Якшур-Бодья ёросысь Виталий Широбоков суредаськись кылбур бичетсэ поттӥз!

Книга ӝажыын
Малпанъёс гылӟо, лобӟо...

Мар бордысен адямиос кылбур гожъяны кутско? Инкуазьлэсь чеберзэ валаны кутскем дырысен... Улонлэсь шӧмзэ веръяса, куректонэз но шумпотонэз дунъяны кутскемысен... Яке ваньмон дыр тросгес луэм вакытысен..? 
Котькинлэн нырысетӥ вамышез пӧртэм, аслыз гинэ тупа. Кинлэн ке со пичи дырысен ик пӧзись ошмес сямен быльыра, номырлэсь кӧбератэк, калыке потэ. Кинлэн ке кылбуръёсыз аръёсын люкасько, дӥсьтонэн тырмо, одӥг-ог газет-журналъёсын потало. Арысь аре кыдало, кужмоесь луо. Якшурысь Виталий Широбоков “Ошмес” газетэн кылдэм дырысеныз эшъяське. Эшшо вазьгес “Югдонэн” кусып тупатӥз вал. Нош нырысетӥ кылбурез кылдӥз 6-тӥ классын дышетскыкуз, куке школаязы тодмо удмурт кылбурчи Аркадий Клабуков ветлӥз. Малпам чуръёсыз “Югдон” газетын печатламын вал. Пуштроссэ Виталий Семёнович али уг ни тоды, но нырысетӥ вамышез сое эшшо бурдъяз. Будэмезъя пияш сакгес чакланы кутскиз инкуазь суредъёсты, улонысь учыръёсты. Школаын суредаськонъя дышетӥсьын ужакуз сюлэм малпанъёсыз суредъёсаз но пыӵаллязы. Озьы туж лачмыт но востэм Виталий Семёновичлэн пушказ пӧзись малпанъёсыз кыре поталлязы. “Ошмес” газетын печатласькыны кутскемез бере, кылбуръёсыз “Кизили”, “Кенеш” журналъёсын но потаны кутскизы. Берло аръёсы ужъёсыз “Огпол” (“Однажды”) но “Ошмес син” бичетъёсы пыризы. Кылем арлэн пумаз кылбуръёсыз "Малпанъёс гылӟо, лобӟо..." нимо бичетын потӥзы. Тани мар гожтэ выль книгалэн азькылаз Якшурысь потэм Валентина Широбокова: 

 - Виталий Семёнович Широбоковлэн кылбуръёсыз сӥземын инкуазьлы, яратонлы, нылпиослы, отысь лыдӟиськомы улон сярысь малпанъёссэ, сюлэмшугъёссэ. ... автор возьматэ ортчемезлэсь мӧзмемзэ, нош алиез сярысь сюлмаське, кытӥ вӧсь но луэ, адямилэн улэм но ужам сюресэз сярысь малпаськыкуз. Зӥбыт, востэм суредасьлэн но дышетӥсьлэн, кылбурчилэн яратонэз но сыӵе ик йыгмыт: одӥг пол синмаськиз но пырак азелы со кылиз сюлэмаз.

Вакчияк но туж пуштросо верамын. Одӥг ӧрын улӥсь адямиос туж валало ог-огзэс, пуш малпанъёссэс. Кылбур бичетсэ Виталий Широбоков 50 экземплярен гинэ поттӥз. “Малы сыӵе ичи?” юамелы тазьы шуиз: 

- Мон уг турттӥськы нимме вылӥе ӝутыны, кылбуръёсме матысь эшъёсы лыдӟизы ке, мон шудо луо. 

Нош мон эшшо но эшшо верасько: ёросамы котькуд кылбурчимы тодмо мед луоз, солэн ужъёсыз котькуд школа но гурт библиотекаосын азьпал ӝажыосын кылльыны кулэ. Виталий Семёновичлы выль вормонъёс но выль инвисъёс сӥзиськом.
Вера ВАХРУШЕВА