ке, утялты сое...” Ма быдӟа шумпотон со вал!
Монэ пионере пыртӥзы! Школаысь
бертыкумы, выл дӥсьмес но ум дӥсяське
вал, горд галстукмес ваньзы мед адӟозы...
Пионер-геройёс сярысь туж трос книгаос лыдӟимы.
Нош огназы улӥсь пенсионеръёс доры
кӧня юрттыны ветлӥськом
вал!..
Наташа Ивановалэн гожтэмысьтыз:
“Одӥг
пол вуж дӥсьёс пӧлысь
мон шедьтӥ горд пичи басма. Со
коркалэн липетэзлы укшаз, йырын нуллон кышетлы но кельшиз. Мынам туж тодэме потӥз,
ма со сыӵе шуыса. Анае доры
мынӥ но юай. Со галстук вылэм. Нош малы со горд?
Азьло Совето Союзлэн флагез быдэсак горд вылэм, нош та галстук солэн пичи гинэ
люкетэз. Та галстукез нулло вылэм пионеръёс... Нырысетӥ
классын дышетскыкуз ик, анае вожъяськыса учкылӥз
соос шоры, кин галстукен ветлэ ини... Пионер луыса, со зол тыршиз пионер нимез
вылӥе ӝутыны.
Анаелэн трос грамотаосыз, соосты со басьтӥз
умой дышетскыны тыршемез понна но, спортивной соревнованиосын вормемез понна
но... Анае шуэ: “Али но мед луысалзы пионеръёс. Соос вань дыръя котькин
эшъяськыса улӥз, улон но тунсыко
вал”. Пионеръёс али ӧвӧл
ке но ини, ми котькинлы юрттыны кулэ, нокинэ но палэнэ куштоно ӧвӧл”.
Ирнина Бушмакиналэн гожтэмысьтыз:
“Анайме Фаина Трифоновнаез
пионере 4-тӥ классын дышетскыкуз
пыртӥзы, 1974 арын. Солэн пионер отрядэз нуллӥз
Валя Котиклэсь нимзэ. Отрядзы люкемын вал ньыль звеноослы, котькудӥзлэн
звеньевоез вал. Отчы пуктылӥзы
умой дышетскисьёсты, асьсэды умой возисьёсты. Соослэсь мукет пиналъёс кылзӥсько
вал. Звеньевойёс отрядысьтызы дышетскисьёслэсь эскерылӥзы
дышетсконзэс, кызьы ассэс возё, котькуд-а уроке ветло. Нош Фаина Трифоновна
отрядаз физрук вал. Котькуд праздниклы, быдӟым
нуналлы ортчытъяллязы пионерской сборъёс. Таӵе
сборъёслэн кутсконазы флагез поттылӥзы,
барабанэн но горнэн шудылӥзы. Звеньевойёс
командир яке отрядлэн председателез азьын отчитываться кариськылӥзы...”
Маша Ульяновалэн гожтэмысьтыз:
“... Школаын дышетскыкуз, Надежда
Евгеньевна Вахрушева председатель совета дружины вал. Пионере пыртыкузы, соослы
значок сётӥзы, галстук керттылӥзы.
Азьланяз но пӧртэм ужрадъёсы
пыриськемзы понна соослы значокъёс, грамотаос сётъязы. Тужгес чупресъёсыз ёрос
слётъёсы ветлылӥзы. Надежда
Евгеньевналы “Артек” лагере вуылыны но удалтӥз.
Со “Бархатный сезон” сменае шедиз. Тодматскиз туж трос адямиосын, барабанэн
шудыны дышетскиз. Утренникъёс но сборъёс нуналлы быдэ ортчылӥзы.
Сборъёсын азьлань ужъёс сярысь вераськылӥзы,
лэсьтэм ужъёссэс вераллязы...”
Алёша Вахрушевлэн гожтэмысьтыз:
“Анае Таня Булдакова Сурон
школаын 1970-80 аръёсы дышетскиз. 1-2 классъёсын со октябрёнокын улӥз,
мӧляяз Владимир Ильич Ленинлэн тусбуеныз вить
сэрего кизили нуллӥз. Нош кыӵе
со вожъяськыса учкылэм Света апаез шоры, веть со чыртыяз горд галстук нуллэ
вал. Вуиз анаелэн но вунонтэм нуналыз. Со вылэм 22 оштолэзе 1973 арын. Ленинлэн
вордскем нуналаз анаелы чыртыяз галстук керттӥз
гуртысьтызы ик ныл Олина Оля. Со Оля сузэрелэн классаз вожатой луыса ужам: ӵошен
книга лыдӟиллям, толалтэ тэле
куасэн ветлылӥллям, бьызьылон ӵошатсконъёс
ортчытъяллям. Пионер дружиналэн советаз улытозяз анае трос пӧртэм
ужъёс быдэсъям, культмассовой но учебной секторъёс вылӥллям.
Отрядзы Зоя Космодемьянскаялэсь нимзэ нуллэм, соин соос быдэс классэнызы та
кужмо нылашлэсь биографизэ дышетӥллям,
со кадь кышкасьтэм, чупрес но визьмо луыны тыршиллям... 6-тӥ
классын дышетскыкуз, анаелы “За активную работу” значок сётӥллям.
Мар веранэз, анае знаменосец но вылэм! Демонстрация дыръя со азьпал радын
знамяен ортчылэм Сурон гуртлэн ульчаостӥз.
19 куартолэзе пионер огазеяськонлэсь нуналзэ туж шулдыр ортчытъязы: “Зарница”
шудонэ ваньзы пыриськылӥзы. Пионер отрядэныз ӵош
анае трос гуртъёстӥ ортчылэм, куштӥськем
корт но макулатура люкаса. Нош кӧня
ӵыжин октэмзэ вера! Со ӵыжинэз
вузаса, спортивной дӥськутлы коньдонэз
окмем! Туала нуналъёс шоры учкыса, анае шонерак шуэ: “Туала пиналъёс озьы ик
октябрёнок, пионер но комсомолец мед луысалзы, соку пайдаез зол адскысал”.
Таӵе
ӟырдыт кылъёслы туж осконо. Зэмзэ но, туала
пиналъёслэн тросэзлэн ӧвӧл
мар ке борды кыстӥськонзы, кыӵе
ке вормон басьтыны. Нош пионер огазеяськон цель пуктэ вал - кыӵе
луоно, кызьы ужано, малы дышетсконо. Тыршемзы пӧртэм
шумпотонъёсын берытске вал: данъян, пионер слётэ яке “Артек” лагере путёвкаен.
Со вакытлэн эшшо одӥг валтӥсь
тодметэз - эшъяськон но быгатӥсьтэмезлы
юрттон. Али со сямъёсты улӟытыны тыршо
“Юность”, РСМ огазеяськонъёс, со сярысь сюлмасько волонтёръёс. Кутскем ужъёссы
мед пӧрмозы, азьло пионеръёс азьын туала пиналъёслы
возьыт медам луы.
Дасяз Ника ЮМИНА
Комментариев нет:
Отправить комментарий